حسناء القايد (قصة رمضانية في طور الكتابة )

38

🌙حسناء القايد🌙
👑oumaima mega 👑
⚡121⚡

ايوا بقاو هاكاك ما فكو يماهم بستة و ستيين كشيفة عاد جلسوها و شادة من راسها و تهونيي ...و حسناء جالسة و تبرد في الضربة و باكية و مخشية في حضان القاسمية و لوبانة و تشوف فيها

القاسمية : هادشي لي عملتيه ا حسناء ميبغيه لا ربي لا عبدو ايه حنا عارفينك صغيرة و معندك عقل و ليني تهربي من دار راجلك بلا شوارو هادي راه الهبلة و مديرهاش و البنية فاش كتروح عند بيت راجلها مكتبقاش محسوبة على والديها
حسناء تبكي و تنخسس : هيء هيء هاديك ماشي دار هاديك راه جهنام الكحلة انا هربت عندكم باش تحوزوني زعما....و هي تجيها بلغة لكتف مسيفطة من عند هنية : و باقا باركا دويي راه حنا حوازيين عند سييد القايد وعايشين من خيرو
حسناء طاكات بيدها : ا مي سمعيني هيء هيء
هنية : ماكاين لا مي لا هم يحزنون واش سيد القايد معاه اللعب لي جايا تجراي نوضي نوضي درووكااا
حسناء : ف ف فين ا ميي ؟
هنية : نووووضيي سيرييي لدار رجلك معنديش انا المرا ديال الراجل لي تبقا هنا ...و ناضت و جرتها من وسطهم غادا مجرجراها بجلايلها ...و حسناء جالسة في لرض و تطلب فيها و تبكي و البنات يفكوو ...و هنية جهلت مع هاد الخبارات بغاتها ترجع دروك لدار سيد القايد ....تاتقطع اللغا مع دقة قاصحة على الدفة البرانية ....كلهم وقفو و تسمرو اما وحد حسناء من بين جلايلهم تخشات و تخبعات و قلبها حس بوحد النغسة تاع الخوف و الخلعة
هنية تتشوف في الباب و تا تعودت دقة ...مخزانية عمرها تسمعت فحالها في حياتهم ...شيرت ليهم يدخلو لبيتهم و هي لاحت عليها حيكها و مشات للباب : شكوون ...هو يرد عليها صوتو كيف الرعد في ليلة الشتوا : فخر الدين ....غا سمعت اسمو معودتش سولت دغيا فتحت الباب ...و حسناء تخشات في البنات و الخلعة الخلعة غاطيح منها النص غا صوتو وشنو عمل فيها

هنية فتحت الباب ... و حنات الراس قبالتو ...سيد القايد واقف نافخ صدرو و يدو من وراه عمرو وطأ دار واحد من نسابو و شوف الرومانة المغمضة فين وصلاتو جايباه تال هنا يقلب عليها و زيد عليها مخالفة شوارو و خارجة بلا خبارو ...طيحت ليه من شانو كيتنفخ و يتفش و من وراه طموبيلتو خارج منها مخزني هاز في يدو البارود ...و الجيران كلشي يطال و يشوف غا من الفوق قال قال سيد القايد هنا و العزبات ...تنشرو في السطوحة ...قلوبها علقوهم في السلوكة مكينش لي مشافتوش و مهتهتش من وراه

هنية : س سيدي القايد دخل ا سيدي دخل
فخر الدين كلامو قليل : سمحو ليا على هاد المجية وليني بغيت غير نسقسيك على حسناء واش كين هنا
هنية و لات غاترطب و تخمد العوافي : ايه اسيدي كينا لداخل كتساينك باش تجي تديها
فخر الدين كتشعل فيه نار جهنام بهاد الكلام غير مخلي مجامرو مطفية واخا راه باين في عينو الحرشة طالع ليه الخز : تانا جيت باش نديها
هنية : دخل اسيدي دخل ....فخر الدين مرضهاش في وجهها و حدر راسو يدخل مع الدفة القصيرة ...و هنية داخلا تجارا و تغاوت بسمية حسناء باش تخرج تمشي مع راجلها ....حسناء غاتسطا بين يدين خواتتها : مبغيتش نرجع و لا نمشي عافاكم عتقوني متخليونيش نرجع
القاسمية شدت ليها من كتيفاتها : حسناء الله غالب مابيدينا حيلة خاصك ترجعي موضعك في دار راجلك ماشي هنا....حسناء كانت كتسنا منهم يعاونوها طلعت يديهم مربوطة كثر منها
لوبانة : رجعي ا ختي رجعي حنا ماشي قد سيد القايد و لا مشا حتى خلاك هنا لا انا لا خواتتك غنتزوجو و غنغملو من بين هاد الحيوط ...حسناء دورت عينها ليها و كملت شوفة فيهم وحدة وحدة عرفت مقامها و مقام والديها ...هما معندهم مايعملو ليها ....قدام سيد القايد هما مساويين مع العبيد معندهم لا صوت لا ري ....عبد الصمد كان عندو الصح ....مغاتقدر تحرر الا لا بغا سيدهم القايد ... عاد يطلق سراحها ....هبطت عينها تتنزل دمعة ماشي فحال الدمع هادي حارة و قاسية ...و هنا ركبو ليها خوتاتها لثام ...و جروها يخرجوها
🌙حسناء القايد🌙
👑oumaima mega 👑
⚡122⚡