⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 13 ||
بان وجه لؤي .. كان بيض منور مشاء الله .. شواربو كانو حمورة كأنو مزالو حي .. ميبانش شخص ميت كامل .. تفاجأ كي شافو هكاك لدرجة شك انو مماتش ..
حط يدو على قلب لؤي .. اما ما حس بوالو ..
تبسم تبسيمة خفيفة و هدر معاه ..
عزيز : دايمن يقارنوني بيك .. دايمن انت لي ظاهر فالساحة و انا مكاش .. دايمن نتا الراجل و نتا الشاطر و نتا المسؤول و انا وليد باباه لي معتمد على دراهم باباه .. راك رحت نتا .. مزال توصلك كتكوتة صغيرة .. ( فهمتو شكووون راهو يقصد .. )
رجع غطالو وجهو .. و مشا متوجه للباب .. قبل ما يفتحها و يخرج .. رسم علامات الحزن على وجهو .. و خرج .. غير لحق عندهم حط يدو على عينيه كأنو راهو يبكي .. و خرج قبالة بدون ما يهدر معاهم كلمة .. تبعاتو نورا ..
لحق لطونوبيل ركب .. ركبت موراه نورا ..
عزيز : مزال حجرة صغيرة و حجرة كبيرة و يتحقق هدفي ..
نورا : شكون ..
عزيز : الشاهدة و حكيم ..
تصدمت .. يعني راهو حاب يقتل باباه تان ..
دورت وجها و قاعدة تخزر مزجاج تاع طونوبيل ..
هي لي قررت تمشي معاه فهاد الطريق و تساندو .. لازم تتخلص من احساسها بالندم ..
فهاداك الوقت دخلو شافوه كاامل .. و رجعو لطونوبيلات .. توجهو كاامل لدار ..
دخلو كامل يرقدو اما اغلبهم مرقدوش .. و طبعا عزيز مرقدش ..
حبط للقبو فتحو .. دخل لقاها مرمية كيما خلاها ..
جبد حقنة من جيبو .. فيها مخدر ..
حقنها بيها .. لانو عارف انو غدوة جنازة و لازم ميشغلش بالو بيها .. حقنها بمخدر لي يخليها راقدة لاكثر من 40 ساعة ..
خرج بكل هدوء .. غلق الباب .. و جا طالع فدروج .. و اوب سمع حس قريب ليه اما ماشي عارف منين .. تفاجأ .. رجع يلتفت موراه و قبلو باش يتأكد .. طلع يجري يشوف شكون لي كان قدام دروج لي يدي للقبو اما ما لقا حتى واحد ..
رجع طلع لشومبرتو و رقد بكل طمأنينة كأنو مصاري والو فدار ..
لحق صباح .. صوت القرآن يتسمع فكل ارجاء الدار ..
صالون معبي نسا .. كلهم لابسين اسود ..
وردة قاعدة فطرف تخزر فالفراغ .. عينيها مغرغرين بدموع و حموورة .. قدامها نورا .. عاملة روحها تبكي و تصبر فوردة ..
اما بالنسبة للرجال .. كانو قاعدين فبلاصة وحدهم .. الجد حكيم قاعد تما .. اما متحكم فدموعو ..
عزيز قاعد قدامو عامل روحو حزين و مصدوم و مقهور .. عماد الدين كان يستقبل الرجال لي لتما ..
جابوه و دفنوه .. عدات الجنازة بسرعة .. و خلاص النهار بسرعة ..
وصل الليل .. راح الغاشي لي كان تما .. قعدو كامل فصالون .. وردة حاكمة فيدها صور خوها تشوفهم و تبكي .. ( تقسم القلب 🥺💔 ) ..
نطق الجد حكيم و عينيه مغرغرين بالدموع ..
الجد حكيم : عماد الدين ..
عماد الدين : وي جدي ..
الجد حكيم : نسحق تكلف افضل محامي و تطلب افضل محقق .. لي قتل وليدي جيبوهولي حي ولا ميت ..
خزرت نورا فعزيز خايفة .. هزلها براسو يطمن فيها لانو مستحيل يعرفو بلي هو لي دارها ..
عماد الدين : اكيد عمي ..
رجع هدر و هو يخزر فيهم كامل ..
الجد حكيم : اطلعو لغرفكم ترقدو و ترتاحو تعبنا ليوم ..
هزولو براسهم كامل .. و طلعو .. كل واحد دخل لغرفتو و رقد .. اما عماد الدين فقعد يفكر ..
مكسل ففراشو حاط يد تحت راسو و يحاول يعرف اعداء جدو و افكاار مشوشة دور فراسو كل ما يتوقع حاجة و يحاول يحلها يلقا حيط ..
عماد الدين : استغفر الله و اتوب اليه ..
هز راسو .. نفض الافكار لي كانو فيه .. غمض عينو و رقد ..
لحق صبااح .. ناض كعادتو توضا صلى صلاتو قعد قرا شوية قرآن بعدها رفد pc و بدا يحوس على محامي يكون شاطر .. دا شحال من رقم باش يعيطلهم و يشوف شكون لي يخير فيهم ..
بعدها حبط .. لقاهم مجتمعين على طابلة كالعادة .. اما الحزن كان سيد الموقف .. قعد تما و بدا ياكل و يفكر ..
فالقبو .. بدات تفطن .. تحس فراسها ثقيل و يوجع ..
وجيعة كبيرة تحس فيها فيدها لي تنزف ..
رؤيتها مضببة .. حركة يدها و فجأت لقات لخيط لي مربوطة بيها مرخي .. حاولت تصحصح مقدرتش .. نزفت بزااف و عندها شحاال مكلاتش ..
حركت يدها بصعوبة .. بقات تحرك فيها فكل اتجاهات .. و اووووب تحرروا يديها ..
〰️〰️〰️〰️〰️〰️〰️〰️〰️〰️
اوبالاتي 🔥🔥
نعم سيداااتي سداااتي لقاء الاسطووري قريب جدا جدا .. اربطو الاحزمة و جهزوا روحكم .. خلولي توقعاتكم طواال عراض .. لعب بدا يخشاان ..
لي تقرا تخلي كومنتار هنا كي نزيد نحط نجمجملكم ..
#ليلوشة
أنت تقرأ
⚜️ الأسيرة و المتدين ⚜️
Akcja⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
