نادر بصدمه: ايييييييه!؟؟؟؟؟
زياد : ومالك مصدوم كده ليه بقول عاوز امشي مهو ده مش بيتنا عشان نفضل قاعدين كده ومش عاوزين نتعبكو...
نادر : ايوا بس .....
عمار بمقاطعة : لا مفيش بس قدامي يا ضحى انتي وماما...
أحمد من بعيد بتوتر: استني عندك يا عمار انت ازاي تعمل كده؟
عمار : اعمل ايه يا بابا احنا مش عاوزين نتقل علي حد والا انت رأيك ايه؟
أحمد : ايوا طبعا انا عارف اننا كده بنتقل عليهم بس هنروح فين يا ابني احنا مطرودين؟
زياد في نفسه : انت ليه مصمم اني راكن الفيل برا يا بابا رغم انك عارف اني ممكن أشتري شقه خليني معاك للاخر ياارب افهم الحقيقه بقا..
زياد بسخرية : يا بابا اتطردنا ازاي بس مين اللي عمل كده اصلا؟
أحمد : جه امين شرطه يا ابني من كام شهر وانت ف الشغل وقال ان في انذار لسكان البرج انهم يخلوه عشان العماره مبنيه برخصه مزوة.
زياد متصنعا الصدمه : ايييه مش معقول؟
أحمد : زي ما بقولك كده يا ابني..
عمار باصطناع : ازااي الكلام ده يحصل طب وانتو عملتو ايه؟
أحمد : ولا حاجه هنعمل ايه جت امبارح قوه امنيه وقالو نفذ بالقوه الجبريه وطلعونا كلنا من الشقق وشمعوها بالشمع الاحمر وطبعا انت عارف عقوبتها ايه....
زياد وهو يرفع إحدى حاجبيه : هم 200 جنيه غرامه لو دخلنا تاني بس مش كل ما يشمعو ندخل وندفع 200 جنيه اممم طيب وانت ليه يا بابا مفكرتش اننا نقعد ف فندق؟
أحمد بارتباك : فكرت يا ابني بس لقيت عمك رأفت بيكلمني وقالي مال صوتك متضايق ليه حكتله اللي حصل ومسك فينا نقعد معاه لحد ما نخلص الموضوع ده.
عمار : امممم فيه الخير والله احنا متشكرين جدا يا نادر ويا جماعه واسفين لو هنكون بنتقل عليكوا........
نادر : لا لا ازاي تقول كده يا عمار ده انتو منوريننا والله؟
رحمه : طيب اطلع استريح انت يا زياد وعمار وهنبقي نشوف حل ف موضوع النوم ده؟
زياد : لا لا متتعبوش نفسكو يا جماعه انا كده كده ببات برا البيت ف الشغل ف مش هزعج نادر خالص...
نادر بابتسامه ومرح : يبقي انتو تاخدوا الاوضه شفت الصبح وانا شفت بليل...
