حسناء القايد (قصة رمضانية في طور الكتابة )

21

🌙حسناء القايد🌙
👑oumaima mega 👑
⚡68⚡

عرشية معاودتش الهدرة و الكلام من ورا لالها ...و تما دارت و مشات

~~~~~~~~~~~~~~في جناح حسناء كانت رداتها عرشية لموضعها ...و نعست باكية فحالا كل ليلة ...و شانقة على شراوطها ...و تقفز و الخوامي نازلين ليها على سريرها ...تافتحت عليها الباب عرشية بالهداوة ...و دخلت هي وعبداتها تمشا جيهة سرير حسناء ...غا خلطت عليها (وصلت عليها ) ....بدات تململها و توقضها و تنده عليها ....ناضت حسناء مرعودة قافزة من نومتها و مطرطقة عويناتها و جيهة خدها اثار خفيف تاع الطرشة لي خداتها من عند القايد البارح

عرشية : اهيا لالة مالكي صبح وجيهك منفوخ و هاد لاثار تاعاش على خدودك ... و هزت يدها غا مساتو ليها و هي تقفز حسناء قصحتها
حسناء شدت من خدها و تفكرت فاش ضربها و تعدو لي كان غيتعدى عليها نفسها تزيرت عليها
عرشية تشوف فيها حسبتها مبغاتش تتكلم حدرت الراس : خاصك تنوضي الالة دروكا (دابا ) ....حسناء تتسمع الكلام واخا شي مرات عاصية غاناضت ..و هزت عينها لقات العبيدات مصافات و هازين الزينتها و لباسها في الصواني هاد الحالة مكادار الا لاكانو غاديين بيها عند سيد القايد ...رجع ليها خوووف يامس ورجعت بلور : ف ف ففففين غادين بيا
عرشية : غانحهزوك الالة راه ندهت عليك لالة سلطانة باش تفطري حداها ... حسناء عاد خدات النفس و حركت ليهم راسها بواخا ... بداو تاني يلبسوها و يزيزوها و يفتلو لها شعرها ...و هي غاتخمم و حاطة عويناتها في لرض ...ماتدوي ماتكلم ...داكش لي طرا و جرا ماتقد عليه مرا ...و هي لابقات ليلة وحدة غايقتلها ديك سيدهم لقايد و لاشوف شنو غيعمل فيها ...خاصها تلقا كيف دير تهرب ...خاصها تزعم غير تعتب الباب مغترجعش لهاد الحبس ثاني ... خاصها شي حد يكون ولد الدار لي عارف القنات و حافظ لبيبان ...هزت العين و هي تبان ليها شافية واقفة و متبسمة ليها ... حسناء هزت الحاجب ضوات فيها الشمعة و بانت ليها هي لي تصلح لهادشي ....بداو العبدات يقادو الجالوق باش يحطوه في عنقها

حسناء زنكرت على يدها : مابغيت تاحد يلبسني كلشي يخرج خليو معايا غا شافية هي تكمل ليا و هي لي تدير لكحل في عينيا ... متعاودت من وراها غا سلام عليكم عرشية تكلمت بلعين مع شافية باش دير خدمتها ...و كلشي خرج و بقات راس في الراس مع شافية ....لي بدات تقاد و تصايب ليها في عنقها ...حسناء شدها الخوف و الرهبة و معرفتش واش تزعم و تهدرها ولالا ...خلاتها تاسلات ليها و كحلت ليها و غبرت ليها حس اثار ديك ضريبة بداكشي دالمكياج البلدي المغريبي الاصيل ...و عملت ليها خيط الريح في جبهتها
شافية : هاني ساليت ليك الالة ....غير حيدت يدها و هي تشد حسناء من كتافها : شافية بغيت نطلبك طليبة و تلبيها لياا
شافية تبسمت : الالة نتي لا طلبتي روحي نمدها ليك عند رجليك غا اميريني راني خديدمتك لي تعولي عليها
حسناء خدات النفس و سرطت الرقي : بغيتك تعاونيني نخرج من هنا بغيت نهرب
🌙حسناء القايد🌙
👑oumaima mega 👑
⚡69⚡