🌙حسناء القايد🌙
👑oumaima mega 👑
⚡110⚡
تابانت ليها ركبت في طموبيلتها ...و هي شدتها كية في قلبها لي تنبز و حست بالعافية كتحرق فيه ...دورت راسها و نزلت دمعتها معرفت مالها ...فسرتها بالحكرة ...شوف هادي كيف وقف معاها و كيتكلم معاها بالهداوة ...و هي تيجي يصمكها و يطرشها ... و يغوت عليها و ينهصرها ...جمعت جلايلها و دموعها و مشات تتعرج برجلها نازلة فحالها ...و مشات لجناحها سدت عليها و تلاحت فوق سريرها و طلقت صوتها على جهدها تبكييي و تشكي .... لحاجة لي تيعرفها هي يدور بيه النسا و يتفاخر بيهم ...هاوحدة عندو في القصر بنت خالو طامعة في شوفاتو و وحدين على برا يعلم الله شحال من وحدة ....و علاش هي معدبها و مخرجها من حزت مها و جايبها يتعدا و يتكرفص عليها تبكي و تنحط
القايد رجع دخل ...و يدو من وراه كيتمشى متنخوي فوق لرض ....لقا قبالتو سلطانة واقفة وسط الدار و رافعة الراس و نافخة الريش و من وراها عرشية
سلطانة : ولدي فخر الدين شكاين ؟ سمعت بلي شي وحدة من الفرانسيس جات قبالت الباب واقفة
فخر الدين علا الشان كيف عادتو : متصدعيش راسك بيها ا الحاجة انا تكلفت ....و خلاها و دازها و مشا لدرج غادي طالع ...و سلطانة تبعاتو بعينها تا غبر عليها و دارت عند عرشية : فين هي ديك بنت الهجيج و الوسخ
عرشية : لالة حسناء شفتها تا نزلت من السطح ومشات لجناحها
سلطانة حمرت العين : و ما سمعتي لا لغا لا غوات لا عياط
عرشية حادرة الراس : و على حد ما شفت و شنو سمعت ما سمعو وداني حتى حاجة
سلطانة تبهضت ووسعت العين ....ميمكنش تال هادي ميدوزهاش ليها لا لا هادشي فات الحد بزااف
فخر الدين كان غادي لجناح الطاووس وقف قبالت الباب و يدو من وراه ...و جاي ناوي يكمل على لي بداه ... و قبل مايفتح الباب ...سمع الشهيق و البكا على جهد لداخل ... مقد يقدم ما قد يوخر وقف و عقد حجبانو من هادشي لي تيسمع ...و قلبو معحبو حال يسمع لغا بكاها ...حسن يخليها من بعد و يحاسبها و دار ...كمل خطاااه و مشا لجناحو
سلطانة كانت تمشي و تجي في قلب القصر ...و عرشية واقفة عليها ...القصر هادي تقول موقع والو ....فحالا ديك بنت الهجيج ماحركت البيضة على الطاس ....لا لا هادشي ماخصوش يكمل هاكدا هي بنفسها و بمقامها غتطلع عندها ...و قصدت الدروج غادا طالعة و عرشية كيف ضلها تابعاها
حسناء مسكينة باقا عاضة في فراشها و مغرقة وسادتها ببكاها ...تاتسمعت دقة قاصحة في الباب ...ناضت على غير رادها خافت يكون هو : ش ش شكووون ...ملقات جواب لكلامها ...و هي تمسح دموعها و ناضت غادا تعرج و مشات و حلات لباب ...و هي تلقا قبالتها سلطانة هازا الشوكة و من وراها عرشية ...تبهضت و استغربت
سلطانة : ايوا ا بنت الهجيج ا قليلة الترابي لما رباك حد انا غنربيك نوريك شناهيا طلعيي لسطح و عمر شي نسواا دارتها تتجي نتي و تلعبي بين الرجلين
حسناء لي فيها كافيها : صافي باراكااا ....و سدات عليها الباب في وجهها
أنت تقرأ
حسناء القايد (قصة رمضانية في طور الكتابة )
Storie d'amore⚠️جميع المواقف و احداث هاد القصة هو من محض الخيال ، اي تشابه في الاسماء او اسماء الاحزاب او اسماء فالامااااكن ، سواءا -كانت على قيد الحياة او عداد الاموات - بينها و بين الواقع ، فهو بمحض الصدفة لا اكثر ⚠️ ❌القصة ممنوعة من النشر او الاقتباس ...
