The Dark Nights in the Rain

-11-

အပိုင်း(၁၁)_ မျက်​နှာများတဲ့ ကံကြမ္မာ

(၂၉) ရက်၊ သြဂုတ်လ၊ (၂၀၁၇) ခုနှစ်။

Paradise မြို့လယ်​ခေါင်​ရှိ Verleden ပြတိုက်​၏ အပေါ်ဆုံးထပ်​တွင်​ အခမ်းအနားတစ်​ခု ကျင်းပလျက်​ရှိသည်​။ ထိန်​ထိန်​ညီးနေသည့်​ မီးရောင်​တို့အောက်​က ရွှေဝါရောင်​ခန်းမကြီးမှာ တဖိတ်​ဖိတ်​ တောက်​ပလျက်​ရှိသည်​။ ငြိမ့်ညောင်းသာယာလှသည့် တယောသံကြားတွင်​ ဝိုင်​ခွက်​ချင်းတိုက်​သံနှင့်​ ရယ်​မောသံတစ်ချို့က မြှပ်​ချည်​ပေါ်ချည်​ဖြင့် ထွက်ပေါ်လျက်ရှိနေသည်။ သပ်​ရပ်​သားနားလှစွာ ဝတ်​စားဆင်​ယင်​ထားကြသော အထက်​တန်းလွှာ လူကြီးလူကောင်းအပေါင်းတို့ ဟန်​ပန်​အပြည့်​ဖြင့်​ သွားလာလှုပ်​ရှားလျက်​ရှိနေကြသည်​။

ထိုခန်းမထဲသို့ အနောက်​တိုင်းဝတ်​စုံအဖြူကို သေသပ်​စွာဝတ်​ဆင်ထားပြီး အနက်​ရောင်​ဆံပင်​ကို နောက်​လှန်​ဖီးထားသည့်​ ခန့်ညားချောမောလှသည့်​ အမျိုးသားတစ်​ဦး ခန်းမအတွင်းသို့ ဝင်​ရောက်​လာသည်​။ ထို့ပြင်​ သူ၏ဘေးရှိ နီညိုရောင်​ဆံနွယ်​ရှည်​တို့ကို ခပ်​မြင့်​မြင့်​ချည်​ထားပြီး အဖြူရောင်​အနောက်တိုင်းဝတ်စုံကို ဝတ်​ဆင်​လျက်​ ကြယ်​ပွင့်​တွေလို တောက်ပနေတဲ့ မျက်​ဝန်းတွေနဲ့ ချောမောလှပလွန်းသည့်​ အမျိုးသားကို လက်​ချိတ်​ထားလေသည်​။

ထိုနှစ်ဦးမှာ ထွဋ်​ခေါင်​နှင့်​ရှိန်းတို့ စုံတွဲဖြစ်သည်။ ခန်းမထဲရှိ ဧည့်​သည်​တော်​တွေရဲ့ စူးစမ်းလိုသောအကြည့်​က သူတို့နှစ်​ဦးထံ စုပြုံကျရောက်​လာသော်​လည်း ဂရုစိုက်​ခြင်း အလျင်းမရှိကြပေ။

"Mr. Alex မတွေ့ရတာကြာပြီဗျာ..."

အသက်(​၅၀)ခန့်​ အမျိုးသားကြီးတစ်ဦးက ထွဋ်​ခေါင်​ကို ကြိုဆိုနှုတ်​ဆက်​လေသည်​။ ခဏအကြာတွင်​သူတို့နှစ်​ဦးအနီး လာရောက်​နှုတ်​ဆက်​ကြသူ မိတ်​ဆက်​ကြသူများနှင့်​ ဝိုင်းဝိုင်းလည်​သွားတော့သည်​။

တစ်​ဖက်​တွင်​လည်း နေဘုန်းခတစ်​ယောက်​ခန်းမထဲတွင် ယောင်​လည်​လည်​ဖြစ်​နေရသည်​။ ထိုလူကြီး ရောက်နေသည်ဆိုတာကို ကိုယ်တိုင်မြင်တွေ့ပြီး အတည်ပြုချင်သဖြင့်သာ အန်တီလေးနှင့် လိုက်ခဲ့ခြင်းဖြစ်သည်။ အရင်ကတည်းက ဒီလိုစီးပွားရေးဆိုင်ရာ အခမ်းအနားတွေကို ဝေးဝေးရှောင်တတ်သည့် နေဘုန်းခ အတွက် အသိအကျွမ်းမရှိသည်မှာ မဆန်းလှပေ။