ولاد الحومة

50

.#الحلقة_50:
#انيس هو الاسم لي اختاروه وناوين يسموه بيه لكن مكتبش ربي..
الناس تلمت في دار احمد فاميليا وجيران وولاد الحومة حباب وصحاب للدفينة...وزينب مقدرتش تحظر فالسبيطار مريضة ويماها معاها محبتش تخليهاا وحدها..
سمير رجع للدار دوش وبدل..رفد تليفونو وجا يعيط لسارة تفكر تليفون تاع سارة مزالو عندو..
سمير: بففف نسيت هذا مزال هنا..ودرك كيفاه نرجعو لها..
خرج حتى شاف بابات سارة نوض طونوبيل وجاي لعندو..حبس ويشوف فيه
صالح: سلام وليدي عضم الله اجركم..
سمير: الله يسلمك عمي صالح..
صالح: الدار حابو يطلو على زينب قبل الدفينة .
سمير: ايه راهي فالسبيطار ******
صالح: يعطيك الصحة وليدي..
سمير: بلا مزية عمي..
..
سمير: ممم سما سارة رايحة طل على زينب هذيك هي ثم نرجعلها الزبل تاع تليفونها.

سارة راحت مع يماها يشوفو زينب فالسبيطار وسمير سبقهم..
سارة شافتو ثم تبسمت ودخلت..عمي صالح حطهم وراح قاللهم دورة ونرجع ليكم
دخلو عند زينب لقاوها في حالة وفطيمة ثم..
حورية: معليش زينب بنتي مزلتي صغيرة والدنيا قدامك..ربي يرحمو طير من طيور الجنة..
زينب تبكي: متهنيتش بيه ياخالتي ..حتى قريب فرحت بيه وقلت مبقاش وشرتيتلو قشو ووجتلو حوايجو .ضرك تبقالي بلاصتو..ياخالتي
سارة شوف فيها غاضتها رجعت تبكي معاها ..
خرجت لبرا مقدرتش تبقا ..تمسح في دموعها..
...ممممم وشبيها عمري تبكي؟؟
سارة خزرت فيه وعوجت فمها وجات داخلة جبدها من يدها..سارة تخلعت فيه..
سمير: وين داخلة ؟؟
سارة: ريح سمير يشوفنا كاش واحد.!!
سمير: ميشوفنا حتى واحد..
سارة: سمير بابا درك يرجع ويما راهي هنا ..اطلقني خليني نروح .
سمير زير على يدها قرصها حتى عيطت..
سارة : ااايي..حراام عليك..
سمير: حلفت نعطيك طريحة على واش درتي فيا بصح اليوم الدفينة سلكتيلها..
سارة شادة يدها توجع فيها .وهو يضحك..
سارة: والله وجعتني ..
سمير: تستاهلي..
جبد تليفون باش يرجعولها حتى طلت فيهم حورية..
حورية: سارة راكي هنا عيطي لباباك نروحو نخلوها تريح..
شافت في سمير لي وجهو حمر حشم منها معرفش واش يهدر.
وزاد جا صالح ...سمير الدم جمد فيه معرفش واش يدير جامي طاح في موقف كيما هذا..وسارة كيفو وتقول في قلبها..واااع حكمونا..
سمير بكل برود: احم...هاكي تليفونك طاحلك مشفتيهش .
سارة:اا مشفتوش ميرسي خويا سمير..
سمير : بلا مزية..
وجاي رايح..
صالح : الطونوبيل حبست اون بان مقبيل وانا معاها محبتش تنوض..
حورية: بووه وكيفااه نروحو درك..
سارة نطقت : سمير..ااه..قصدي سمير جارنا..قولو..يوصلنا..
صالح روشلو وراح ليه قالو..
سمير: على عيني وراسي عمي صالح
صالح: الله يسلمك وليدي وصلهم وانا نبقا هنا مع الطونوبيل حتى يجي الديباناج
سمير: روح نتا وانا نبقا هنا..
صالح:هه لالا وليدي طونوبيلتك نتا موالفها ..
سمير: كيما تحب عمي..
سارة جازت قدامو تتزعبن وطلعت فالطنوبيل خبطت الباب..
حورية: بلعقل بنتي نحيتيها الباب..
سمير يشوف فيها ويسب في قلبو: اااه ياراسة راستك نحيها خير..
سمير ديمارا وطريق كامل يشوف في سارة شادة تليفونها وتصور فيه وهو يضحك وحورية شوف فيه مستغربة علاه راه يضحك..
سارة صورت روحها وعندها ابليكاسيون دارت فوطو تاعو وتاعها في فوطو وحدة كيما الفوطو تاع العرس..ووراتهالو وهو يسوق يشوف مالتروفيزور..طرطق بالضحك..
حورية شافت فيه وفي بنتها لي خبات تليفون ودارت روحها مفاهمة والو..