ولاد الحومة

64

.#الحلقة_64:
سارة قرات ورجعت للدار مقلقة حاسة راسها راح يطرطق ..دارت في بالها سمير بدلها بوحدوخرا وتمسخر بيها..
تنهدت ..اليلة هذيك شبعت بكا عليه وعلى يماتهم كيفاه كانو ودرك كلش تبدل..سمح فيها فاسيلمو..
مسحت دموعها
سارة: لازم ننساه سمير درك خلاص رجع ماضي ..نشوف مع امير هذا بلاك نلقا فيه الخير..صح محال ننسا سمير بسهولة بصح بصح لازم نعفس على قلبي كيما هو محزنش عليا منحزنش عليه..
.سمير كيفها مقدرش يرقد بايت يشوف تصاورها ميساجاتها والفيديو تاعها و دموعو نازلين بالسكات..تمنى كون الضروف كانت عكس ...بصح لي زوالي وضروفو الاجتماعية متساعدوش ميتزوجش خير..حتى يدير تاويل..خمم حتى للوقت هذاك سارة تكون بولادها..
تنهد حط المخدة فوقو ورقد..
...
جازو يمات هذوك سارة تروح بكري والعشية مرات تلقى سمير مرات متلقاهش..بصح غرباء واحد ميشوف في واحد..مي في قلبهم كل واحد متوحش لوخر..
...
لحق نهار الخطبة...سارة ماهيش فرحانة من قلبها مي تتضاهر بالفرحة ..لبست ووجدت روحها ولد عمها يديرلها الخاتم خاطر يعرفها وتعرفو..
سمير عندو ماتش لعشية فالحومة ...كان راقد محبش يخدم ولا يخرج للحومة مخبش يشوف سارة ولا الخطابة ..
عيطلو ياسين باش يلعبو ..
ناض يجري مفاقش بقا راقد..لبس وهبط يجري..
حاب يلعب لماتش باش يتلها وينسا خطبتها..
وكيما قلنا فالحلقة الاولى..
كي دارو كورس مع صاحبو ..وهو سمع زغاريد حبس ورجع يشوف ...مهناهش خاطرو..وعرفها خطبة سارة.
خبط يدو على الحيط من قوة الغش..
راح لعب الماتش وعقلو فيها مقدرش يركز غير يكاسي...وكامل فاقولو ماهوش مليح..
ياسين : شبيك سمير غير تكاسي..
سمير: حتى نتا ثان معاهم روحو تق*** ..
وراح للدار لقاهم مزالهم ثم الخطابة..دخل للدوش يدوش الما سخون وهو ماهوش حاس بيه كامل..
حتى سمعهم خارجين يزغرتو..
خس روحو محروق كون صاب يخرج ليهم يقوللهم هذيك حبيبتي واحد ميشوف فيها واحد ميديها..تخايل ولد عمها معاها يتغزل بيها ..حس روحو هبل..بصح ميقدر يدير والو..هو مدهالو بيدو..
قعد فالدوش راسو بين يديه..اول مرة حس روحو عاجز للدرجة هذي...اول مرة ميقدر يدير والو..حبيبتو يمدها بيدو لراجل وحدوخر..وزيد جارتو وكل يوم يشوفها وراح يشوفها معاه ويبقا يتحرق مالداخل..وهي رجعت تكرهو ..ومراحش تفهمو وتحس بيه
لبس حوايجو وخرج..
فتح الباب حتى شاف بنت خت سارة صغيرة رافدة قاطو فالتبسي .
...عمو بعثتهم ماني لطاطا فطيمة الباروك تاع خالتو سارة..
سمير تكا على الحيط وضحك بستهزاء..
سمير: ادخلي اعطيهالهم.
..طلع في طونوبيلتو وديمارا حب يهرب مقدرش يبقا ثم..هو كلش يجرح فيه ومكاش لي حاس بيه كامل بلي راهو يتحرق..ومحال يتقبل فكرة سارة مع وحدوخر..خاجة فوق طاقتو..
رفد تليفونو وعيط لياسين
سمير: ياسين ..ارواح نتلقاو عندي هدرة معاك على السوجي لي قتلي عليه