⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 50 ||
لينة : يعطيك الصحة لي وقفت معايا و ساعدتني مراحش ننساهالك ..
غاضاتو وقت تشكراتو .. بقا يخزر فيها متبسم .. شخصيتها عكس لحكايات لي حكاو عليها .. تصرفاتها و طريقة كلامها ميبينوش انها من هاداك النوع .. فجأة تعدات بين عينيه لحظة لي ورالها فيها تصاور و قاتلو بلي ماشي هي لي فيهم .. كأنو سطل ما و تكب عليه .. مش من عادتو يتسرع فاحكامو .. شك دخلو لراسو ..
قاعدة تخزر فيه متبسم .. حتا حست على ملامح وجهو تبدلو .. رجع دار و خرج مالغرفة بلا ميهدر حتا كلمة .. ستغربت فيه اما ممدتش للامر اهمية .. حط راسها على لمخدة و غمضت عينها تحس فراسها راح يطرطق بالوجع ..
راح لغرفتو .. رجع ذخل فالايمايل لي فيه تصاور .. حاول يغض بصرو قد ما يقدر على الراجل لانو عورتو مكشوفة ( و نتوما افهمو حشمت نقولها بالدارجة .. )
دقق مليح فيهم اما هي لينة لي فالصورة .. نفس الوحمة لي شافها موجودة فظهرها .. عرف انو مستحيل يقدر يعرف وحدو ..
هز تيليفون و عيط لصاحبو ..
عماد الدين : الوو سلام عليكم ..
نجم الدين : الو وعليكم السلام اخي .. ( ياااااس نجمووو تاع عشقت سلفي ههههه دخلتو فالوسط .. )
عماد الدين : لاباس ..
نجم الدين : حمدلله نحمدو ربي ..
عماد الدين : نجم الدين محتاجك .. مرة قتلي انو تعرف وحدة خبيرة فمجال اعلام الالي ...
نجم الدين : ايه صح صحبت مرتي ( هههه منار صحبت رحمة شفيتولها .. كملت قرايتها و رجعت تدور فالاعلام الالي .. )
عماد الدين : راح نبعتلك مجموعة مالصور .. امانة الله يسترك ميفتحهم حتا واحد من غيرها .. محتاجها دقق فيهم و تعرفلي الا صح ولا مخدومين ( شكك فمحلووو عيمادوش .. ) ..
نجم الدين : اكيد اخي راح نبعتهوملها و نرجع نعيطلك ..
قص تماد الدين لابال .. و راح يبعتهمىو .. تررد خايف انو شي واحد يشوف صور مرتو .. بعتهم لنجم الدين و نجم الدؤن وصلهم لمنار صحبت مرتو رحمة ( لي قراو عشقت سلفي راح يعرفو هاد الشخصيات ) ..
بعد مدة قصيرة .. رجع عيط نجم الدين لعماد الدين ..
عماد الدين : الوو ..
نجم الدين : عماد الدين .. قاتلك انو على مسألة نهار و نفريها يعني منا لغدوة فليل ..
فرح عماد الدين يعني المسألة مراحش طول .. متمني يسمع الاجابة لي حابها..
عماد الدين : يعطيك الصحة اخي ..
نجم الدين : العفو رانا صحاب ..
قصوو لابال .. و عماد الدين تكسل على سريرو يلكر فلينة لي ستعمرت تفكيرو ..
جازو ساعات و طاح الليل .. ناض مبلاصتو .. راح يتفقدها .. لقاها راقدة و معوجة ..
قدم ليها بلعقل و عدلها اما فطنت .. خزرت فيه و حطت يدها فيزوج على خدو و هدرت ..
لينة : ياا عمري عمادووش جا ...
〰️〰️〰️〰️〰️〰️〰️〰️〰️〰️
اوبالاتي 🔥
هههه زعما صح لينة قاتلو هكاك .. زعما راح يكتشف عماد الدين لحكاية و يخربها عليهم المهمة .. راح يلحق ولا يتأخر .. و عزيز راح ينجح ولا لالا ..
خلولي توقعاتكم كالعادة .. و كل وحدة تخلي تعليق هنا غير نزيد نحط نجمجملكم تعليقاتكم ..
نروح نغسل ماعن زدو نولي نكتب ليوم دالتي 🤣🤣 قربت النهاااية وجدوو روحكم للقنبلة ..
#ليلوشة
أنت تقرأ
⚜️ الأسيرة و المتدين ⚜️
حركة (أكشن)⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
