The Dark Nights in the Rain

-6-

အပိုင်း(၆)_မိုးရေထဲက ဧည့်သည်

မှိန်​ဖျော့ဖျော့အလင်း​ရောင်​အောက်​က စွန့်​ပစ်​ထားတဲ့ စက်ရုံ​ဟောင်းကြီး၏ ဝင်းအတွင်းတွင်​ ကားအနက်​သုံးစီး ရပ်ထားသည်​။ လူ​နေအိမ်​ခြေ​များနှင့်​ အတန်​ငယ်​အလှမ်း​ဝေးကွာ​သည့်​ နေရာဖြစ်​သော​ကြောင့်​ ညအချိန်​သည်​ တိတ်​ဆိတ်​ငြိမ်​သက်​လို့​နေသည်​။​ ငြိမ်​သက်​နေတဲ့​လေထု​ကြောင့်​ ရာသီဥတုက အိုက်​စပ်​စပ်​ ဖြစ်နေသည်။ တောစပ်​နှင့်​နီးသဖြင့်​ ပိုးကောင်​တို့ တကျီကျီ​အော်​မြည်သံကိုလည်း ကြား​နေရ​သေးသည်​။

စစ်​ပိုင်​တစ်​ယောက်​ ပီ​ကေကို တ​ဖောက်​ဖောက်မြည်အောင်​ဝါးရင်း ကားအ​ရှေ့ဘန်​ဗာ​ပေါ်​ခြေချိတ်​ထိုင်​နေသည်​။ အိုက်စပ်​စပ်​ရာသီဥတု​ကြောင့်​ သူ့စိတ်ကမကြည်​လင်​လှပေ။ နဖူး​ပေါ်ဝဲကျ​နေသည့် မီးခိုး​ရောင်​ဆံနွယ်​တို့မှာ​ချွေးစက်​တို့က တွဲခိုလျက်​ရှိနေကြသည်။ လက်​ပတ်​နာရီကို တစ်​ချက်​ငုံ့ကြည့်​လိုက်​တော့ (၁၀:၅၀) ကို ညွှန်ပြလျက်ရှိနေသည်။ ချိန်းဆိုထားသည့်အချိန်​ကိုရောက်​ဖို့ ဆယ်မိနစ်​သာလို​တော့သည်​။

ခပ်လှမ်းလှမ်းမှာ​ ဆေးလိပ်​သောက်​နေတဲ့ မင်းခန့်က သူ့ဆီကို​လျှောက်​လာခဲ့ပြီး​ဘေးမှာလာထိုင်​ပြီး ခပ်တိုးတိုး စကားဆိုသည်​။

"စိတ်​ပူမ​နေနဲ့"

"ဘယ်​သူက စိတ်​ပူ​နေလို့လဲ"

စစ်​ပိုင်​က မျက်လုံးလှန်ကြည့်ရင်း ခပ်​အေး​အေးပြန်​ဖြေ​တော့​ မင်းခန့်​က မဲပြုံးပြန်​ပြုံးပြသည်​။

"ငါကလည်း မင်း​ကြောက်​နေမှာစိုးလို့​ပြောတာပါ"

ရွှတ်နောက်နောက်ပြောရင်း လျှာထုတ်​ပြ​နေတဲ့ မင်းခန့်​ကို စစ်​ပိုင်​ဂျိုကြည့်​ကြည့်​လိုက်​မိသည်​။ မင်းခန့်က စစ်ပိုင်ကို စိတ်ဆိုးအောင် စနောက်ရသည်ကို အလွန်သဘောကျဟန်တူသည်။ သူတို့နှစ်ယောက်သည် အမှန်တကယ်ပင် ကြောင်နှင့်ကြွက်ကဲ့သို့ပင် ဖြစ်ကြသည်။

ထိုစဉ်​ ဝင်းထဲကိုကားလေးစီး​ မောင်းဝင်​လာ​သော​ကြောင့်​ သူတို့နှစ်ယောက်​လုံးအာရုံ​ပြောင်းသွားသည်​။ ထိုကားလေးစီးမှာ သူတို့ကား​တွေနှင့် မျက်​နှာချင်းဆိုင်တွင် လာရပ်​ကြသည်​။ ထို့​နောက်​အနက်​ရောင်​ဝတ်​ထား​သော လူဆယ့်ငါးယောက်ထက်​မနည်း ကား​ပေါ်မှဆင်းလာကြသည်ကိုကြည့်ရင်း စစ်ပိုင် မျက်မှောင်ကြုတ်လိုက်မိသည်။ ထိုလူ​တွေနဲ့ သူတို့အဖွဲ့ မျက်​နှာချင်းဆိုင်​ရပ်​လိုက်​ကြ​သည်အထိ စစ်​ပိုင်​က​တော့ ထိုင်​နေရာက မထ​သေးပေ။