Masvingo

CHITSAUKO 14

"Rumbidzai ari kupi?" Ngoni akabvunza mupatya wake Makina uyo aingomhemhaira mupaseji.

"A-a, ave kutopfeva zvake naTangai", Makina akadaro.

"Unoreva Tangai shamwari yako here?" Ngoni akabvunza akaburitsa ziso.

"Ko kuzoita kunge usina kana hanya nazvo kuti mudzimai wako ari kushaisha?"

"Sei zvirikubata-bata iwe kupfuura ini?" Ngoni akabvunza asi Makina akaramba anyerere zvichida aibika shoko rekukanda.

Makina aiva murefu kunaNgoni saka kazhinji kureba kwake kwaizezesa Ngoni kazhinji asi akaswedera pedyo naye zvakadaro, akasimudza huso kumutarisa mumaziso.

"Inzwa sha, ndinozviziva kuti hatina kubvira takanzwana semapatya, zvichida seshamwari asi gamuchira chokwadi chekuti kunyangwe pasina zviripo pakati pangu naRumbidzai, usafunge kuti pane zvaangada kwauri", Ngoni akataura zvinechisimba.

"Sei zvirikuita sekuti urikutya kuti Rumbidzai anondida?" Makina akabvunza achiita seari kuda kuseka.

"Aiwa chikomana, handisi kutya izvozvo. Chandiri kutyira ndechekuti ungamuchiva nekuda kwemhando yemusikana wauri naye, saka unogona kuda kutsvaga ruvaraidzo kumwe", Ngoni akadaro achidzokera shure.

"Zvinorevei zvauri kutaura?"

"Bvunza musikana wako iyeyu wauri kuda kuroora", Ngoni akadaro achienda kukamuri yake.

Ngoni akasvikopinda mumba make akaona Rumbidzai ari pakati pekupukuta muviri netauro nyoro.

"Ko haugogodzi here?" Rumbidzai akadaro akafinyamisa huso.

"Ndaimbokubatsira kuzora mafuta wani", Ngoni akadaro achivhara setswa.

"Ehe 'waimbo'", Rumbidzai akadaro asingaboire.

"Nhai Rumbidzai chii chakakubata? Pasina nguva wakachinja kubva waoma moyo", Ngoni akabvunza achiita searikuda kuchema.

"Ndizvo zvandiri izvozvo zvandikaita asi nekuda kwekuti ndaipengeswa nerudo, handina kuzviratidza", Rumbidzai akadaro achidonhedza huso.

Ngoni akaenda pedyo naRumbidzai nechivimbo chekuti anoziva zvekuita kuti aseke. Akamubata muchiuno achifunga kuti Rumbidzai achazvida.

"Ngoni rega kudaro", Rumbidzai akadaro achiita seachashamatata. "Urikuti uri kuitei zvino?" Akabvunza zvine hasha.

"E-e Rumbidzai, ndichirikuda kuti isusu..."

Rumbidzai akamudambura asati apedza kutaura, "Ngoni haukwanisi kuwana zvose zvaunoshuvirira mukurarama, upenyu haufambi sekudaro".

"Ndiregererewo Rumbidzai, unoda kuti ndiite sei kuti uzive kuti chokwadi ndapfidza, handichakukanganisiri zvekare?" Ngoni akabvunza achigara pamubhedha.

"Hapana! Ndakakupa mikana kangani, he-e? Asi wakandibata semarara. Ngoni, ndaive musikana akanaka chose; handina kumbokunetsa ndichikukumbira mari kana zvinhu. Denga rinoziva kuti ndakakuda kunyangwe zvaisafanira; waindinyengedza, waindinyepera kasingaperi, wakandidhumhanisa kasingaverengeki", Rumbidzai akapopota.

"Ndakakanganisa, ndinokumbirawo ruregerero, Rumbidzai."

"Handikuregereri iwe Ngoni, uri kuzvinzwa? Munhu hauregereri hunhu hwemunhu, unoregerera zvitadzo zvavo", Rumbidzai akadaro ndokutendekuka achizvitarisa pachioniso zvekare. "Ndiri pano nekuda kwevabereki vako nekuvhara vanhu kwauri kuita kuti une musikana asi iwe usina; tikapedza izvi, kanganwa nezvangu nemunin'ina wangu".

