🌙حسناء القايد🌙
👑oumaima mega 👑
⚡31⚡
غسلو ليها بالما و الزغاريت فوق راسها ...و هي مكونة على راسها جاتها كي جلالة ...الهدرة ولات ترد في ودنها فحال البوق ...عاد نوضوها و هي دنيا ديرا بيها ماعرفة لا تمشي لاتجي هادشي جديد عليها و مزروب عليها ...دخلتها هنية و عويتقة و شي عيالات لبيت ...حيدو ليها حويجها لحمها كيف الشمع مافيه ريحة خبشة و لا قمشة و لا زغبة ...زين لي عطاها ربي و السر لي نازل عليها ...لبسوها سروال القندريسي و القميص لبيض و عاد فوقو تكشيطة ديال الجوهر ليها بااال و ثقيلة ...قجو ليها عنقها بالجوالق و بخرو ليها شعرها ببخور المسك باش ينشف و تبقا ريحتو زينة .... سوكو ليها و دارو ليها العكر الفاسي ...و الكحل في العين ...عاد ربطو ليها شعرها بسبنية ...هي غا تتشوف فيهم و راسها غايمشي ليه العقل بالحزن والغمة و الدمعة لاصقة عند عينيها باغا تنزل ...لبسوها شربيل زيين لييه بال و غطااو ليها وجهها بزيف مشبك ...و خرجووهاا يزغرتو بيها و يهللو بيها ...حسناء غادا بلا عقل بلا قلب و الخميسة تاع زلالها في صدرها خاشياها ماتفرطش فيها.... و هي غير تشوف من تحت الشبكة عينيها خارجين و هما دافعينها مخرجينها قوة الناس و الهاراج يشوفو فيها ...شداتها الدواخة و الخنقة من هادشي ثقيل لي لابسة ...تاجلسوها وسط العيالات في المراح في جلسة خضرا مفرشة في لرض و هي جامعة رجليها و مكونة ... و خواتتها غا زينة على ختها لابسين لحرير و الجوهر و كاع العيالات يشوفو فيهم و العزبات حاسدين لالة لبنات على زواجها ...و بداو يطالو على العروسة ...جات هنية لي تهيا لابسة غا ثليجة و المبرة ...جلست قبالت بنتها حسناء زينة البنات و لسانها تزغرت بيه ...و شدات ليها من يدها و حطت ليها لبزة تاع حنة على راحة يدها و فوقها لويزة دهبية ... و سداتها ليها ...حسناء غا تتشوف و تسمع في صوت نهجها و تهز عينيها تقلب على لي يعتقها و وتشكي لمولاها في صمت على قلبها لي مدبوغ و مدبوح وروحها لي غتزهق بين هاد الخلق ....وكتسمع في وشواش ديال عيالات يهدرو عليها
المرة لولة : شوف ليك هنية بان عليها خير سيد القايد كانت غتسعا تحت رجلينا نشريو من عندها السبنيات
المرة الثانية : ايوا زغرتي يا موكة بلارج دار لعرس هانتي تشوفي سعدها و الزهر جا تال عند بنتها و فرخ
المرة لولة : هو فصارحة هنية علينا حتى حنا منين سيد القايد دار لناس الدراوش غدا يطلقها و يجي لعود في وحدة من بناتنا ...حسناء النفس مقطوعة فيها و كاع هاد الهضرة دازت على ودنيها ...و دموع لاصقين في شفرانها ...تتشوف مها جلست حداها تزغرت فرحانة و الدقة تاع العيالات بدات و الغنا و الشطيح ...تمن خواتتها ناضو تحزمو يشطحو في عرسها و نساو همها خلاها الحاصول ما تيحس بالمزود غير لي مضروب بيه
حسناء ميلت راسها عند مها و سخفة شادها و صوتها مخنوق بالبكية : مبغيتش نتزوج عافاك امي خليني معاكم منبقا نخرح منبقا ندرج ( هنية ساريا تصفق ماكتسمع والو و فرحانة تزغرت ) تامن الشقا نديرو وحدي ...مجات فين تكمل تاكتسمعهم كيقولو و يغوتو جاااااااو ركبتها الخلعة والهلعة معرفت اش جاو و كلشي ناض يطل ....وقفت طموبيلة دالسي الحاج التهامي المبعوزة نزل هو و سي عبد السلام لابسين الجديد ...و من وراهم لعدول هاز كتابو ...تادخلو على النسا لي غطاو وجوههم بحايكهم ...و جاو قدام العروسة واقفيين ...حسناء معرفت تنوض معرفت توقف تاجلس العدول قدامها و فتح كتابو و شاد الستيلو ...و عطاها الكتاب قدامها ماسولها لا على شوارها لا على ريها ...و هي جامعة يدها عندها ومخرجة عينيها بالخلعة
أنت تقرأ
حسناء القايد (قصة رمضانية في طور الكتابة )
Romance⚠️جميع المواقف و احداث هاد القصة هو من محض الخيال ، اي تشابه في الاسماء او اسماء الاحزاب او اسماء فالامااااكن ، سواءا -كانت على قيد الحياة او عداد الاموات - بينها و بين الواقع ، فهو بمحض الصدفة لا اكثر ⚠️ ❌القصة ممنوعة من النشر او الاقتباس ...
