⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 31 ||
راحت لشومبرة لي كانت فيها .. رفدت فراش و مخدة و رجعت للغرفة لي راهو فيها عماد الدين .. دخلت بلعقل باش ما تنوضوش ..
فرشت فراشها فلرض .. و هي تفرش هو تحرك و دار للجيهة لي ملهيك .. قلبها حبس دارت فبالها فاق و دك يحاوزها .. حطت يدها على قلبها و هدرت ..
لينة : مزية ..
كملت فرشت فراشها .. و دخلت فيه .. تغطات و هدرت بلعقل و هي فرحانة لانو راح ترقد بأماان ..
لينة : بونوي عيمادوش ..
و غمضت عينها .. فتح عينو بلعقل .. و مقدرتش يتمالك روحو .. تبسم على هدرتها و خاصة كي قاتلو عيمادوش .. ملي دخلت للغرفة و هو فاطن .. سمع هدرتها معا روحها كامل .. و فهم انو خايفة وحدها عليها محوزهاش ..
رجع غمض عينو و رقد ..
لحق نهار جديد .. ناض كعادتو يصلي لفجر .. ناض بلعقل .. خزر لبلاصتها ملقاهاش .. للحظة خاف عليها .. ناض يجري .. فتح لباب ..
قابلاتو لباب تاع غرفتو مفتوحة و خرج منها ضو .. فتحها .. و تفاجأ قابلاتو تصلي .. تصدم فيها .. كيفاش وحدة عاملة عملتها تنوض تصلي ..
حس على صوت شهقتها .. غير طلعت يدها باش تدعي خرج .. محبش يسمع ماشي من حقو يتجسس عليها .. افكار تدي و تجيب فيه و فاخير قنع روحو بانو ندمت على واش دارت و قررت توب اما هادا ميمنعش انها زانية .. استغفر و راح توضا .. خرج مصال دو بان .. لقاها طفات ضو .. دار فبالو رجعت ترقد .. راح للغرفة لي كان فيها .. لقاها رفدت لفراش و راحت ..
استغرب فيها .. حك لحيتو كالعادة .. صلى لفجر و رجع رقد لانو تعب علخر هاد اليومين ..
بعد ما جازو شي ربع سوايع .. ناضو كامل .. لبست لينة جبة و حطت خيمارها على راسها و قعدت تما دور .. ناض عماد الدين لبس قميص بيض .. حط عليه المسك ( اي يا قلبي ريحة المسك ) ..
و حبط للتحت .. لقاهم كالعادة مجتمعين على طابلة .. خزر فيهم واحد واحد .. اما مشافش لينة .. رجع دار و طلع لدارو ..
طبطب لباب .. ناضت مبلاصتها و فتحتلو ..
عماد الدين : وقت لفطور ( قصدو فطور الصباااح ) .. احبطي معايا ..
هزتلو براسها ايه .. راح يمشي هو و هي تمشي موراه ( وراء كل رجل عظيم امرأة 😂 ) ..
حبطو للتحت .. قعد و هي قعدت فالكرسي لي قدامو .. بدا ياكلو .. و رؤيا ملي جاو و هي تخزر فلينة بشر و كره .. قطع سكوتهم لجد ..
حكيم : بنتي لينة ليوم تعقدو و لازم تمديلنا هويتك ..
خزرت فيه و رجعت خزرت فعزيز .. و هدرت
لينة : عمو عزيز و طاطا نورا يعرفو الدار .. انا منقدرش نروح ..
رؤيا : من وقتاش بابا عمك يا لالة ..
دار عزيز لرؤيا و خزر فيها بمعنى اسكتي ..
عزيز : عادي بنتي نروح نجيبهالك ..
و دار عند الجد حكيم و هدر معاه ..
عزيز : بابا مدامني انا لي نروح نجيبها واش رايك ملتما نروح نفريلهم عقد زواج يبقا توقيعهم برك نجيبو يوقعو هنا ..
هزلو حكيم براسو بمعنى ايه .. حبط راسو عزيز و كمل ياكل و هو متبسم و نورا مكانتش اقل منو .. فرحانة علخر .. اما عماد الدين عقلو مكانش معاهم كامل .. بلا ميحس يبقا يخمم فحكاية لينة كأنو مراهوش مقتنع بيها اما هو قاعد يحاول يقنع روحو انو هاديك هي لحكاية .. كملو كلاو .. ناض عزيز راح ديراكت يجيب عقد زواج لانو الهوية لمزورة راهي عندو .. اما لينة كانت طالعة لدارها و عماد الدين كان خارج .. رجع دار ليها و عيطلها ..
عماد الدين : لينة ..
وقفت بلاصتها و دارت مستغربة .. قدم ليها و رما يدو لجيبو جبد تيليفون و مدهولها ..
عماد الدين : الا حتجتي اي حاجة عيطلي .. هزتلو براسها .. رجع دار و خرج .. و هي طالعة فدروج صونا تيليفون ..
لينة : ياه ديجا عيطلي واش نسا ..
ريبوندات و هدرت ..
لينة : الو وي ..
الراجل : الوو ..
جاها صوت غريب .. معرفاتوش .. رجعت هدرت ..
لينة : شكون ..
الراجل : المجهوول ....
〰️〰️〰️〰️〰️〰️〰️〰️〰️〰️
اوبالاتي 🔥
صدمتكم علابالي هههه خلولي تشو توقعاتكم .. راحتلنا تريسيتي و هادا واش كتبت ان شاء الله تعاود تجي بسك تيليفوني راح يطفا ..
خلو كاااامل تعليق هنا باش الا جات و زدت حطيت نجمجملكم 🥺
#ليلوشة
أنت تقرأ
⚜️ الأسيرة و المتدين ⚜️
Ação⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
