🌙حسناء القايد🌙
👑oumaima mega 👑
⚡201⚡
القاسمية قربها من هاد الراجل زاد قل و هي تنزل عينيها بحيكها و دورت شوفتها جنب ...و ديك السويعة قلبها خرج من مكانو و عويناتها علاين يخرجووو و هي تتشوف باها سي عبد السلام جاي قاصدهم و المقصود الله ...حبس ليها الما في الركابييي و خبطت على خدهاا: ويلييييي باااااا ....سمحت في قصرية و في سي مصطفى و من تحت يدووو خرجت تتجارااا و جلايلها علاين يعكلوها توصلت لدفة الباب تخبط فيها و تعاود تخبط ....تحلات ليها هنية كاع مكمشة وجهها تشوف مول هاد الدقة ...فحالا راهنين ليه الزرع ....دخلت القاسمية من تحت يديها تجاراااا و دخلت في قلب الدار تحت الضواية تجدب و تندب في حناكها و تنقز و الخوف شادها من ساسها الراسهااا ....سدت هنية الدفة و دخلت تشوف مال هاد المزغووبة
القاسمية تبكي و تسخف و تنهد : عتقيني ا مي ليوووم بااا يدفنيي حية ...خرجو كاع خواتتها من البيت يطالو و يشوفو اش طاري
هنية وصلت عندها و عقدت الغوباشة و مع مرا حارة وواقفة على الصح : اش عملتيييي يا هاد المزغوووبة اش عملتيي ي ..و شدتها من درعيهاااا
القاسمية تبكي و تشكي : بااا شافنيي ا مي باا شافنييي
هنية : هااويليي اش شاااافك ا بنت الحرامية اش عملتيييي
القاسمية : هيء هيء شافني مع الراجل ...باقا مكملتش كلامها هنية غسمعت حس الرجالة ...و بدات تخبط فيها كيف البطانة : هااويليي على سايبة هاويليي على الرجالة ا بنت هنية هاويلي على ترابي يدي ليوم باك يدبحك و يتبعنيي ليك ...و تخبط و تضرب ...و خواتتها كاملات شدو على فامهم
القاسمية تبكي و تشكي : هيءهيء والله ماعملتها بلعانيي
هنية : زيديي دخلييي سيفطتك وحدك اخطرة و خرجو ركابيك لشوااارييي زيدييي (و جرتها لبيت تباااكاااا و دخلتها تما و بركت هنية تجدب و تندب ) اش غنعمل مع سي عبد السلام اش غنعمل ياربي في هاد المصيبة لي سلطها عليا مولانا
~~~~~~~~~~~ سي عبد السلام قرب من القزديرا لي همة وشان قبالت دفة سي عبد السلام ....و النسااا يطالووو و يشوفوو في القزديرة و مولاها ...كيف المزوجة كيف العزبة ...حيت سي مصطفى عاطي العين ....كان واقف هاز القصرية و رامي عينو لباب الدار لي دخلت منو القاسمية ....عاقد غوباشة مفهم مالها ...حتى دور راسو و لمح السيد لي تيقرب منو ...هو يتبشر بشارتو فاش عرفو هو سي عبد السلام نسيب سيد القايد
مصطفى : سي عبد السلام
عبد السلام متيعرفو و لا عمرو شافو من غير دابا لي لمحو واقف مع بنت كرشو و خرج فيه عينوو : شكووون نتاااا ؟ ....الحاصول كانو المغاربة الحرار عاضين في لرض ...يموت و لا يشوف عرضو في يد راجل شنو ما كانت حجرتو ولا شانو
مصطفى متبشر : رسلني سيد القايد هنا باش نوصل ليكم بنتكم
عبد السلام غا سمع سيد القايد تبدل من الغوباشة ولا يفرنس و يضحك حيت سيد القايد راجل أميين ومافيه دغل و باااينة رسلو مع بنتو باش توصل بخيير : مرحبا مرحبا سيدي بناس سيد القايد
مصطفى معلي شانو : ترحب بيك الجنة اسي عبد السلام و هاد القصرية سيفطها سيد القايد ليكم
عبد السلام شدها من عندو : الله يكثر خيركم ا سيديي و يعليي من شانكم ....هو يرفع مصطفى يدو و دار نضاضر الشمش في عينو : الدوز بخير اسي عبد السلام ....و ركب في طوموبيل تاعو مخدمها
عبد السلام : الله ينصركم اسيدي سلم على سيد القايد سلم على سيد القايد ...خرج مصطفى يدو من شرجم دطوموبيل معناتو تيرد عليه السلام ...و زاد خلفة مع الطريق ...و بقا عبد السلام من موراه يغوت بسلم على سيد القايد حتى غبر من عينو ....و دار لدفة دارو هاز القصرية و فتح بابوو بساروتو ...و دخل و سد الباب من وراه
أنت تقرأ
حسناء القايد (قصة رمضانية في طور الكتابة )
Romance⚠️جميع المواقف و احداث هاد القصة هو من محض الخيال ، اي تشابه في الاسماء او اسماء الاحزاب او اسماء فالامااااكن ، سواءا -كانت على قيد الحياة او عداد الاموات - بينها و بين الواقع ، فهو بمحض الصدفة لا اكثر ⚠️ ❌القصة ممنوعة من النشر او الاقتباس ...