* * *

Makina akatevera Ngoni kukamuri kwake kuti ajekese zvaanga ataura pamusoro pemusikana wake. Aive asiri munhu aida zvechinyeyo asi aida zvekutaura nemunhu zvoperera ipapo. Akasvika akaona gonhi rakavhurika zvishoma, akazvinetsa kuti opinda here kana kuti orega.

Chiriporipotyo, akaona musikana waNgoni, Rumbidzai akamonera tauro jena, pfupi richisiya panze makumbo akatsvukira zvainwisa mvura.

Makina kuda kudzokera, akaona Ngoni achienda kwaari ndokusvikobata muchiuno maRumbidzai. Akanyara nekuona izvi asi umwe moyo waidokwairira kuona kuti Rumbidzai achaita sei, asi chakashamisa ndechekuti haana kana kuvhunduka kana kupfakanyika.

Mushure mekunzwa zvose zvavaitaura, Makina akataura ega mumoyo make kuti, 'ndanga ndichizvinyumwa uye ndinozviziva kuti Rumbidzai ari kutambiswa bhora risina mweya nemunin'ina wangu nekuti ane meso meso kunyangwe zvake anga achiramba'. Makina akaramba akadongorera achiona zvose zvaiitika mukamuri maNgoni.

"Urikuitei ipapo?"

Makina akavhunduka kunzwa izwi richibvunza ndokubva adonhedza nharembozha, pakarepo akatanga kunhonga mapitsi enharembozha yake. "Ndiri kunhonga nharembozha yangu yandadonhedza", Makina akadaro akachonjomara.

"Une chokwadi?" Serina akadaro akamutarisa neziso raiti, 'une chokwadi kuti uri kuchiva Rumbidzai ini ndiripo here?'

Chiriporipotyo, Ngoni naRumbidzai vakanzwa ruzha pagonhi ravo ndokubuda mukamuri mavo. "Chii chirikuitika?" Rumbidzai akabvunza.

Makina akamedza mate zvakarira kunge dzetse ririkupembera kunaya kwemvura akayeva makumbo aRumbidzai.

"Murume atadza kuburitsa izwi", Rumbidzai akadaro zvekare.

"Tanaka!" Rumbidzai akazhamba.

"Watii? Tipfekerewo hembe shamwari", Tanaka akadavira.

Makina akaputika kuseka.

"Chii chanakidza ipapa?" Serina akabvunza.

"Wabva nepiko iwe?" Makina akabvunza.

"Ndinofanira kutobvunza iwe kuti sei uri pamusiwo pavo uchiyeva makumbo aRumbidzai", Serina akadaro zvine hasha.

"Hamungamupi mhosva Makina asikana, hamuiniwo here kuti musikana akapiwa gumbo rinonwisa mvura", Yeukai akadaro achireva Rumbidzai.

Makina akaona kuti hapachina kumira zvakanaka, akabva asimuka ndokuenda.

"Usasvike pedyo nemukadzi wangu!" Ngoni akadanidzira.

"Chokwadi, mukadzi wako", Makina akadaro achifamba kuenda.

* * *

Kudya kwamauro kwakapfuura zvakanaka. Rumbidzai ainzwa kufara nekuti aive abudira Ngoni pachena kuti anga asina kuuya kuzosasana naye kwete, asi kuzongonyadzurudzawo chete.

Rumbidzai aichiva zvaiitwa nababa namai Munyoro. Vaive vabereki vakatsiga vakasimba. Rumbidzai akati nechemumoyo, 'ndinoyemura kudzoredzera nekuyedza kubatanidza vana vavo'.

Vakagara vose vachidziya moto vachinwa hot chocolate kunze kwaBaba Munyoro, vainwa svutugadzike yemuringa.

"Ko tikazivana zvedu, pane chakaipa here?" Baba Munyoro vakadaro vachidzima chivhitivhiti. "Ngatitangei nemadzimai", vakaenderera mberi.

"Ndinotanga inini", Mai Munyoro vakadaro. "Zita rangu rakazara ndinonzi Tarisai Munyoro, ndiri amai, shamwari uye muwadzani. Ndinofarira kutsigidzira vechidiki pazvipo zvavo. Ndinoda vana vangu kusvika pakadzika-dzika pemoyo wangu uye zvose zvinovafadzawo."

Yeukai naTanaka vakachinjana kuzvizisa.

"Mai Mwana, chave chijana chako", Makina akadaro achitsvoda Serina pahuma.