⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 14 ||
حررت يدها .. تقعدت فبلاصتها مزال فمها و رجلها مغلوقين .. رؤيتها مضببة مقدرتش تشوف مليح ..
رمات يدها مور راسها .. بدات تحل فالقماش لي مربوط على فمها ..
فتحاتو و رجعت تكسلت فلرض .. حطت يدها على صدرها ..
خذات نفس عميق مرة و زوج و ثلاثة ..
رجعت تقدت بسيف .. رمات يدها لرجلها تحاول تحل رباط لي فرجلها ..
مقدرتش تحلو تعبت .. دوخة مسيطرة عليها ..
رجعت حاولت تحلها و بقات تحاول حتا حلتها ..
بعدت الخيط من على رجلها ..
بقات تحبي حتا حست بلي وصلت للحيط ..
وقفت و هي شادة فيه ..
حاسة جسمها ثقيييل .. راسها يوجع .. يدها تحرق ..
بدات تمشي ببطئ و هي شادة فالحيط ..
كانت تمشي حتا خبطت يدها المجروحة فالباص تاع الباب .. عيطت بلعقل .. طاحت فلرض ..
رجعت تبكي بصوت عيات .. كانت راح تستسلم .. فجأة تفكرت بلي خبطت يدها فباص تاع باب ..
رجعت وقفت بصعوبة .. شدت فالباب ..
و حوست على مساك فشعرها باش تحل لباب لانو دارت فبالها راهي مغلوقة بالمفتاح ..
هي غير حطت يدها على الباص تحلت ..
اييه نورا فليل حبطت تتفقدها نسات مغلقتش لباب فالمفتاح و طلعت ..
حلت لباب بلعقل و هي مزال ما تشوف والو .. قاعدة تشوف ضو بصح صورة مضببة ماشي واضحة ..
خطات زوج خطوات وصلت لدروج ..
قعدت فالدرجة لولة .. و بدات تطلع بلعقل و هي قاعدة كانو بيبي صغير اول مرة يطلع دروج ..
بعد ما كملت طلعت دروج ..
سمعت صوت هدرة تاع عباد .. خافت .. فكرت انو يكون عزيز و نورا .. وقفت مور حيط لي قدام صالون ..
الجد حكيم : عماد الدين ..
عماد الدين : انعم جدي ..
حكيم : بديت تحوس على واش قتلك ..
ركزو كامل معاهم .. و يسمعو فهدرتهم ..
عماد الدين : ايه جدي بديت نحوس .. نحاول ليوم نفري موضوع المحامي ..
رؤيا : جدي متخممش عماد الدين يفريها .. ريح روحك ..
دار عماد الدين خزر فيها .. هزلها براسو كأنو يشكر فيها و تبسم معاها ..
طارت بالفرحة .. اما قطع عليها فرحتها صوت وردة ..
هدرت و بحة لبكا فصوتها ..
وردة : القاو شكوون لي قتلي خويا .. شكون قتل كبدتي ..
و نزلو دموع سخونين على خدها ..
هي لي رباتو .. وقت كان صغير و يبكي يجي يغرس راسو فصدرها و يبكي ..
واقفة و تسمع فصوت هدرة .. بدات تحس روحها راح الطيح .. صوت هدرتهم بدا يبعد .. صوت نورا قاعدة تسمع فيها كانو راهي تهدر فوذنها ..
ملقاتش واش دير ..
بدات تجري بلا متحس لروحها ..
كان راح يهدر عماد الدين .. حتا شافو طفلة تجري .. و اووب حبست فنص الصالة .. وقفو متفاجأين .. نورا و عزيز مصدومين ..يشوفو فيها و دم ففمها .. تحت عينها زرقة .. يدها تنزف .. واقفة مقابلة لباب و تشوف فالفراغ ..
و اوووب طاحت فلرض .. تخبط راسها .. ثقال نفسها و فقدت الوعي .. اول واحد راح يجري ليها عماد الدين ....
〰️〰️〰️〰️〰️〰️〰️〰️〰️〰️
اوبالاتي 🔥🔥
اخبييييييييرا ابطالنا تلاقاو .. خلولي توقعاااتكم نحب نقرااا .. راني بلا كونيكسيو راني نحط بزيرو ولا دك نمد لميميش تحطهم .. مهم خلولي توقعاتكم
جمجمو كااامل الحلقاات ..
خلو كامل تعليق واااحد هنا غير نحط نجمجملكم كامل
#ليلوشة
أنت تقرأ
⚜️ الأسيرة و المتدين ⚜️
Acción⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
