.#الحلقة_93_الاخيرة: سارة:ليوم نهار شباب تعرفو علاه..اليوم نهار سعيد لانو اليوم عرسي انا وسمير وراني ميتة بالسعادة وماهيش سايعتني... تحبو تعرفو كيفاه حتى تزوجنا... .... نرجعو للور شوية... امير جا لعندهم للدار وقاللهم نبطل من سارة خاطر متفاهمناش انا وهي عادي...وهي وافقاتو....واقنعو اهلهم في زوج لي محبوش فلول مي فلخر اقتنعو وكل واحد راح. في حالو... بعدها سمير جا خطب سارة مع يماه وختو زينب لي رجعت ...حقا محكيتلكمش كيفاه رجعت... درك نحكيلكم ... ... احمد ليلة قبل الجلسة الاخيرة تاع الطلاق مقدرش يرقد كامل...بقا برا فالبحر يخمم في زينب مرتو وفي هدرة ختو سميرة....حاصل .معرفش واش يدير يسامح مرتو لي خانتو ولا يطلقها.... قاعد حتى شاف واحد جاب قرعة يشرب وقاعد طرف البحر وطونوبيلتو ولبستو باين بلي عند و الخير ..استغرب واحد هاك واش داه للحالة لي راه فيها كاره راح قعد قدامو .... احمد: خير خويا متبانش تاع دعاوي هذو؟؟ غير الخير.. ..تنهد السيد هذاك وقالو عييت م الدنيا.....حياتي كامل عايش بالحراام منصدق منخرج زكاة يا ما زڨات معايا المرا ...بصح انا مخذيتلهش الراي وايوم شريكتي راح تفلس والمرا ضربتها وحاوزتها كي فاقتلي خنتها... احمد تنهد ....شاف الناس كامل مهمومة..بقا غايس حتى شاف الراجل هذاك يبكي..نخلع الراجل: باريتها تسامحني وترجعلي...والله ندمت ندامة كحلة والباطل لي خرجتو فيها راني نخلص فيها...ياريتها تسامحني ياريت... احمد: نتا جرحتها بزاف... الراجل: ايه عارف وراح نبقا نطلب السماح حتى ترجعلي..خسرت كلش في حياتي موراها...لازم نرجعها باش نصلح غلطتي... احمد تفكر كي كانت زينب تعيطلو تطلب منو السماح وتبكي وتطلب منو يسامحها وهو رفض...تنهد.. الراجل: عارف كون نعيطلها نبكيلها تسامحني نغيضها قلبها حنين هي..صح كانت تدوس معايا بزااف بصح تحبني عارف... احمد تنهد وخمم انسان هكا مرفه وعندو هموم قد راسو ويستنا في مرتو تسامحو... الراجل شاف في احمد: نتا باين ناس ملاح..نتا مزوج؟؟ احمد معرفش واش يقولو قالو: ايه.. الراجل: ربي يخليلك عايلتك حافظ عليها ..ومتخسراش...مديرش كيفي.. احمد: حتى انا راح نطلق..مشاكلي تاع دراهم مكاش سكنة والمرا محملتش صراو بزاف مشاكل ..ومتفاهمنلش. . الراجل: واش تخدم نتا ؟! احمد: محاسب الراجل: جي تخدم معايا نوقفو الشركة خاطر هربولي اخدامين...و نعطيك حقك اضعاف.. احمد مستغرب: مذابيا..اصلا الخدمة قليلة والخلاص كيف كيف.. الراجل: بشرط ترجع مرتك...واذا غلطت سامحها...وسع خاطرك..دنيا صغيرة .. احمد تنهد: نشالله. اعطالو لاكارط باش يجي عند و... ... غدوة منذاك فالمحكمة..زينب ساكتة تستنا فالقرار النهائي..ويماها وسمير معها .. حتى قالو اتنازل الزوج عن طلب الطلاق. . نخلعو كامل وزينب ثان...شافت في احمد شاف فيها وتبسم ..عينيه يحكو لغة غير زينب لي تفهمها...وهويتبسم ورجعت تتبسم وتبكي. فاليل هذيك جاب الشيخ عاودو فتحو..وداها معاه ..محبتش دير والو...المهم ترجع لدار راجلها..لي استقبلوها هي ودارهم ودارولهم عشا ورجعو متفاهمين ويضحكو...غير سميرة لي غايسة وتنهدت ....بصح ريحت وفرحت لفرحة خوها. . نرجعو الحاضر.. زينب : يخاااه راني بالجووف...يااااع... الو احمد: خرجت خرجت ..راح نولي ام ..راني فرحانة.. احمد. فرح: مبروك علينا...حتى انا وجدتلو بيتو الفوق في دارنا الجديدة... زينب: امممم ديرهالو كبيرة وشريلو هذي وهذي.... احمد: نشالله هههههه يجي بخير برك... زينب: وانا في خاطري فريزة جيبهالي.. احمد: بديتي منبعد نجي فالكورتاج نجيبلك.. .... سارة :وهكا جاو خطبوني واليوم عرسي انا وسمير. بصح مباتش حسو. سارة: الو سمير .وين راك معيطتليش سمير: نتي وين راكي؟ سارة: عندك الحفافة.. سمير: اسمعي انا اليوم عندي ماتش.. سارة: اعععععع تتمسخر اليوم عرسك.. سمير: نلعب ماتش ونجي ههه سارة: منك بصح.. سمير: هههههه مهبولة خصني غير الماتش ..هيا فليل نوريلك..هههههه سارة: سمير تحبني ؟! سمير: نمووت عليك... #النهااااااااااااااااية. ارااااااؤكم فالكرونيك متبخلوش عليا بتشجيعكم 😍
أنت تقرأ
ولاد الحومة
General Fictionجيتتتتتكم بعد غيبة طويلة مجيتش بيديا فارغين جبتلكم كرو فوووور من الواقع وطويلة 93 حلقة تحت عنوان " ولاد الحومة "
