لاجل عينيك سقطت في المنفى

البارت التاسع والستون

الكاتبة : عليا الناصر

لأجلِ عَينيكِ سَقطتُ في المَنفىٰ

البارت ال : 69

ماريا : دخلت لغرفة جراح ومحمد على يمينة وتمنت تلگاها موجودة ولحسن حضها كانت موجودة بالغرفة
نفضت ثوبها وبقرف وعلى شوي كانت راح تبچي قليل الحيا والله قليل حيا .. فصفصني تفصفص وكل شوي ومتنهد قليل الحيا لا وفوگاها يا خية يگولي شوكت بس .. وقلدت نبرته وعيونه الا شوية تطير وتطيحوا بصدري والله العظيم

يمينة : ضحكت عليها ههههههه هذا عقابچ من الدنيا على كل اللي سويتي بي واللي كنتي تسوينه بينا قبلوا من تقشمرينوا وتنصبين علينا من ورى اللي باللي بالچ شوفي رب العالمين شلون رزقچ بواحد ذابها عالساطور وكل شي عندو بالمشرمحي وهو اللي راح يكسروا لراسچ وياخذ حقنا منچ

ماريا : بغضب وإنزعاج وضح يخسي يكسروا لراسي وبعدين خلاص هونت ما اخذوا وأصلاً گتلوا ينتظر منا لشهرين هيچي ويطلگني وهو بعنادي يگولي عرسنا هذا الخميس وبعدين أني جاي أحچيلچ قهروا لگلبي وأشكيلچ حتى توگفينوا ويايا مو تتشمتينوا بيه يا خية والله هذا مشفوح عالأخير ومشمر سواعدوا ومنتظر يطبق بس ونظراته من هذي اللي يگولون عليها نظراتوا للذيب البشري وخبرتها بكل اللي صار بيناتهم

يمينة : نهرتها ماري شجاي تگولين إنتِ عاقلة وبوعيچ من گلتيلوا يطلگچ شنو إنتِ ماخذتوا للموضوع لعب يعني إنتِ أرملة والنوب تريدين تصيرين مطلقة هم حتى تكملوا وياچ عالأخير وترى هالخبال هذا محد راح يوافقچ عليه وغصباً ما عليچ وحتى لو إعترضتي وضربتي راسچ بالحايط راح يجبرونچ  تاخذينوا ورجلچ فوگ رگبتچ  وبلا ما تخسرينهم وتخلينهم يعادونچ من ورى هالسالفة هذي بعدين شبيه لساعوا شاب وباينتوا والله ميت عليچ وواگع على ملى وجهوا ومو أحسن ما تاخذين شايب يكحكح ورجليه واصلة للگبر لو تظلينوا گاعدة وحيدة صلي عالنبي بس ولا تهونين عنو وتتصرفين تصرف تندمين عليه بعدين

ماريا : تنهدت وهي تگعد عالسرير والله محتارة كثير وعقلي يگول شي وگلبي يگول شي ثاني بس والله ما أريدة يمشي كلاموا عليه ويتزوجني هالخميس هذا لأني لساعني مو متقبلتوا للموضوع وعلى الأقل أريد فترة لما أستوعب أني راح أتزوج من جديد ويرجع رجال يدخل بحياتي ولا تناظريني بشك خلاص والله هونت عن فكرة الطلاگ  يمينة دبريني شأسوي تراني مالي غيرچ أشكيلوا

يمينة : مالنا حل غير نكلموا لجراح والأفضل إنتِ اللي تكلمينوا وتشرحين إلو وجهة نظرچ بهدوء وگوليلوا لما تتقبلين الوضع وعلى ما تحضرينوا نفسچ وجهازچ وعلى شنو مستعجلين وعبالك يريد ياخذچ فصلية لو بالبوگة وأكيد راح يتفهمچ وإطلبي منو يبلغوا ويخليه لموعد العرس نفسوا بعد 3 أشهر لو 4 بس والله لا ينجلط المعنطز لو سواها جراح بي