🌙حسناء القايد🌙
👑oumaima mega 👑
⚡104⚡
شروق تبهضت فيها غا بهضة ...و القايد غا مطول فيها الشوفة دار يدو تحت دقنو و دراعو تكاها على يد الكرسي و زادتو بشارة على بشارة و تبسيمتو وضاحت و نصحات ... حيت جات معاها البنية
حسناء كتدوي غا من تحت العين : خليت ليكم الراحة ...و دارت و دات فاطمة الزهراء معاها ... كمل معاها الشوفة و هي غادة و هي تنوض شروق من مكانها : اش هاد قلة الحيا نتياااااا ؟ تخطفييها ليا من حزتيي
فخر الدين ربط الغوباشة حيت علات الصوت في مقامو وهو ينهض فيها : شروووق ...شروق نسات راسها و حدراتو و رجعت جلست : سمح ليا ا سيدي غير انا فاطمة الزهراء عزيزة عليا و بقا فيا الحال فاش خطفتها ليا من حزتيي
فخر الدين واضح في كلامو لي ماضي و قاسي : تاهيا عندها حق تهزها راها في مقام مها دابا ...لاح ليها الكلام كيف قطرت السم ...و دار يكمل في مرتو الشوفة
حسناء غادا هازا فاطمة الزهراء و من وراها شافية : ايوا دابا تبقا في داك الموضع و تحصد و تزرع فيه البقولة و تكون عشاها في هاد ليلة ...شافية معرفتهاش واش كتكلم معاها و لا مع راسها
فاطمة الزهراء : زيتي تلعبي معايا
حسناء تبسمت ليها : ايه غدوزي معايا نهار كولو ...و تمشات بيها غادا بيها لدروج طالعة ... من بعد شوية ماشي بزاف دالوقت ...كان سي فخر الدين كيف ديما معلي الشان كيف الطاووس و عامل يدو من وراه غادي يطلع لجناح الطووس يشوف مرتو شنو كتعمل مع بنتو و ريحة البشارة على وجهو ...مجا فين يوصل لدروج و يطلع فيهم حتى جا العبد عبد الكبير يتجارا و حادر الراس : سيدي سيدي
فخر الدين وقف حاط يد على الحافة تاع الدرج هاز الشان : اش كين تما؟
عبد الكبير : سي مصطفى كيتسناكم برا
فخر الدين : اممم قولو يدخل .... عبد الكبير معاودش معاه الكلام و مشا دخل سي مصطفى ....لي كان شاب زيين و عاطي العين ...و وجهو فيه تبسيمة ...لابس جبادور و باين من الناس لكبار ....و تاهوا جاي هاز الراس توصل عند سيد القايد عاد حناه متبسم حيت كلشي كيحتارم سيد القايد (الا البرهوشة تاع مرتو ) : سيد القايد السلام عليكم
فخر الدين رد عليه السلام : وعليكم السلام اش كين ا سي مصطفى
مصطفى : غير جايك على وحد الموضوع خاص ضروري نخبرك بيه مكيتسناش
فخر الدين هز ليه براسو : تفضل معايا اسي مصطفى ....و غير وجهتو و مشا هو وياه و عبد الكبير من وراهم تابعهم
اما حسناء ....زينت العفطة و شوفة لي تتفتن ...فمن الدرج مامشاتش بيها لجناحها ....مشات بيها لسطح لي ممنوع تعفط فيه حس نسا القايد ... و شافية غاترعد و تابعها من وراها ....حسناء وصلت تما و ضربتها النسمة هي و صبية الصغيرة لي هبطتها و حطتها في داك السطح ...و فاطمة الزهراء ...غاشفت الطاووسات مشات تجارا ليهم و تضحك ...و هما هربانين منها
حسناء خوفانة عليها : فاطمة الزهراء اجي (و هي دور عند شافية خوفانة ) واش ماشي يأديوها ؟
شافية تدور وراها و ترعد : لا ا لالة راهم مربيين
حسناء تبسمت : هادشي لي حبيت نسمع ....و مشات حسناء لوحد الجليسة و جلست في المخيدة طالقة رجليها و سيقانها لبيضين لشمس و غا تشوف في فاطمة الزهراء لي كتلعب بين عينها و تا طاووس متشد ليها ...غير تيطلقو ليها جناوحهم و يرجعو يهربو
أنت تقرأ
حسناء القايد (قصة رمضانية في طور الكتابة )
Romance⚠️جميع المواقف و احداث هاد القصة هو من محض الخيال ، اي تشابه في الاسماء او اسماء الاحزاب او اسماء فالامااااكن ، سواءا -كانت على قيد الحياة او عداد الاموات - بينها و بين الواقع ، فهو بمحض الصدفة لا اكثر ⚠️ ❌القصة ممنوعة من النشر او الاقتباس ...
