.#الحلقة_58:
رجعت سارة هذاك النهار مع سمير ..فرحانة بعدما جوزت نهار كامل معاه برا وبردت قلبها ..
دخلت للدار لعشية تمشي وتغني وفرحانة .شافت يماها فالكوزينة سلمت عليها وتتبسم
حورية : خير بنتي واش الفرحة هذي كامل ؟
سارة: مكاش..فرحانة برك..
حورية: روحي بدلي وارواحي عندي هدرة معاك .
سارة استغربت : واش مالهدرة ماما ؟!
حورية: روحي بدلي وارواحي نفهمك..
سارة : اوك..
طلعت سارة بدلت وتخمم يماها واش راح تقوللها..
لبست وقعدت على الطابلة فالكوزينة.وتشوف في يماها مستغربة..
سارة: ماما غير الخير ؟؟
حورية: شوفي بنتي نتي درك 19 سنة وهاكي فالجامعة..قيس الزواج ..
سارة: اهيه ..
حورية: مزلتي مع سمير ؟
سارة عوجت فمها : ايه علاه؟!
حورية : يابنتي شوفي سمير معندوش الدار وخدمتو قليلة وشفتي ختو علا حساب هدرة الجيران راح تتطلق..من سبة الضيق..نتي علاه شادة فيه وهو معندوش مستقبل ؟.
سارة: ماما سمير محال نفرط فيه ..ومعليش نصبر عليه حتى يفرج ربي..
حورية: لوقتاش تصبري ؟ نتاجاتك كامل مخطوبات ولا متزوجات ؟! ونتي اقعدي تبعيلي في سمير ؟؟
سارة :ماما ..واش خصو سمير نصبر مزلت صغيرة..
حورية: لالا مراكيش صغيرة..وزيد ديما يجوك خطابة لباباك وناس ملاح وانا نردهم بصح لوقتاش !؟ ماشي مليح للطفلة ترد الخطابة بزااف..تولي عليها الصدة وواحد ميزيد يدور بيك..وحتى سمير تاعك ويخليك..اذا راه داياتك الغلطة.
سارة: واش حابتني ندير ماما ..
حورية: البارح وليد عمك امير هدر عليك مع باباك..وباباك عجبو
سارة مخلوعة ؟! : امير ؟ منك صح ؟!
حورية: ايه مني صح..امير قاري وعندو الدار والطونوبيل وخدام وعاقل.واش خصو ؟؟ وكامل فيقينلو بلي تعجبيه هذي مدة..
سارة: منستحقوش امير..
حورية: ساارة ..خمي مليح بنتي راكي ظيعي في حياتك مع واحد معندوش مستقبل..الحب ماشي كلش..شوفي زينب واش دارت باش تزوجت باحمد مدارش العام وراح تطلق..
سارة : ماشي كيف كيف..
حورية : كيف كيف ...وبركاي مالتبهليل تاعك باباك انا معندي منقولو والله يسبني في جالك ..
سارة ناضت تجري لبيتها تبكي ..
سارة: اااه يااربي واش ندير درك حبو يفرقوني على سمير ..كيفااه راح نقولو ..وواش راح نقوللهم..ااه ياربي حصلة..
بفف منقولوش لسمير نخاف كاشما يدير..خلي نحاول بلاك يرفض بابا..
..
حورية فالكوزينة تهدر وحدها: هذا كامل سمير يطلعلها في راسها ..وباباها بلاك تغيضو موالفة تبلعطو هي..بصح انا ندبر راسي مع سمير ومنخليهش يضيعها .
..
غدوة منذاك راحت سارة تقرا عينيها منفخين مالبكا ...راحت بكري مشافهاش سمير..
سمير خرج يخدم عادي شوية هاك..جات ليه حورية ..نخلع كي شافها..
حورية: صباح الخير وليدي
سمير: صباح الـخير خالتي..كاشما احتجتي ؟؟
حورية: ايه جيت على حكايتك مع سارة بنتي
سمير مخلوع..
حورية: متنخلعش عارفة ولحقتني الهدرة مالجيران..
سمير: والله خالتي مانيش نتمسخر بالطفلة ناويها صح ..الضروف مساعدتش..
حورية: معليهش وليدي ..بصح زوج كلمات..خلي الطفلة في حالها
سمير مخلوع مع حشمة وقلق : علاه ؟!
حورية: بنتي متعلقة بيك بزاف ورفضت كامل لي خطبوها وجاها خطاب لباس بيه مقبلتش في جالك..خليها باش تتزوج ..حراام عليك تشدها معاك ونتا معندكش مستقبل..خلي الطفلة في حالها
سمير: بصح انا ناويها اصبرو عليا..
حورية: قتلك خليها والله نزيد نشوفك معاها نشتكي بيك..وزيد حاب يصرالها كيما ختك ؟ خمم تفهم
وراحت وخلاتو واقف الدم نشف فيه متوقعش الهدرة هذي بصح فلخر عندها الحق بنتها وتخمم في صلاحها
أنت تقرأ
ولاد الحومة
General Fictionجيتتتتتكم بعد غيبة طويلة مجيتش بيديا فارغين جبتلكم كرو فوووور من الواقع وطويلة 93 حلقة تحت عنوان " ولاد الحومة "
