.#الحلقة_74:
ماريا: واش هذا سمير؟
سارة: شفتي يبوركلي وجه الشر شغل ماصار والو..
ماريا: والله تحيري ..زعما لي كان يظل ياكل في روحو عليك ...صح معندوش قلب..
سارة دمعو عينيها: اليوم يبوركلي وغدوة يحط فوطوه مع كاش حمارة..
ماريا: سارة انا قتلك ابلوكيه وهني راسك منو ...توجعي في قلبك باطل.
سارة شافت في مريا عينيها مدمعين وبتحدي
سارة: نن منبلوكيهش كيما هو قلبو قاسح انا نقسحو ماكثر ..نعرف كيفاه ننتقم منو..
لحقتها ميساج من عند امير بلي عيطلها .
فتحت تليفون نحات رونفوا ورفدتلو وماريا مخلوعة .
سارة: الو امير
امير: واش كملتي قرايتك ؟ نخرجو..
سارة : ايه كملت...هاني جاية
امير: هاني نستنا فيك..
سارة: اوك منطولش عليك..
.وكوبات
ماريا: سارة منك بصح راح تروحي معاه ؟
سارة: ايه نروح نعيش حياتي كيما هو عايش حياتو ..والله ندير رايي فيه..
تعرفي قبل ما يروح واش قالي ...انا منحملش نشوفك معاه ..خلي نعذبو ...خليه يحس واش راني نحس..
ماريا تنهدت ...سارة مشات شوي وحبست شافت فيها متبسمة بقهرة..
سارة: مغلطش لي قالك الانسان قدما تكون تحبو تولي تكرهو.
ومشات.
لحقت عند امير طلعت معاه متبسمة من فوق قلبها ..لازم كوراج باش تتصرف عادي قدام امير وتتنتقم من سمير.
امير: واش عمري ..
سارة شافت فيه مخلوعة. من كلمة عمري..ماهيش موالفة تسمعها غير من عند سمير..
امير تبسم : واشبيك سرورة..نسيتي بلي رانا مخطوبين وراح نتزوجو..وراكي عمري وحياتي ..وعلابالك بلي عندي مدة وانا نحبك..
سارة هبطت عينيها.
امير : متخافيش كلش يجي بلعقل..وراح توالفيني ونوالفك..مع الوقت برك..اعطيني فرصة سارة برك..فرصة وحدة نحطك في عينيا..
سارة ساكتة مهبطة عينيها معرفتش واش تقولو ..
امير ديمارا شعل الغنا ويغني معاه..
وسارة تتخايل فيه سمير وتتفكر في يماتهم معاه
مقدرتش تشوف فيه شوف جيهة لكارو تفكرت بلي راح تنتقم من سمير وامير واش ذنبو ناويها بالحلال وجاها من الباب .وهي راح تلعب بيه كوسيلة لانتقام نتاعها تنهدت..عوجت فمها وقالت في قلبها هو عارف منحبوش وخطبني ايه يخلص امالا..ميهمنيش..
لحقو وين يفطرو ..سارة تتبسم بمكر هكا تنتقم منهم في زوج...زيرت على يديها فرحانة بعمرها واش راح دير...
امير: واش تاكلي ؟
شافت فيه وقاتلو : عصفيرين بحجر واحد.
امير: نعم ؟
سارة كانت غايسة مفاقتش تبسمت مفرفشة
سارة: هههههه. والو قصدي جاج ناكلو جاج..عندي مدة مكليتوش تاع برة..والبحر الهوا تاعو يجوع..منها تحويسة ومنها نفطرو..هكا قصدي..
امير: اممم جيبلنا جاج..وو..
امير يطلب فالماكلة وهي تسب في روحها قريب كشفاتو..ومن جيهة حاسة بقوة داخلها و راح تعطيهم طريحة في زوج
أنت تقرأ
ولاد الحومة
General Fictionجيتتتتتكم بعد غيبة طويلة مجيتش بيديا فارغين جبتلكم كرو فوووور من الواقع وطويلة 93 حلقة تحت عنوان " ولاد الحومة "
