⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 28 ||
دخلت لدار .. اول واحد قابلها هو عماد الدين قاعد قدام الامام .. للحظة حبت تبكي وقت شافتو .. تحس عبد مختلف على لخرين .. تحسو امانها .. تحسوو ملاكها الحارس لي ينقذها فاخر لحظة رغم انو معندهاش بزاف ملي تعرفو ..
شافها واقف عند الباب .. تخزر فيه و سارحة .. لمعة دموع فعينها تبان من بعيد .. عقد حواجبو و خزر فيها .. افكار بزااف قاعدين يدورو فمخو .. فاق على روحو و حبط عينو .. و همس بينو و بين روحو بلا ميفيق ..
عماد الدين : استغفر الله يا ربي صبرني ( طأ طأ طنييي بدااا يطييح سيد ) ..
فاقت على روحها هي تان .. عدلت روحها و قدمت ليهم .. وصلت عندهم و وقفت .. هدر حكيم و هو يخزر فيها ..
حكيم : راهي جات ..
طلع راسو الامام و خزر فيها و تبسم معاها ..
الامام : ارواحي بنتي اقعدي هنا .. و اشار للبلاصة لي قدامو .. ( اسمعو معلاباليش كيفاش يعقدو الفاتحة راح نخرط و خلاص متحاسبونيش .. )
تقدمت قعدت قدامو .. هدر معاها ..
الامام : بنتي راكي موافقة .. علابالي حالتك راكي بدون ولي امر لازم ناخذ رايك ..
طلعت راسها .. طاحت عينها فعين عماد الدين .. رجعت حبطت راسها و هدرت ..
لينة : ايه موافقة ..
رجع الامام دار لعند عماد الدين ..
الامام : و نتا وليدي موافق ..
عماد الدين : ايه موافق ..
عاود دار عند لينة .. و هدر معاها ..
الامام : وشنو هوما شروطك بنتي ..
لينة : والو ..
الامام : لا يصح زواج بدون مهر .. غير كمل هدرتو نطق حكيم ..
الجد حكيم : راح يتفاهمو على المهر بيناتهم شيخنا ..
هزلو الامام براسو و رجع هدر معا لينة ..
الامام : خلاص بنتي تقدري تروحي بقات الفاتحة دك نقراوها ..
ناضت لينة .. و رجعت خرجت للجاردان ..
الامام : نقرااو الفاتحة ..
رفدو كامل يدهم .. عماد الدين كان متوتر اما ماشي عارف علاش .. كملو قراو الفاتحة .. و رجعت مرتو شرعا .. دار الامام عند عماد الدين و خمس معاه ..
الامام : مبروك عليك وليدي ..
عماد الدين : الله يسلمك شيخنا ..
بعدها بمدة قصيرة راح الامام .. خرج عماد الدين لجاردان .. لقاها وافقة تخزر لسما ..
عماد الدين : ادخلي راهو لبرد ..
دارت خزرت فيه .. تبسمت معاه للحظة اما تمتم محاتها وقت شافت رؤيا جاية ..
شافها عماد كيفاش تبدلو ملاحها .. دار موراه شاف رؤيا جاية نحياتهم ..
وصلت عندو و هدرت و شر يطاير من عينها ..
رؤيا : عماد الدين منيتك تدخل لعايلتنا وحدة كيما هادي ..
و دارت خزرة فيها مالفوق للتحت ..
خزر فيها عماد الديت تبسم معاها على جنب و دار عند لينة .. قدم ليها بلعقل و قلبو يخبط .. ماشي حاس لروحو واش قاعد يدير ..
وصل عندها .. قلبها رجع يخبط .. عينهم فعينين بعض .. حط يديه فيزوج على وجها .. بلا متحس غمضت عينها ..
قرب ليها اكثر .. و طبع بوسة خفيفة على جبهتها .. ( اي قلبي .. زوجوني بمتدين علاااش .. حقربي غير رومنسيتهم خير مالمافيا .. )
〰️〰️〰️〰️〰️〰️〰️〰️〰️〰️
اوبالاتي 🔥
خربشتلكم مشاعركم فهاد الحلقة صح ههههه .. خلولي تشو توقعاتكم .. بعد هاد اللحظة راح تعلن رؤيا الحرب على لينة .. زعما راح يحبو بعضاهم هههه اتخايلو زعما ندير نهاية حزينة هههه راني نقول زعما تبلوكيوني ڤاع علابالي ههههه
جمجمووو كامل الحلقات كبيداتي
#ليلوشة
أنت تقرأ
⚜️ الأسيرة و المتدين ⚜️
Action⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
