#لاتؤذوني_في_عائشة

الفصل الثالث والثلاثون (حقيقة مره)

بعتذر عن التأخير بس انا حقيقي زعلانة جدا على الولد اللي اتقتل ومليش اي نفس لكتابة بسبب الظلم ده ارجوا من الجميع انكم تدعوله بالرحمه

بسم الله الرحمن الرحيم

هل ينتصر الخير؟؟

تعددت الإجابات ومازال الجواب الذي يرضي قلوبنا مجهول.... تارة نشعر أن سلاح الخير يهزم أعتي حصون الشر وتاره آخرى تسقط سماء أحلامنا علينا..... كان لي جناحان أحلق بهما أينما شئت وآتيت أنت واقتلعتهم مستبدلا إياهم بآخرين... نعم مازلت أطير ولكن في حدودك انت بشروطك انت بموافقتك انت .

انت...أكبر عقبة في حياتي... كلما أخذت خطوة لكي ابتعد هرول القلب ناحيتك وكأنه قلبك انت وليس قلبي.

ولكن لن يستمر الوضع... إذا كنت تعشق فااعلم ان مائي ستطفيء نارك عنوة ياصاحب القلب المظلم.

وينتصر الخير. 💜

_ادي ياستي اتنين اسبريسو يعدلوا الدماغ.

هتف بها "علي" وهو يتقدم من "دنيا" الجالسه على فراش والدتها المريضة في ذلك المشفي... بينما سحب هو مقعد وجلس مقابلها... ابتسمت بهدوء وهي تتناول منه ذلك الكوب ووضعته جانبا وهو يهتف : يلا بقى تحكيلي كل حاجه.

هزت رأسها وهي تتنهد بتعب ثم بدأت في الحديث قائلة : رضوان.... دايره كبيره اووي متعرفش اولها فين وآخرها منين .... مامي قالتلي ان اول ما رضوان اتجوز اول جوازة ليه.... مخلفش فراح هو ومراته يكشفوا... طلعت هي سليمه بس هو كان عنده مشكله تمنعه من الخلفه وده اللي الدكتور قالهوله وبرضو قاله ان المشكله دي هتتحل بالعلاج..... ساعتها مراته ساومته إما يكتبلها شركه او تفضحه في كل مكان وساعتها اسم "رضوان عبد الحي" كان لسه بيشق طريقه وضربه زي دي كانت هتهزه جامد....بس "رضوان" رفض يكتبلها الشركه وضربها علقة موت وطلقها ....

تابعت "دنيا" بسخرية مريره: طبعا بعد ما طلقها فضحته في كل مكان الصحافة والفضائيات وخد عندك بقى... فالباشا علشان يكدبها طلع قال انه كان متجوز اولها وعنده بالفعل بنت عمرها اربع سنين اسمها "تمارا"... وده يثبت كدبها.... طبعا كان واكل دماغ الناس بالأعمال الخيرية اللي بيعملها وغيره فالكل صدقه ماانت عارف بقى اصل المصريين عاطفيين شويه...بعدها بفترة صغيره اتجوز واحده تانيه وخلفك.

مط " علي" شفتيه بعدما نطقت هذا وقال بألم: تمارا دي كمان مطلعتش اختي... طلعت اخت حامي العمري واسمها الحقيقي زينه وهو كان خاطفها منهم.

هتفت دنيا هذه المره وهي ترتشف من كوبها: الصدمه بقى ان امي هي نفسها اللي فضحت رضوان وقالت انه مبيخلفش وعملت كل الليله دي علشان العشم كان واكلها اووي ومفكره انه هيديها الشركه زي ماطلبت... وكانت برضو هي اللي مظبطه مع الدكتور يفهم رضوان انه عنده مشكله علشان تقدر تضغط عليه... بس لما طلقها وماادهاش حاجه كانت حامل فيا اصلا... يعني رضوان معندوش اي مشكله.