ولاد الحومة

81

.#الحلقة_81:
بقات زينب تخمم في هدرة احمد زعما واش بيه واش صرالو ماشي عوايدو هكا..ضمت تليفونها ليدها وخايفة منو مفهمتش واش بيه وواش داراتلو..
شوية هكا جا احمد...
دخل قعد مع سمير حكاو شوي وسولو وعينو على الباب يستنى في زينب تخرج...وفطيمة فايقة بيه...ناضت راحت لعند زينب لقاتها قاعدة
فطيمة : زينب راجلك راهو هنا اخرجي ليه..
زينب: ااه...منخرجش خليني منو
فطيمة: هو حاب يشوفك يا تخرجي ليه يا يجيك هنا
زينب ناضت تسب : بففف واش يحوس عندي درك
فطيمة: حاب يشوفك..
زينب تلبس في حجابها وتهدر: نن قالي نخرجو..
فطيمة: فالليل هذا والبرد ؟!
زينب: ايه هاكي شو في
فطيمة: واش يحوس مقالكش؟
زينب: وانا فهمت ؟! درك نروح ونشوف
فطيمة. تنهدت: وسعي خاطرك بنتي وحاولي تتفاهمي معاه وتلقاي حل ..
زينب خرجت مفرفشة لحقت عند و هو وسمير
زينب: هاني واجدة.
احمد شاف فيها بنص عين..
احمد: امالا نخليك خويا سمير..
سمير: بالسلامة اتهلا.
....
خرجت زينب لابسة مونتو ومكمشة فيه مالبرد..طلعت فالطونوبيل..وهو ديمارا بالسكات.
زينب ساكتة ومقلقة تستنى فيه ينطق وهو ساكت ...تقلقت شافت فيه..
زينب: خير؟ علاه حوست عليا.
احمد:جبتك باش نهدرو.
زينب: واش نهدرو؟
احمد: على مشكلتنا لوقتاش نبقاو هاك؟ شهوور وانا وحدي ملي مات الطفل ربي يرحمو ونحاول فيك راسك خشين محبيتيش تصبري معايا وتوقفي معايا.
وين راه وعدك ليا قبل الزواج بلي تكوني معايا فالحلوة والمرة؟! ولا كلش كذب في كذب..
زينب: شوف اسيدي ...علاه نتا وفيت بوعودك باش تحوس عليا نوفي ؟؟
احمد مقلق: وشبي راستك..واش حابة نديرلك؟ .
زينب: قتلي نحطك في عينيا ونديرلك واش تحبي بصح نتا مدرتلي والو..كنت تخدم وجي ترقد هذا مكان وانا نبقى نعاني في داركم نهار كامل و ماشي حاس بيا ومتحوسش حتى تفهمني..
احمد عيط: واش حابة نديير..هدرت معاهم وفهمتهم ..وحتى نتي متسمحيش من حقك..
زينب: ايه نحوس على داري..فهمت ...ونتا معندكش امالا نتفارقو خير..
احمد حبس وتنهد وشاف فيها...
احمد:عندها الحق يما كي قاتلي زينب طماعة ومتحوسش عليك..
زينب تبكي: هاك شوف كيفاه تحرشك عليا...
احمد تكا على الكورسي وشاف فيها..
احمد: اعطيني تليفونك ..
زينب مخلوعة: ااه؟ علاه؟
احمد : تليفونك..
زينب: مجبتوش..
جبد احمد الصاك بقوة وخرجو..وهي خايفة وتترعد...
زينب: واش راح دير احمد ؟!!
احمد فتح تليفونها دخل للفايس ديراكت فتحو ...لقا ليميساج من عند راجل فتحهم يقرا فيهم وقلبو يضرب فيه حس العرق نشو مسحو بيدو وزينب تبكي وتشهق بالبكا...
احمد يقرا فيهم مقدرش يركز على الهدرة غير انو يقوللها توحشتك وحاب نشوفك..
هذي كانت صاعقة بالنسبة ليه....غمض عينيه مقدرش يكمل يشوف ...مسح على وجهو ...وفتح الطونوبيل ونزل فالشتا هذيك وتليفون في يدو...حس قلبو يحرق فيه ...دموعو نازلين جمر...

جات ليه زينب تبكي وتقولو آمي برك والله مكان والو بيناتنا....وهو ماهوش يسمع فيها كامل...بقاو ذكرايت يجو في راسو كيفاه هو يخدم ويشقا باش يوفرلها دارها وهي تخون فيه ...ضحك باستهزاء حس روحو حمااار وضحكت عليه وهو يساعف فيها...دار ليها وتبسم بقهرة..
وخبط التليفون على لرض كسرو وضربو برجلو بحقد ويكسر فيه ..وساكت...
زينب خافتو جبدت روحها عليه ويديها على وجها شوف فيه...
زينب: سمحلي احمد والله آمي برك .مكان والو بيناتنا وكان ينصح فيا على المشكلة تاعنا...ماشي كيما فهمت نتا....علابالي غلطت بصح نوعدك والله منزيد نهدر معاه نوعدك....
احمد شاف فيها: راكي مطلقة...
وطلع فالطونوبيل ...
كلمة نزلت كي الصاعقة على زينب فشلت مقدرتش توقف...احمد حبيبها طلقها ...صح كانت تحوس تطلق بصح ماشي بالطريقة هذي...حست روحها رخيسة وخاينة متسواش...
احمد فالطونوبيل غايس وساكت ..مشوكي منها...
طلعت معاه شوف فيه ...جات تهدر سكتها ..بيدو...
زينب دارت جيهة الكارو تبكي ..وهو ساكت طريق كامل حتى لحقو لدارهم....
بقات شوف فيه...وهو مشافش فيها كامل...
نزلت مذلولة وهو ديمارا ديراكت ...بعد شوي وحبس مقدرش ...حط راسو على الفولو ويبكي مقهور وموجوع ...مرتو خانتو وطعناتو في ضهرو...ملقاش حتى الكلمات لي يقولهملها...فضل يسكت ويقتلها بسكوتو....
احمد: علااه يازينب حراام عليك تقتليني هااك حراام عليك...طعنتوني كامل لا ختي لا نتي ...مرحمتونيش...عله ياربي علااه واش درت في حياتي انا باش شاقي هاك وديما عاكستلي....