⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 10 ||
نفض راسو من هاد الافكار و خلاها على ربي .. دخل عمل دوش باش يوجد روحو لانو فليل راح يديرو عشا صغير بمناسبة عودة لؤي ( مسكين 💔 الصدمة قريبة ) ..
رؤيا .. نورا .. عزيز .. وردة .. الجد حكيم .. كلهم كانو يجهزو و يوجدو فالحالة .. خاصة نورا و عزيز كانو منسجمين معا الوضع لدرجة يبانو ملاك و فرحانين برجعتو ..
وصل لليل .. حطو طابلة تاع لعشا .. و قعدو الكل عليها .. يسناو فلؤي يجي .. بعد مدة قصيرة حبط عماد الدين عندهم .. كان لابس سروال نواغ كلاسيك مي جاي شوية عريض .. و معاه تريكو ڤري ( طبعااا مننساوش المسك 🥺 ) .. قعد كالعادة فبلاصتو ..
و بقاو يڤصرو و يضحكو ماشي عارفين واش لي يسنا فيهم .. فهاديك اللحظة استأذن منهم عزيز على اساس راح يروح لتوالات ..
خزر فنورا .. فهمت وين رايح و واش رايح يدير ..
ناض مالكرسي و تقدم بلعقل لدروج .. دار موراه و تأكد انو مكاش لي يشوف فيه .. بعدها حبط يزرب .. اما بدون ميعمل حتا حس .. دخل المفتاح بلعقل .. و فتح لباب .. شعل لومبة لي كانت فيدو .. قابلاتو قاعدة فالكرسي هكاك مغمى عليه .. شومبرة مظلامة علخر.. نفسها خفيف و متباطئ .. تقدم ليها بلعقل .. حتا وصل عند راسها ..
طلعلها راسها بيدو .. بعدلها شعرها على وجها .. و رجع وجهو مقابل وجها و يخزر فيها .. عينو جازت على كل تفصيلة صغيرة و كبيرة فوجها .. تبسم بشر و هدر بصوت خافت ..
عزيز : خسارة تلاقينا فظروف كيما هادي .. و إلا .. مكملش هدرتو .. عدا يدو على شعرو و وساعت ضحكتو ( احم نظن فهمتو هدفو ثاني وشنو 😳 يعني لينة عجباتو احمودة ) .. حبطلها لقماش من على فمها و رفد بيدون .. عمروا بلماء و رماه عليها ..
قاعدة تنوم فروحها .. رجعت لدار .. طيبت سباڤيتي .. عدلت طابلة و بدات تاكل بكل طمأنينة و هدوء .. حتا حست سطل ماء تكب عليها .. ناضت مفزوعة .. قلبها رجع يخبط فوور .. نفسها رجع متسارع كانو خلاوها تحت لماء شي دقيقتين او اكثر .. هدرت مفزوعة ..
لينة : شكون .. شكون راهو هنا ..
حط صبعو على شواربها بمعنى اسكتي .. حس برعشتهم .. و هدر ..
عزيز : شت .. انا لي نهدر هنا ..
سمعت صوت رجولي .. خشين .. نبرتو حادة .. عليها تمتم دورت وجها عليه باش تبعد يدو على شواربها و هدرت ..
لينة : اكيد لي جات مقبيل قرات هاد الامور من عندك ..
تصدم .. كيفاش عرفت .. خلاتو يتأكد انها مبعوثة .. لكن للاسف هي بريئة اما ذكائها عالي ..
تبسم .. محبش يبينلها انو مصدوم و هدر ..
عزيز : شكون قالك يا كتكوتة ..
لينة : نفس الجملة لي قالتهالي كي هدرت قلتهالي نتا ..
تبسم بإستهزاء لانو ماشي مصدقها ..
تقدم عليها اكثر .. رجع نفسو يخبط فوجها .. ترعبت و خافت وقت لي حست عليه .. رما يدو لوجها .. و حبط لقماش من على عينها ..
خزرت فيها اما رؤيتها ماشي واضحة .. يومين و عينها مغلوقين .. تشوف فوجهو اما ملامحو مكاش .. ضباب مسيطر على رؤيتها .. غمضت و فتحت عينها شحال من مرة .. حتا وضاحولها ملامحو ..
تحلو عينها على وسعهم .. و شهقت .. نفس الملامح .. نفس نظرة هاديك الليلة .. نفس الابتسامة .. و هي تخزر فعينه .. جازت هاديك الليلة الكل قدام عينها .. رجعت عاشتها من اول و جديد .. خافت اكثر ..
حس على خوفها .. بعد عليها بلعقل .. و هدر ..
عزيز : شكون بعتك ..
هدرت لينة مترددة : حتا واحد .. قبل ما تكمل هدرتها .. جاها كف ..
تفلق شاربها لتحتاني و ساح منو دم ..
جبد موس من جيبو و هي تشوف فيها مصدومة و عينها معبيين دموع ..
عزيز : للمرة ثانية شكون بعتك ..
لينة : ولله ما بعتني حتا واحد .. كنت جايزة م.. ملحقتش تكمل هدرتها حتا حست بلموس جاز على يدها ..
جات راح تعيط .. اما سبقها و غلقلها فمها .. و عيطت تحت يدو .. رجعت يدها تنزف و تحرق فيها .. رجعو دموها شلال .. جسمها كلو يرعش ..
تبسم معاها بشر .. نحا يدو من على فمها .. رجعت تتنفس بصعوبة ..
ركز معاها .. جانب صغير منو مصدقها .. اما الجانب لكبير ماشي مصدقها .. رجع هدر ..
عزيز : شكون بعتك للمرة ثالثة ...
〰️〰️〰️〰️〰️〰️〰️〰️〰️〰️
اوبالاتي 🔥
لينوش مسكينة بدات تتعذب .. زعما راح تسلك .. ملاكها الحارس وقتااش يظهر .. كيفاش راح تكون صدمة العايلة .. وشنو هو القرار لي بسبتو صرات قصتنا ؟؟
خلولي توقعاتكم طواااال عراااض ..
جمجمو الحلقات كاين لي راهم قريب 400 و كاين لي 300 مزال ملحقولهاش .. اطلعو جمجمو عميراتي
❌ تعليقات فالرد ❌
#ليلوشة
أنت تقرأ
⚜️ الأسيرة و المتدين ⚜️
Action⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
