⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 06 ||
ناض عزيز قبل نورا .. لبس حوايجو كالعادة كلش اسود .. ما عدا شعرو فيه شييب ( ملخر ملڤري شرير و كلب بصح زل .. ميميش شافتو هبلت عليه .. تصويرتو راهي تحت ) .. مشط شعرو .. نوض نورا بعدها ..
ناضت لبست حوايجها بلخف .. و راحت ليه ..
نورا : وي عزيز ..
عزيز : ليوم راح نستجوبها .. نحتاجك معايا ..
رجع قلبها يخبط و خافت اول مرة راح دير حاجة كيما هادي .. هدرت معاه و هي مترددة ..
نورا : ا اوكي .. مي واش ندير ..
عزيز : نحبطو قبل نستقهواو .. بعدها نقولك واش نعملو ..
حبط و خلاها هكاك .. افكار تجيب و تدي فيها .. عقلها متشتت .. رجعت غسلت وجها باش تصحصح .. نفضت مخها من هاد الافكار و حاولت متفكرش فموضوع البنت لي ماتعرفها ما شافتها ..
حبطت مور عزيز .. لقاتهم الكل مجتمعين على طابلة .. جات ليها رؤيا تجري ..
رؤيا : صباح نور ماما .. و باستها ..
نورا : صبااح الخيير .. هييه راكي شابة ليوم ..
رؤيا : مرسي ماما ..
كانت لابسة غوب ڤاغ بوتاي يديها طوال بحكم كان البرد شوية .. جاية طويلة لتحت ركبتين .. و طالقة شعرها القصير الشاتان .. عاملة مكياج خفيف اما مبين عينها الخضورة .. كانت بوبية كأنها مرأة ناضج و كاملة متبانش بلي فعمرها 22 سنة ..
راحو قعدو كيفكيف فالطابلة .. كانو راح يبداو ياكلو حتا نطق الجد ..
الجد حكيم : اصبرو يجي عماد الدين خرج يصلي طول ..
الكل رجعو حطو مغارفهم .. اما عزيز .. تبسم على جنب و هدر بصوت خافت ..
عزيز : ماشي كاين قوانين فدار ولا لي قلتهولي لبارح غالط ..
حكيم : كاش ما هدرت عزيز ..
عزيز : لا والو سلامتك بابا ..
و هوما هكاك دخل عماد الدين ..
عماد الدين : سلام عليكم ..
ردو عليه السلام .. اما رؤيا عينيها ولاو قلوبة كي شافتو ( صراحة حتا انا عيني ولاو قلوبة كي راني نتخايلو زليلش 😂 ) ..
تقدم قعد معاهم .. بداو ياكلو معا بعض .. حتا رجع هدر الجد حكيم ..
الجد حكيم : عماد الدين .. وقتاش ترجعو للقرايا ..
عماد الدين : مزال مبانتش جدي ..
الجد حكيم : شحال بقا باش تكمل ..
عماد الدين : عام بإذن الله ..
الجد حكيم : ان شاء الله .. و راح تخدم فالجامع لي هنا ..
عماد الدين : انا نقدم طلب و لي فيها خير هاديك هي ان شاء الله ..
تبسملو الجد و هزلو براسو بمعني ايه و رجعو ياكلو ..
عماد الدين .. راه يقرا باش يرجع امام رغم انو عندو عدة ديبلومات مي فضل يرجع امام كونو الوحيد المتشدد و المتمسك بدينو فالعايلة هاديك .. رغم صغر سنو 29 سنة الا انو شاطر ..
بعد ما كملو كلاو .. عماد طلع لغرفتو .. و العايلة رجعو جتمعو فصالون .. هدر الجد ..
حكيم : لؤي ليوم يجي نورمالمون ..
نورا و عزيز طلعو راسهم لزوج و ركزوا معا حديث الجد ..
هدرت وردة و هي فرحانة صرالها مدة مشافتش خوها لانو طول عمرو و هو عايش فالخارج معندوش ولاد و حتا انو مرتو ماتت اما مخممش يتزوج لانو حبو لمرتو كان حب طاهر ( سمحلي كي قتلتك لؤي ماشي قصدي علابالي تغبنت في حياتك 🥺💔 )
وردة : صحح .. يعني لازم نجهزولو غرفتو و نطيبولو الماكلة لي يحبها ..
حكيم : اكيد يا بنتي .. قولي للخدمات يديرولو ..
وردة : حاشا بابا نطيب لخويا بيدي ..
نورا قلبها وجعها كي سمعت حديثهم .. عارفة بلي لؤي معندو حتا ذنب ..
اما عزيز فكان متبسم شبه تبسيمة ماشي خايف من لي عملو .. من صغرو يكره خوه .. رغم انو هو لكبير لكن لؤي كان شاطر و كل ناس تشهد على شطارتو .. و عزيز كان ديما يتفاخر بدراهم باباه و يصرف منهم برك .. ديما ناس كانو يقولولو شوف لؤي كيفاش .. دير كيما لؤي .. اتعلم من عند لؤي .. حتا حكيم كان قريب من لؤي اكثر .. و هاد شي ولد حقد كبير اتجاه خوه .. خاصة وقت ظهرت مسألة الورث ( فالحلقات الجايين تفهموا اكثر ) رجع بدون ضمير و دخل عالم المافيا و قتل اول شخص فهاد العالم الاجرامي و لي هو خوه ....
〰️〰️〰️〰️〰️〰️〰️〰️〰️〰️
اوبالاتي 🔥
بما انكم تأكدتو بلي عزيز هو لي قتل لؤي لانو شفتكم تستفسرو فالحلقات ليفاتو .. واش راح يدير للينوش زعما .. كيفاش راح تكون ردة فعل العائلة بعد ما يسمعو بخبر وفاة وليدهم 💔 اول مرة نقتل شخصية بريئة و معندها حتا ذنب فكرونيكاتي 🥺😓
متنسااوش تجمجموو الحلقات كاااامليين ..
و خلوو توقعاااتكم طوال عراض راني ناقشكم فيهم و نتمنى تنتاقدوووني اكثر باش نتحسن اكثر ✨
#ليلوشة
أنت تقرأ
⚜️ الأسيرة و المتدين ⚜️
Action⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
