اكرهك ... فماذا لو أحببتك؟
الحلقة ( 4 )
دوشت و غيرت و لاول مره نحمد ربي 100 مره ع اني بنطلع🤭
انا: صباح الخير جميعا شن هالفطور يشهي
فاديه: من خير خوي ربي يخليه لينا
انا: يا رب
ماما: صباحك ورد بنتي
بابا: صباح الخيرات
فاديه: نادين !!!
انا: نعم عمتي
فاديه: لابسه و ين يا هادي
انا: احم ع الشركه
فاديه: العفو ما تقوليش حتى نقعد نساير عمتي ولا ما تعرفيش القدو
بابا: لا تعرف من زي نادين بس تو تهدرزوا لين تعييو
ماما: خليك نادين اليوم
انا: نروح بكري يا احلا ماما اطمني
و نضت و خليتهم لحقتني ماما
ماما: نادين
انا: عارفه شن بتقولي ما كملتش شهر ف الخدمه لا نقدر نغيب ولا نقدر ناخد اذن تمام
ماما: تمام لاكن ما نبيش المشاكل
انا: ولا يهمك الامور تحت تصرفي و بتهزب عمتي انا واتيه
طلعت من الحوش ولعت السياره و قعدت ندعي يصبرني ع عمتي و ميسون ما نبيش نفقد اعصابي و تطلع ف وجهي هكي و عمتي ما تسكتش
وصلت للمكتب ولقيت دعاء و رهف
انا: رهف فرحت الي جيتو😘
انا: دعاء نورتي 😘الحمد لله ع سلامه امك
دعاء : الله يسلمك
انا: كيف حالها توا؟
دعاء : الحمد لله
كان باين عليها الحزن و التعب و وجهها اصفر ما حبيتش نكثر عليها الاسئله
رهف: اسفه امس خليتك بروحك
انا: عادي الظرف يحكم و حتى انا اليوم جيت بالف واسطه
رهف: خيرك
انا: ابدا عمتي عندنا و تبيني نقعد
رهف: شكلها تحبك هلبا
انا: هلبا هلبا
و بدينا في الشغل كالعاده
دعاء: روح المدير !
رهف: لا
دعاء : نبيه ضروري
رهف : خير شن في
دعاء : علاج امي بيطول و انا ما نقدرش نخليها
رهف: اسبوعين و يروح ان شاء الله
دعاء : حيمروا اطول اسبوعين عليا
رهف : ربي يعجلك بالخير
دعاء: يارب ........نستأذن يا بنات نشوفكم ع خير
انا: يا رب
رهف: وجعتني
انا: هلبا
اكمل الدوام و روحت الحوش
عمتي : هذا غر بتروحي بكري
انا: انشغلت شويه شن جوك ميسون
ميسون : بخير
انا: عن اذنكم ندوش و نصلي و نجيكم
طبعا ما ردوش عليا
ركبت و فتتهم
ماما كانت في المطبخ هي و خالتي نوال
خالتي نوال: بيجيبهالي هالعنايدي يا حليلي شن بندير
ماما: و شن هو الي يندار بنت بتحبسيه باش ما يتزوجش
خالتي نوال : باهي هذا كلام من بلادنا وًمن دينا و تطلع ما تنفعش مرات
ماما: مش اختياره و نصحتيه يتحمل النتائج
خالتي نوال : حرقه في قلبي هالنار شن بيطفها
ماما: خير ما اتزوجها و جابها و حطك قدام الامر الواقع اقل شي مرات يتغير رايه قاعد في امل
خالتي نوال : ربي يهديك يا وائل
ماما: ايوااه ادعيله بالهدايه و معاش تنكدي وخيتي
وبعدين نوضي عطلنا ع فاديه
خالتي نوال: من همي نسيتها و نسيت الفرخه جنى وين مشت
انا ركبت لداري و لقيت مفجأه حلوه : جنجونتي تاحشتك
جنى : انا اكتر
انا: يالله ع العسل
جنى بنقولك حاجه في ودنك ( انا وطيتلها) نبي نبات معاك كلمي ماما
انا: تي حاضر من عنوني و انا قداش عندي جنجونه و حده بس يا حبي ليك
جنى كشرت
انا: خيرك
جنى : ياريتك انتي اختي مس البارده ريم ما تحبنيس
انا: اتحبك بس هي بارده شويه زي ما قلتي
جنى : نحببك و حضنتني
انا: حبيبي تستنيني خمس دقايق ندوش و نصلي و الي تبيه مني حاضر
جنى: خمسه بس مس تعطلي هيا تساو بننزل
انا: اه من العسل روحي فها
و انطلقت الى الدوش
و بعد نص ساعه نزلت لقيت الكل مقعمزين و يشربوا في القهوه
و اول ما قعمزت جت جنى في حضني لين رقدت
عمتي: خيرك يا نوال ما جبتيش بنتك معاك هي شن اسمها انسيتها
خالتي نوال: ااسمها ريم عندها امتحان
انا والله و دارتها هالريم و ما جتش
ميسون و هي قالبه وجهها يا ماما مش قلتلي نادين بطلعني
انا: حاضر من عيوني خلها يوم الجمعه نطلعوا مع البنات ريم و ميس
عمتي؛ حتى ااجمعه كويس المهم اطلعها
خالتي نوال : انا بنروح توا
ماما: اقعدي تعشي معانا
خالتي نوال : لا صحتين
انا: خالتي خلي جنى تبات عندنا
ماما: اي والله اهي راقده
عمتي: حتى تلعب مع الصغار
خالتي نوال : باهي خلي تقعد هي سلامتكم توا
جنى: روحت ماما
انا: ايه روحت😮
جنى ضحكت
انا: يا سوسه ما كنتيش راقده قداش ما كنا نديروا فيها و احنا صغار😂
ماما: هههههه
