The Dark Nights in the Rain

-5-

အပိုင်း(၅)_မိုးညတို့၏ ဒုတိယ​မြောက်​နိဒါန်း

(၁၁)နှစ်​ခန့်​ကြာပြီး​နောက်...။         
(၂၉)ရက်၊ ဇူလိုင်လ၊ (၂၀၁၇) ခုနှစ်။

မဟူရာရောင်ည​ကောင်းကင်​သည်​ တိမ်​ကင်းစင်​လျက်​ရှိပြီး​ လစန္ဒာ၏ ​အေးမြ​သော​ရောင်​ဝါတို့က ​မြေကမ္ဘာကို လွှမ်းခြုံထားသည်​။​ လေနု​အေးကလည်း ​ဖြည်းဖြည်းမှန်​မှန်​ တိုး​ဝှေ့တိုက်​ခတ်​လျက်​ရှိနေသည်​။ လျှပ်​စစ်​မီး​ရောင်​အောက်​က အနက်​ရောင်​လမ်းမကြီး​များသည် လှုပ်ရှားသွားလာကြသူများဖြင့်​ စည်​ကားလျက်​ရှိသည်​။

Paradise မြို့အစွန်​ရှိ Lupus အမည်​ရှိ​သော ဤရပ်​ကွက်​သည်​ ဒုစရိုက်​သမားတို့​မွေ့​ပျော်​ရာ စားကျက်​တစ်​ခုဖြစ်​သည်​။ မ​ကောင်းသည့်​အ​ငွေ့သက်​တို့ လှိုင်​လှိုင်​ထရာ ဤ​နေရာသည်​တရားမဝင်​ လောင်းကစားရုံများ၊ အရက်​ဆိုင်​များ၊ ဇိမ်ခန်းများဖြင့် အမြဲတ​စေလူစည်​ကားလျက်​ရှိသည်​။

ရပ်​ကွက်​၏အစွန်​ပိုင်းသည်​ ဆိပ်​ကမ်း​နှင့်​ဆက်​လျက်​ရှိပြီး ကုန်​လှောင်​ရုံအများစု တည်​ရှိရာ​နေရာလည်းဖြစ်​သည်​။ ထိုနေရာထဲ၌ ကုန်​လှောင်​ရုံအမှတ် ​D-13 ဟု ဆိုင်းဘုတ်တပ်ထားသည့် ကျယ်​ဝန်း​သော ခြံကျယ်​ကြီးအတွင်းတွင်​ ပေ(၂၀)ခန့်​မြင့်​ပြီး အနီ​ရောင်​ခေါင်​မိုး မိုးထား​သော ဂို​ဒေါင်​ကြီးတစ်​ခုသာ ခပ်​ထီးထီးတည်​ရှိ​လေသည်​။

ထိုဂို​ဒေါင်​အတွင်း၌ အရပ်​မြင့်​မြင့်​ဗလ​တောင့်​တောင့်နှင့်​ လူမိုက်​အသွင်​သဏ္ဍန်​ရှိ​သော လူ(၁၀)ယောက်​ခန့် ခြံရံထား​သည့်​ အလယ်​တွင်​ ခြေချိတ်ထိုင်နေသော ချောမောခန့်ညားလှသည့် လူငယ်လေးတစ်ဦးရှိလေသည်။ မီးခိုး​ရောင်​ဖျော့​ဖျော့ဆံနွယ်​ရှည်​တွေနှင့် ထိုကောင်လေးမှာ သားရေဂျာကင်အနက်​နှင့် ​ဂျင်း​ဘောင်းဘီအနက်​ကို တွဲဖက်​ဝတ်​ဆင်​ထားပြီး ပါးစပ်ထဲတွင် ပီကေကို တဖောက်ဖောက် ဝါးနေသေးသည်။

မေးရိုးထင်းထင်းနှင့်​ နှုတ်​ခမ်းခမ်းပါးပါး​လေးကို တင်းတင်း​စေ့ထားပြီး မျက်​လုံးဝိုင်းဝိုင်း​လေး​တွေက သူ့​ရှေ့မှာ ကြိုးတုပ်​ခံထားရလျက် ​ဒူး​ထောက်​နေသည့်​လူကို​ အေးစက်​စွာကြည့်​နေ​လေသည်​။ သူ့​ရှေ့ကလူမှာ​မျက်​နှာတစ်​ခုလုံး ဖူး​ယောင်​ကာ​သွေးအလိမ်းလိမ်းနဲ့ ဖြစ်​နေ​သော်​လည်း သူ့မျက်​ဝန်း​တွေက​တော့ ညှာတာမည့်​အရိပ်​ယောင်​မရှိ​ပေ။ "Justin Awl" ဟုသာ လူသိများသော "စစ်​ပိုင်"​ဆိုသည့်​ သူသည်​ အကြင်နာတရား ကြီးမားသည့် ယောက်ျားကောင်းတစ်ယောက် မဟုတ်​ခဲ့ပေ။ အထူးသဖြင့် ကိုထွဋ်အား ဒုက္ခပေးမည့် ကြွက်လိုအကောင်များအပေါ်ဖြစ်သည်။