⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 08 ||
رفد السنسلة و جا هابط موراها باش يمدهالها ..
حبط درجة وحدة .. حتى قاطعو صوت عزيز ..
عزيز : عماد الدين ..
دار عماد الدين عند عزيز .. خزر فيه و رجعلو ..
عماد الدين : انعم خالي ..
عزيز : سمعتك تعيط لنورا خرجت .. وي كاش ما تسحق ..
عماد الدين : طاحتلها سنسلتها .. عيطتلها نرجعهالها اما مسمعتنيش ..
تقدم ليه عزيز .. هبط هادوك درجات لي كانو بينهم و هدر ..
عزيز : مدهالي انا نمدهالها كي ترجع ..
رما عزيز يدو لعماد الدين .. حطهالو فيدو .. و جاز عليه طالع لشومبرة ديالو ( هههه طمعتكم بااطل اه مراحش يتلاقااو مزاال درتلهم لفاء شباب كيما ييحب الخاطر ) ..
تنفس عزيز بارتياح .. غلطة صغيرة كانت راح تفسدلو خطتو الكل .. علاجال طرف سنسلة قريب فاقولو .. تعصب بزااف لدرجة قطع سنسلة بين يديه بلا ما يحس .. و رجع طلع لشومبرة ديالو و غلق موراه لباب و قاعد يسسنا فنورا ترجع ..
بعد ما تلاقات نورا بعماد الدين .. كملت حبطت و تتلفت يمين و يسار باش تتأكد انو مكاش لي يشوف فيها ..
وصلت لباب لقبو .. رجع مقابلها و مقابلاتو .. خايفة ترمي يدها و تفتح لباب .. قلبها قاعد يخبط لدرجة انو قادرة تسمعو .. رمات خطوة لقدام .. زادت قربت اكثر للباب .. دخلت لمفتاح و حلتها ..
قاعدة هكاك مطلعة راسها مقابلة ضو تتحسس بيه .. و هي هكاك سمعت صوت مفتاح يفتح فالباب .. تتبعت صوت منين جاي و دورت وجها للباب و قاعدة تحاول تصيح و تعيط اما لقماش مخلاهاش ..
دخلت نورا للقبو .. قابلتها لينة و ضارب فيها طرف ضو ( اتخايلو شغل فالمسرح يكون مضلام و ضو على الممثل برك 😁 ) ..
تقدمت ليها بلعقل .. تقدمت اكثر حتا وقفت عند راسها ..
تسمع فصوت خطوات صباط .. صدى هادوك الخطوات قاعد يتعاود فالقبو بحكم انو فارغ .. معا كل خطوت تحس بلي تقدمت و قربت ليها اكثر .. حتا لحقت عند راسها ..
عم الهدوء فالمكان .. ما يتسمع كان صوت انفاسهم ..
جبدت نورا سلاح و يدها ترعش .. للحظة نسات كيفاش تشدو .. بقات سارحة و تخزر فيه .. افكار تدي و تجيب فيها .. غمضت عينها فور .. رجعت فتحتهم اما هاد المرة كانت فيهم قوة ماشي خووف .. خذات نفس عميق .. قدمت سلاح و حطاتو على راس لينة ..
كانت قاعدة تسمع فيها تتنفس برك .. مكانتش عارفة الحرب لي كانت داخل نورا .. اووب .. حست بحاجة باردة تحطت فوق راسها .. سرات الرعشة فبدنها .. حاولت تتوقع وشنو هاد الحاجة .. اما جات فبالها حاجة وحدة برك .. و لي هي سلاح ..
تسارعو نبضات قلبها .. رجعت تعرق .. و تتنفس بصعوبة ..
هدرت نورا و هي تخزر فيها و فكل حركة ديرها ..
نورا : راح نحبط لقماش من على فمك .. لوكان تحاولي تعيطي ولا تعلي صوتك .. يصرا فيك بضبط كيما صرا لراجل لي شفتيه ..
تهدر و منبهرة فروحها .. كيفاش جاتها القوة تهدر هاكا .. لدرجة رجعت تبان محترفة فالتهديد ( اه يا ملاكنا الحارس ويين راك .. ) ..
رجعت ظهرت صورة لؤي و هو يتقتل بين عينين لينة .. حركت راسها بسرعة تنفض فالافكار لي قاعدة تشوفهم .. و هزت براسها معنى موافقة ..
قدمت نورا يدها بلعقل .. فتحت لقماش و نحاتو من على فمها ..
تفتح لقماش من على فم لينة .. نسمة بااردة ضربت شواربها .. خذات نفس عميق .. مرة و زوج و ثلاثة ..
بعد هدرت و هي خايفة اما حاولت متبينش خوفها ..
لينة : علاش جبتوني هنا .. شكوون نتوما ..
نورا : انا لي نسقسي ماشي نتي .. شكون بعتك ..
لينة : كيفاش شكون بعتني .. وين بعتني ..
زيرت نورا سلاح على راس لينة و هدرت بنبرة حادة ..
نورا : شكون بعتك تتعقبي عزيز .. حكيم هو بعتك .. لمن قلتي واش شفتي ..
لينة : مرانييش فاهمة على واش راكي تهدري .. بصح كنت جايزة ملتما شفتو يقتل فييه .. قتلو بدوون رحمة .. مراحش نسكت كي نخرج منا بإذن ربي يتحاسب ..
للحظة جات صورة عزيز بين عنين نورا .. و لابوليس شادينو و داينو للحبس .. و هي و بنتها حاوزوهم مدار .. رجعو ميسالو واالو فيها ..
عصببت لدرجة رجعت شيطانة ماشي نورا ..
نورا : مستحيييل نخلييك ..
حكمت السلاح بزووج يدين .. غمضت عينها و اووب ضغطت على زنااد ....
〰️〰️〰️〰️〰️〰️〰️〰️〰️〰️
اوبالاتي 🔥
اولا سمحولي علابالي طولت عليكم تغلقلي الكونت ديالي و دك تفتح بصح منقدرش نبارطاجي سمانة صوو راني نخدم بهادا Leila OuaRas ابعتولي كامل انفي فيه ..
و دك نولو للكروو .. خلااص نورا بدات تمشي فطريق عزيز .. واش رايكم زعما تكوون تيرات على لينوش .. واش راح يصراا .. كيفاش عمادوووش يتلاقاها .. راهو قريب اللقاء الاسطوووي .. خلولي توقعاتكم طوااال عراااض
جمجمووولي كامل الحلقات نحب تلحقوهم ل 500 جام
❌ تعليقات داخل الرد ❌
#ليلوشة
أنت تقرأ
⚜️ الأسيرة و المتدين ⚜️
Hành động⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
