#لاتؤذوني_في_عائشة

الفصل الأربعون الجزء الأول (تبات ونبات)

الفصل الأربعون الجزء الأول (تبات ونبات) ❤

#لاتؤذوني_في_عائشة٢
صباح الفل يا بني ادمين ✨😂
عايزة بس اقول حاجة قبل الفصل في ناس جديدة دخلت تتابع الرواية هنا او على واتباد وفي كومنتات سخيفة جدا الصراحة بتقابلني مش تعبير عن الرأي في العمل او سرد خطأ فيه لا سخرية منه.... وانا مش عارفة بصراحة عمل حضرتك داخل تسخر منه بتضيع وقتك وتقرأه ليه؟.... استغل الوقت في حاجة مفيدة افضل ليك.... انا بعتذر بس اي كومنت من النوعية دي صاحبه هيتعمله بان سواء هنا او واتباد لأن النوع ده من الناس ممكن يتسببلي في اني اقعد يومين قافلة من الرواية ومن كل حاجة.
ثانيا بقى التفاعل يا فراخ يا نايمين 😂

اتقوا ربنا فيا شوية كفاااااية بقى 😭💔
هسيبكم مع الفصل ولضميركم 😂

بسم الله الرحمن الرحيم

مكتوب للغايب يوم هيعود
مكتوب للغُصن يضُم ورود
من حُضن الليل فَجرَك مولود
في تبات ونبات جاية الحواديت.. 💙

(وتقع وتقوم_ مسار إجباري) ❤✨

طفل مذنب... يحاول التكفير عن خطأه ولكن الخجل كساه.... كان هذا حالها وهي تفكر كيف تعتذر له... قربت "نيرة" عينها من عين الباب السحرية وجدته يفتح باب الشقة المقابلة فأخذت نفس عميق وفتحت الباب مسرعة.... رمقها باستغراب رافعا حاجبيه فضغطت على شفتيها بحرج وهي تنطق بصعوبة: عمر عايزة اتكلم معاك شوية.

_مش فاضي.
كان رده مختصر، بارد، اشعل فتيل غضبها ولكنها تسلحت بالصبر فلقد أخطأت في حقه: يعني ايه يا عمر مش فاضي... احنا المفروض فرحنا بكره لو واخد بالك... والخمس دقايق دول مش هيعطلوك عن مشاويرك معاك اليوم بطوله.

تنهد بضيق رامقا إياها بعتاب... فخرجت وأغلقت الباب خلفها وسط اندهاشه وجلست على الدرج تقول بمزاح: وادي قعدة.

أخفى ابتسامته وهو يجلس على درجة السلم التالية للجالسة عليها وهو يقول ببرود: عايزة ايه؟

طال صمتها فاستدار فتوجه بالنظر إليها ليجدها تبكي بصمت فسألها بقلق ظهر عليه جليا: ايه يا نيرة مالك... في حاجة؟

هزت رأسها تقول بتأكيد وهي تتابع نحيبها: أنا مش عايزة اتجوز.

كان يحاول تجميع الجملة في عقله ولكنه لم يستعب فردد باستنكار: نعم ياختي!

_حاسة اني مش مؤهلة نفسيا لده.
قالت جملتها ببراءة وهي تمسح دموعها

رمقها باتهام وهو يقول بضجر: بت انتِ شوفتِ مسلسل أمينة خليل وجاية تطبقيه عليا صح؟.... ومفكرالي نفسك بقى اللي قادرة على التحدي وعلى المواجهة مش كده!.... فوقي يا نيرة انتِ لما حد بيخبط على الباب بتواجهي صعوبة في فتح الباب... يعني التحدي بتاعك ده في فتح الباب.

مطت شفتيها بغيظ وهي تزيل المتبقي من دموعها مرددة: امينة خليل ايه! ... وبعدين فوق يا بابا احنا كاتبين الكتاب
همست متابعة بتصنع الضيق: يعني مبقاش ينفع اجري خلاص.