အပိုင်း(၃၀)_မိုးရေထဲက စန္ဒရားသံ
ညနတ်ကြီးစိုးသည့် အချိန်ကာလဝယ် မိုးက သည်းသည်းမဲမဲ ရွာသွန်းလျက်ရှိသည်။ တစ်ချက်တစ်ချက်တောက်ပလာတဲ့ လျှပ်စီးတို့နှင့်အတူ မိုးကြိုးတို့က ကျယ်လောင်စွာ ထစ်ချုန်းလျက်ရှိသည်။ ပတ်ဝန်းကျင်တစ်ခွင်လုံးတွင် စိုစွတ်မှုနှင့်အေးစက်မှုတို့က အပြည့်အဝ နေရာယူထားလျက်ရှိသည်။
မီးရောင်မှိန်ထားသည့် အိပ်ခန်းတစ်ခုအတွင်းဝယ် လက်ထဲမှာ ဝိုင်ခွက်ကိုကိုင်လျက် မှန်ပြတင်းပေါက်ရှေ့ မတ်တပ်ရပ်နေသူ တစ်ဦးရှိသည်။ တစ်ချက်တစ်ချက် လင်းခနဲလက်သွားတဲ့ ခရမ်းရောင် လျှပ်စီးအောက်မှာ မြင်ရတဲ့ ထိုလူ၏ မျက်နှာထက်၌ ကြေကွဲဝမ်းနည်းမှုတို့ စွန်းထင်းလျက်ရှိလေသည်။
"မင်းသတိရလာတော့မှာပဲ"
ထွဋ်ခေါင် ဝမ်းနည်းစွာဖြင့် တစ်ကိုယ်တည်း တီးတိုးစကားဆိုမိသည်။ လွန်ခဲ့သည့်ရက်က တွေ့စဉ် ရုတ်တရက် စစ်ပိုင် မေးလာသည့် မေးခွန်းက သူ့နားထဲ တဝဲလည်လည်ဖြစ်လို့နေသည်။
'အစ်ကိုသိလား၊ သော်လေးဆိုတာ ဘယ်သူလဲ...'
ထွဋ်ခေါင်အတွက် စစ်ပိုင်သည် တစ်သက်တာအတွက် အရိပ်မည်းတစ်ခုဖြစ်သလို တစ်သက်တာအတွက် ဆုလာဘ်လည်းဖြစ်သည်။ သို့သော် အရာရာသည် ဆန္ဒရှိသည်နှင့် ဆန့်ကျင်စွာ ဖြစ်ပျက်လာလေ့ရှိသည်။ ယခုတော့ ထိုဆုလာဘ်သည် ကျိန်စာအဖြစ်ပြောင်းလဲဖို့ နီးကပ်လာပြီဖြစ်ကြောင်း ထွဋ်ခေါင် သိနေသည်။ ထွဋ်ခေါင် မျှော်လင့်ထားပြီးဖြစ်သည့် မရောက်ချင်ဆုံးနေ့သည် နီးကပ်လို့လာချေပြီထင်ရသည်။
"မင်းမုန်းပစ်လို့ရတယ် ပိုင်လေး၊ မုန်းပစ်လိုက်... ဒီလူယုတ်မာအစ်ကို့ကိုလေ"
တစ်ကိုယ်တည်း တီးတိုးပြောရင်း မျက်လုံးတို့ မှိတ်ချလိုက်မိတော့ မျက်ရည်စတို့ စီးဆင်းလာကြသည်။
"တကယ်ဆို မင်းကလည်း အဲ့ဒီလူယုတ်မာသားပဲ..."
ထွဋ်ခေါင်စိတ်ထဲကနေပြောရင်း နာကျင်စွာရယ်လိုက်မိသည်။ အမုန်းတရား၏ တစ်ဖက်ကမ်းတွင် ပိုင်လေးအား တန်ဖိုးထားသော ချစ်ခြင်းမေတ္တာတရားတို့ အမှန်တကယ်ရှိကြောင်း ထွဋ်ခေါင်ကျိန်ဆိုဝံ့ပါသည်။ သို့သော် ပိုင်လေးသည် အမှန်တရားတို့ အားလုံးသိသွားသည့် တစ်နေ့၌ ထိုမေတ္တာတရားကို မြင်နိုင်ပါဦးမလား ဟု ထွဋ်ခေါင်စိုးရိမ်နေမိသည်။ အတွေးတို့နှင့်အတူ ထွဋ်ခေါင် နာကျင်ကြေကွဲစွာဖြင့် ပင့်သက်ရှိုက်မိသည်။
VOUS LISEZ
The Dark Nights in the Rain
Fiction générale[Unicode Ver] ကံဆိုးမှုတွေနဲ့ နာကျင်မှုတွေ မိုးရေစက်တွေနဲ့အတူ လိုက်ပါလာခဲ့ကြလေသလား.....။ မိုးစက်ခတဲ့ ညတွေမှာ မှောင်မိုက်ခြင်းတွေ အစပြုခဲ့တယ်။ ကျီစားတတ်တဲ့ ကံကြမ္မာကြောင့် မိုးမှောင်ကျခဲ့ကြတဲ့ သူတို့ဘဝတွေ ဘဝရဲ့ရောင်နီပျို့ချိန်ကို ရောက်တဲ့အထိ လောကဓံ...
