The Dark Nights in the Rain

-4-

အပိုင်း(၄)_မိုး​ရေထဲကစန္ဒရားသံ
 
(၂)နှစ်​ခန့်​ကြာပြီး​နောက်​
(၃) ရက်၊ ဇူလိုင်လ၊ (၂၀၀၆)ခုနှစ်။

​တကျီကျီ​အော်​မြည်​နေကြသည့်​ ကျေးဌက်​တို့ အိပ်​တန်းပြန်​နေကြသည်​။​ သိမ်မွေ့​နေသော လေနု​အေးတို့​ကြောင့် သစ်ပင်ပန်းမန်​တို့သည် အိ​န္ဒြေကြီးစွာဖြင့်​ ငြိမ်​သက်​နေကြသည်​။​ ပုဇွန်​ဆီ​ရောင်​သမ်း​နေသည့် နေရောင်​ခြည်​တို့ကို ထုတ်​လွှတ်​လျက်​ရှိသော သူရိယနေမင်းကြီးသည်​ အ​နောက်​ကျွန်းကို​မေးတင်​ကာ ဝင်​စပြု​နေ​ချေပြီ။​ နေဝင်​လုဆဲဆဲ ဆည်းဆာသည်​ ထူးခြားစွာလှ​သွေးကြွယ်​နေသည်​။

Hemel မြို့နယ်​ရှိ Moonlight ရပ်​ကွက်​လေးသည်​ ဆိတ်​ငြိမ်​ရပ်​ကွက်​လေးတစ်ခု ဖြစ်​သဖြင့်​ လူ​ခြေတိတ်​လှသည်​။ Lotus လမ်းသွယ်လေး​ပေါ်ရှိ မ​ဟော်​ဂနီ​ရောင်​ သုတ်​လိမ်းထား​သော သစ်​လုံးတို့ဖြင့် စည်းရိုးခတ်​ထား​သည့်​ ခြံလေးတစ်ခြံ တည်ရှိ၏။ ၄င်း၏အတွင်းတွင်​ တောင်အရပ်​ကိုမျက်​နှာမူကာ ​ဆောက်​လုပ်​ထား​သော မိုးပြာ​ရောင်​သုံးထပ်​တိုက်​အိမ်​လှလှ​လေးရှိသည်​။ အိမ်​လေး၏​ ဘေး​ဘက်​တွင်​ ပန်း​သွေးရောင်​တို့ဖြင့် လှသွေးကြွယ်နေသော ကျူးလစ်ပန်းခင်း​လေးတစ်​ခု ရှိသည်။

ထိုပန်းခင်း​လေးထဲတွင်​ အသက်​လေးဆယ့်ငါးနှစ်​ဝန်းကျင်​ခန့် လူကြီးတစ်​ယောက်​ မြေတူးဆွ​လျက်​ရှိ​နေသည်​။ ထိုစဉ်​ခြံလေးအတွင်းသို့ အသက်​ဆယ့်လေးနှစ်​အရွယ်​ ယောက်ျား​လေးတစ်​ဦး ဝင်လာသည်။ အနက်ရောင် ကျောပိုးအိတ်လေးကို လွယ်​လျက်​ အသား​ရောင်​ဘောင်းဘီရှည်​နှင့်​ အညို​ရောင်​ကုတ်​အင်္ကျီကို ဝတ်​ဆင်​ထားပြီး နက်မှောင်​တဲ့ဆံပင်​တိုတို့ကို သပ်​ရပ်​စွာ​ဘေးခွဲဖီးထားသည်​။

"သား သော်​လေး... ဒီ​နေ့ နောက်​ကျလှချည်​လား"

ဦး​နေမျိုးပိုင်​ ပန်းခင်းထဲမှာ ​မြေသြဇာဖြည့်​နေရင်း​ ခြံထဲပြေးဝင်လာသော သားဖြစ်​သူကို လှမ်း​မေးလိုက်​သည်​။

"သား အတန်းသန့်​ရှင်း​ရေး လုပ်​နေရလို့ ဖေ​ဖေ"

​သော်​လေး အမည်ရှိ လူငယ်လေးသည် ပြုံးရွှင်​စွာဖြင့် အ​ဖြေပြန်​ပေးလိုက်​ပြီး အိမ်​ထဲ​ပြေးဝင်​သွားကာ မီးဖို​ချောင်​ထဲဟင်းချက်​နေတဲ့ ​မိခင်​ဖြစ်​သူကို​ နောက်​ကနေ သိုင်းဖက်​ထားလိုက်​သည်​။