ولاد الحومة

36

.#الحلقة_36:
رجعت سارة مع سمير للدار..
سمير حبس وشاف فيها..سارة خزرت فيه مستغربة ..
سمير: كون جات الدنيا دنيا كون راكي مرتي منهبطكش هنا..نديك للدار
سارة تبسمت : كي اليوم نشالله..
سمير: سرورة ..كون نخطبك تقبلي بيا ؟؟
سارة حشمت وشافت فيه : هذا ماشي سؤال ..شكون اصلا راجلي من غيرك
سمير تنهد وشاف فيها
سمير: انزلي ...انزلي خيرمن نكمل بيك للدار.
سارة: هه خااه مهبول راني نازلة..
سارة جات نازلة شدها من يدها...شافت فيه .مستغربة..
سمير: اصبري نوصلك
سارة : وين توصلني ؟؟ كيما جيت وحدي نروح وحدي..
ونزلت..
سمير بقا يشوف فيها حتى رجعت متبانش ...تمنا كون الضروف كانت خلاف هاك وراهو خطبها ويوصلها حتى لباب الدار..بصح الله غالب ..لازم يصبر ولا يلقا حل في اقرب وقت..
..
لحقت سارة للدار وسمير راح لشغلو
..
جازو يمات وهوما مرة يدوسو ومرة يرجعو..كل نهار وكيفاه..
...
وحد النهار .سمير رجع للدار فليل مالخدمة لقا راجل ختو ثم..
سمير: خويا احمد واشراك؟؟
احمد: لباس..هانا كيما بغا ربي..
سمير قعد كانو فالصالو ن قاعدين..
فطيمة: مزية جيت وليدي نحطلكم تتعشاو كيف كيف..
احمد: مكلاه انا ضرك نروح...
فطيمة: بووه وين تروح وليدي ..اقعد تتعشا هذاوين جيت..
...
فطيمة خرجت راحت عند زينب
فطيمة: اخرجي حطي العشا لراجلك جا يشوفك..
زينب هبطت عينيها..
فطيمة: يا بنتي هو واش ذنبو المخلوق ..واش حبيتي يديرلك ..الله غالب عليه الضيق راهو كيما الناس..
زينب: يما افهميني مانيش حابة نشوفو علابالي يضحك عليا بزوج كلمات ويغيضني ونروح معاه كيما كل مرة..
فطيمة: يا بنتي ربي يهديك راكي عروسة جديدة ...ومصبرتيش ...لازم تصبري..
زينب: واش مالتعرويس تهدري عليه ..عايشة دار غاشي لا لبست كي الناس ولا خرجت كي الناس حتى الدار وضيقة نحس روحي مخنوقة..وزاد كملي حتى الوحم..مانيش حابة نشوفو..
فطيمة: يا بنتي علابالي بصح هو جا يشوفك مجاش يشوفني ..هيا اخرجي شوفيه..خطيك مالهبال..
زينب : كي يتعشاو ندخل منحملش ريحة الماكلة .
فطيمة: كيما تحبي..
.
خرجت فطيمة حطتلهم يتعشاو..
احمد كلا شوي وقاللهم شبعت
فطيمة: مكليت والو وليدي..
احمد: كليت لي كتب مانيش جيعان كليت برا..
فطيمة: بصحتك وليدي
احمد: يسلمك..
احمد حشم حاب يشوف زينب وفطيمة حست بيه..
احمد: احم..زينب وين راهي ؟! راقدة؟!
فطيمة: لالا راهي فالبيت ..متقدرش جي هاك عارف..روح شوفها في بيتها..
احمد: ايه نشوفها ونروح..
فطيمة وصلاتو لبيتها ورجعت .
.
سمير ياكل ويشوف في يماه
سمير: شفتي يما علاه قتلك منحبش نتزوج زواج لميزيرية..شفتي بنتك..
فطيمة تنهدت معرفتش واش تهدر.
فطيمة: واش راح دير حنا مكناش عايشين هاك..صبرنا وكبرنا ولادنا بالشي لي كان..
سمير شرب الما وناض..
سمير: هذيك بكري ضرك الناس تبدلت والمصروف كثر والواحد يشري راحة بالو خير .
ورفد روحو وخرج يتكيف .
..
احمد دخل عند زينب .
شافتو هبطت عينيها نزلو دموعها حشمت منو كي مخرجتش ليه حتى جا هو ليها..
احمد تبسم كي شافها
احمد: هاني جيتك يالالة يالي راكي تتهربي مني ههه
زينب: الله غالب راك عارف بلي راني مريضة وماشي غرضي..
احمد: علابالي ..وليدي راهو متعبك بزااف..بصح انا توحشتك ..
زينب: مام انا والله بصح هاك شوف ..
احمد: معليش عمري فترة و جوز وترجعي لدارك..
زينب: نوو .ياك قتلك غير لثم منرجعش .مزلت عروسة وانا راني غير فالمشاكل مع داركم..
احمد: يابنت الناس خافي مولاك واش حابتني ندير..نصبرو حتى يفرج ربي..
زينب مشنفة محبتش تهدر..
احمد: متوحشتيش دارك..والله خليتيهالي ضلمة الدار كرهتها كي مراكيش فيها.
زينب: احمد...شوفلنا كرية ونعيشو بالقليل انا منقدرش نرجع للدار هذيك..
احمد تقلق: زينب ياك علابالك بلي انا نخدم على خياتي ومنقدرش نخليهم..حتى نزوجهم..
زينب: خياتك خياتك....بففف كرهولي حياتي..
احمد: ونرميهم انا خياتي ..ياك فلول قبلتي ..واش بانلك ضرك ؟؟
زينب ناضت تجري ترد ..
واحمد رفد روحو وخرج