ولاد الحومة

41

#الحلقة_41:
غدوة منذاك الصباح .باش يروح يخدم .ناض احمد راح للكوزينة ..لقا يماه وجدت ااقهوة
احمد: صباح الخير يما
باية: صباح النور وليدي اقعد تتقهوا..
احمد: مكلاه يما نتقهوا برا .
باية: بووه وليدي اقعد تقهوا ..كيفاه تتقهوا برا هذي..
تنهد احمد وقعد يتقهوا..دخلت ختو سميرة
سميرة: صباح الخير يما..كاين لحليب لوليدي ؟
باية: ايه كاين..
شافت سميرة في احمد لي كان راح يفرغ رجع حطها وناض....
باية: وين وليدي اشرب قهوتك ؟؟
احمد: سقفت ..منشربش نروح نخدم..
وخرج..
..
احمد قرر باش ياكل برا ويتمرمد المهم ينقص المشاكل حتى تبرا مرتو.
..
النهار هذاك زينب خملت بيتها وغسلت حوايج..ومدخلتش للكوزينة كيما وصاها احمد..
جازو يمات كل واحد في حدو..
سمانة هكاك ..
قاعدة في بيتها عطشت والصيف السخانة ..راحت للفريجيدار..ملقاتش لاكريم لي جابولها راجلها ملقاتش الجو..
زينب : هذا وين راه ؟! ياك هو قالي جبتلك..
راحت لبيت لبنات ..قربعت..
زينب: يما..يما..
خرجت ليها
باية: خير بنتي كاشما حتجتي ؟؟
زينب: يما احمد قالي جاب لاكريم والجو وحوست عليه فالفريجيدار ملقيتوش
باية: ايه شفتو كان ثم. !!
زينب: ملقيتوش..
سميرة: كلاوه ولادي مشفتهمش..
زينب تقلقت شافت فيها : كيفاه تخلي ولادك ياكلوه؟! متعرفيش تزڨي عليهم ؟؟
سميرة: قتلك مشفتهمش!! ماكيش تفهمي ؟؟
زينب: لااا نفهم نتي لي متفهميش ..كون ربيتي ولادك ميدوناش لحاجة خاطيتهم..
سميرة: واش معنتها ؟؟ ولادي مشي مربيين ؟! اعرفي واش راكي تهدري..هذو ولاد وسخفو عليه واش فيها ؟!
زينب: كي تعرفي ولادك يسخفو قولي لباباهم يجيبلهم..ماشي يدناو لرزقي..
سميرة: الله يهدي ماخلق ولاد هذو .
زينب: علابالي بصح ديما يديروها ونسكت ..بزااف..
سميرة : وقتاش ؟ كذابة جامي دناو لحاجتك..
زينب: انا شفتهم بعيني..بصح ماليوم نشري فريجيدار ليا وتلقاو الشعر .
وراحت دخلت لبيتها..
...
فليل احمد جاي فالطريق عيط لمرتو
احمد: زينب كاشما نجيبلك تاكلي ؟؟
زينب: والو جيبلي حاجة باردة ..
احمد: ضرك نجيبلك فاكية..
زينب: ايه مذابيك..
دخل لحمد للدار بعدما تعشا برا كي العادة باش ينقص المشاكل..
...
دخل للدار شاف يماه .
احمد: واش يما لباس..
باية: لباس وليدي..
احمد جاب دلاعة قسمها..وعيط لزينب.
احمد: زينب ..زينب
احمد: هاذي ليكم وهذا ليها ...
باية: حنا كاامل نث لينا ونص ليها وحدها ؟!!
احمد: بفف يما ياك هي مراهي تاكل والو غير الفاكية وراكي عارفة..
باية : ايه فهمت..دبر راسك..
زينب: وي احمد عيطتلي .؟!
احمد؛ هاكي دلاع اقسميه ولا دبري راسك وخليه يبرد.
زينب: يعطيك الصحة ضرك نقطعو..ونتا تاكل ؟؟
احمد: نو مكلاه..
احمد: يما درتي مسفوف ؟؟ جاتني ريحتو.
باية: ايه علاه تاكل ؟!
احمد: اذا كاين؟؟
باية: كاين..
احمد: خلي زينب تحطلي يما روحي ترقدي...انا ناكل فالشمبرة..
وناض..
احمد راح لبيتو وزينب جابتلو الطعام..
زينب: هاك ..حبيت تاكلو ؟
احمد: لالا انا كليت..
زينب: املاا علاه قتلي جيبيه ؟!
احمد: علابالي تحبيه وقلت بلاك سخفتي عليه
زينب تبسمت : والله صح سخفت عليه.
احمد حط يدو فوق راسها : كولي بصحتك
..