ولاد الحومة

67

.#الحلقة_67:
سارة رجعت للدار عادي النهار هذاك..خرجو عطلة تاع الشتا .
سمير راح مع ياسين عند شاف تاع ليكيب لي راح يلعب معاهم..
تفاهمو معاه على كلش ويبدا مع يخلاص الميركاتو الشتوي يعني في جانفي ..يبدا معاهم..تفاهمو على كلش ووقع معاهم العقد ...
ياسين : كلشي مبروك..
سمير: يبارك فيك..
ياسين : هكذا نعودو نتوحشوك بزااف .هههه
سمير: ياودي غير نتا متتوحشنيش ..نتلاقو نتلاقو كي نجي..
ياسين: نشالله..
...
رجعو للدار ..
سمير دخل فرحان : سلام يما..
فطيمة: سلام وليدي علا سلامتك..
سمير : الله يسلمك..كاش فطور راني جيعان..
فطيمة: كاين مسفوف اقعد.
علاه مكليتش فالطريق ؟
سمير: كليت بصح اابرد الطريق مغلوقة بالثلج..مزية اوتوروت لحقنا بكري..
فطيمة : راك تبانلي فرحان غير الخير؟؟
سمير ياكل ويهدر: منمن..ايه عندي خبر مليح..
فطيمة: خير..
دخلت زينب للكوزينة.
سمير: زينب ..هاتي كاس باش نشرب اللبن..
زينب اعطاتلو الكاس..
فطيمة: انطق وليدي..
سمير: كاين كيبة تاع بالون فالشرق راح نلعب معاهم..
فطيمة: ..ايه..وكيفاه تروح لثم ..ولا كيفاه؟؟
سمير: ايه بصح نجي ساعة ساعة.
فطيمة: يعني راح تبقا بعيد على الدار..؟؟
سمير: ايه يما ..
فطيمة: وعلاه مشفتش هنا قريبة..؟!
سمير: ايه مكتوب جات ثما..معليش .نشالله فيها خير..ادعيلي برك..
فطيمة تنهدت : نشالله..
سمير: متخافيش ..نعود ديما نطل فيك.هههه
فطيمة: نشالله وليدي ربي يسهلك..
وشافت في زينب..هبطت عينيها وراحت لبيتها..
...
غدوة منذاك الصبح فطيمة وعروستها وزينب مع شغل الدار..وبرا الشتا ونهار بارد..
سمعو تقربيع..
زينب فتحت لقاتو احمد..هبطت عينيها..
ديما تتهربلو ومتحبش تخرج ليه وشدت غير كلمة طلاق..وتليفونها طافي متحبش تهدر معاه وهو حلف فيها مايطلقها..
ودرك صدفة جا لصباح فتحتلو طاحت معاه..
احمد : صباح الخير
زينب : ص..صباح الخير..
احمد : واش تخليني برا.
زينب : ادخل..
دخل احمد سلم على فطيمة ..
وهي واقفة مهبطة عينيها لاقاها ربي بيه
فطيمة : واش راك وليدي؟
احمد يتبسم : لباس..جيت ندي زينب معايا..
فطيمة تبسمت: ايه مرتك ونتا حر..
زينب دخلت بيتها..
احمد: دقيقة خالتي..
راح موراها وغلق الباب وهي قاعدة مشنفة..
احمد: شنفي ولا اقعدي ..درك تبدلي وجي معايا..
زينب: منجيش .روح شوف شغلك..
احمد قعد قدامها : شغلي معاك اليوم ..تلبسي ازربي وجي معايا..
زينب: منجيش .ماشي بسيف..
احمد: لالا بسيف..متنسايش مزلت راجلك ونحكم في عزرينك..سمعتي..
زينب: منجيش قتلك..اصبر نفريها مع المحامي ونطلقو.
احمد: معليش نطلقو ديري رايك بصح لدرك مزلتي مرتي..مزال مطلقناش ..صح ؟
زينب: ايه صح..
احمد: شفتي..هيا نخرجو نحوسو ...حتى مبيت نطلقو..هههه
زينب شافت فيه مخلوعة حتى ضحكت
زينب: هههه نتا صح مهبول...!!
احمد: ايه هبلتني مرتي مزية راح نطلقو ههههه
زينب عوجت فمها : ايه نشالله قريبا جدا..
احمد: ايه نوضي نخرجو ..نبروفيتو حتى يطلقك مسود السعد تاعك..علابالي مدة مخرجتيش ..ملي خرجتك ..صح ؟!
زينب: ايه صح..
احمد: شفتي ..نتي راح تطلقي تطلقي ابروفيتي في راجلك الحڨار واخرجي حوسي وفلسيه وكملي هبليه على جيه..ياك اخرتها طلاق..
زينب: ههه ايه صح عندك الحق..نخلف الثار فيه..ونبروفيتي..
احمد: شفتي هو حڨار ونتي تسكتيلو هكا..هو عايش لباس بيه ونتي غابنة روحك..ارواحي نخرجك شوفي ااثلج فالجبل ..ماشي ديما تصحلك شوفيه..
زينب شافت فيه: ثلج ..صح ؟
احمد: ايه..نوضي البسي قبل مايذوب..
ناضت تلبس وشافت فيه
زينب: اخرج ..خليني نلبس .
احمد : هاني غمضت عينيا..
زينب: نن اخرج..
احمد: لالا نخاف مجيش ..ونروح مع كاش وحدة لي نلقاها نديها معايا عالزعاف..
زينب :عوجت فمها: هاهاها ضحكتني دور للهيه
احمد دار ويضحك عليها..
احمد: كملتي ..ولا مزال
زينب: مزال..بلاك دور نقتلك..
احمد: ههههه حاندور حاندور
زينب : بففف خلاص كملت..نلبس حجابي وخماري..
احمد: ممم هيا..
لبست ووجدت روحها ماكياج وبارفان..
احمد: ممم هيا يالالة..
....
خرجو زينب هي لولى.
فطيمة نخلعت : وين بيها زينب ؟
زينب : رايحة نبروفيتي ماما اخرتها طلاق..
واحمد شابع ضحك : عندها الحق خليها تبروفيتي..
فطيمة تضحك عليهم..
خرجو طلعو فالطونوبيل تتع صاحبو..وراحو..
زينب شافت تليفون احمد فالطونوبل حبت تقلبو وحشمت...بقات تتعوج وحدها..شافتو صونا هو محبش يرفد..
زيتب: سكت تليفونك صرعني..
احمد دارو سيلينسيو بقا يعيط..
زينب تقلقت رجعت تغلي ..حبت تعرف.
زينب: شوف شكون بلاك يحتاجك..
احمد : خليه منبعد نرفدلو..
زينب: لالا درك..
احمد: ههه بسيف درك..
زينب: ايه..ولا كاش وحدة تعيطلك..
احمد: هههههه وعلاه اذا وحدة ياك راح نطلقو..
زينب: بصح مزلت مرتك..
احمد: ايه ..مرتي وراح تبروفيتي فيا....هاوليك تليفون قلبيه وابروفيتي ..
زينب : ايه نقلبو ..
ورفداتو تقلب فيه وهو يضحك عليها