#الحلقة_32:
اليلة هذيك سمير وسارة بسيف باش رقدو كل واحد راسو خشين على لوخر..هو حلف ميهدر معاها حتى تولي هي ليه وهي كيفو حلفت عليه متهدرش معاه حتى يولي هو ليها ...
....
غدوة منذاك الصبح سارة خرجت باش ترجع الماعن لي سلفوهم على الجيران وسلفو حتى على دار سمير..
سارة: ماما اديهم نتي بففففف
حورية: يا بنتي ذيك الخطرة انا جبتهم اديهم نتي المرة هذ بالشوي حتى تكمليهم..
سارة تنهدت وراحت بدات بالجيران لخرين ودار سمير خلاتهم هوما اللخرين مكانتش حابة تروح خافت تتلاقا بسمير....خاطر مكانش خدام عرفاتو مناضش بكري ومزال فالدار خاطر بايت سهران ..
...
وجدت الماعن تاع دار سمير وراحت عندهم دقدقت.
مفتحوش..زادت دقدقت .
....
سمير كان فالكوزينة يتقهوا..سمع التقربيع ..
سمير: بففف شكون هذا جاي صبح ربي..
وكمل قهوتو ..محبش ينوض وزاد سمع دقديق..
سمير: اووووه ...راني جااي
سارة سمعاتو تفرفشت جات راجعة حتى فتحلها..
ناض سمير هكاك مكرفص غير كيما ناض مالرقاد مزال حتى مفطنش مليح.. شعرو مشنشف..
فتح الباب لقاها سارة ..بقا يشوف فيها حسبتلو راه ينوم..
سمير شاف جيهة دارهم: اااه يابنت الناس وليت نتخيل فيك..
سارة عوجت فمها: وين راهي خالتي فطيمة ؟
سمير: مممم صح مانيش نتخايل ..
سارة: بففف خالتي فطيمة جبتلك الماعن..
سمير: ماهيش هنا..
سارة: ونسيمة ولا زينب ؟
سمير: نسيمة منعرف وزينب راحت مع يما للطبيب..
سارة تنهدت: شد معانكم دخلهم ..
سمير: دخليهم نتي..
سارة: مندخلش والدار مافيها حتى واحد ..
سمير: انا راني هنا
سارة: سمير شد دخلهم..
سمير: لالا.
ودخل وخلاها واقفة..
سارة : اعععع سامط يالطيف..
جات راجعة شافت فطيمة وزينب راجعين..حبست ستناتهم..
سارة: صباح الخير خالتي..زينب راكي مليحة ! ؟؟
رجعولها وسلمت عليهم..
زينب: والله شوية..صحيتي على واش بعثتيلي البارح..
سارة: خااه بلا مزية..
انا جبتلكم ماعنكم ونروح.
فطيمة: وين تروحي بنتي ادخلي جامي دخليتي عندنا..
سارة: لاا معليش خالتي خطرة وحدوخرا.
فطيمة: بووه ادخلي بنتي وباش نرجعلك ماعنكم لي بعثتي فيهم..
زينب: ادخلي سارة ..
سارة حشمت منهم ولات دخلت..
قعدت فالكوزينة وهوما راحو يبدلو..
قعدو فالكوزينة..سمير كان بدل حوايجو ودخل لاكوزينة لقا سارة ثم ..تبسم..كان خارج ولا قعد..
سارة دورت وجها محبتش شوف فيه..
جات يماه
سمير: مبروك عليك جارتنا الباك..
سارة: الله يسلمك..
فطيمة: سمير مزلت هنا؟!
سمير: ايه مكاش فطور ؟؟
فطيمة: كاينة الشربة هايليك حط انا نشوف زينب ونرجع..ونشوف واش نرجعلها فالماعن..
...
خرجت فطيمة وسمير قعد مقابل سارة
سمير: حطيلي..
سارة: وشنو؟؟
سمير: قتلك حطيلي ناكل..ولا والله ضرك نقول ليما نحبها
سارة حلت فمها مخلوعة فيه..: اسكت تسمعك..
سمير: حطيلي
سارة: منحطش..
سمير: نحبك سارة نحببببك يااو نحبك..
سارة تخلعت: اسكت مهبول احااااي عليا..على التبهديل..
سمير: حطي شوفي..
ناضت سارة تحطلو وتسب ..
أنت تقرأ
ولاد الحومة
General Fictionجيتتتتتكم بعد غيبة طويلة مجيتش بيديا فارغين جبتلكم كرو فوووور من الواقع وطويلة 93 حلقة تحت عنوان " ولاد الحومة "
