اكرهك ••• فماذا لو أحببتك؟
الحلقة ( 18 )
جففتلي شعري
و انا من التعب خلاص بنرقد
عدلتلي المكيف و غطتني و سكرت الضي و الباب و طلعت
جوري : ياريت اطل عليها مره مره
محمد : شن وضعها
جوري : كويسه ورقدت
رد بالك عليها واضح انها بنت كويسه ومش زي ....
قاطعها :تصبحي ع خير
جوري و انت من اهله
و طلعت
اكتفى بتوليع الدخان واحد ورا الثاني يبي يطمن عليا و ما يبيش
و بعد ساعات ناض و خش الدار بهدوء تام
شافني راقده اطمن
حط ايده ع جبهتي و لقي ما فيش حراره
طلع و سكر الباب
انا فقت ع صوت الباب
طلع و لوح جسمه ع الكنبه و رقد
••••••••••••••••••••••••••••••••••••••••••••••••••••••
وائل : لازم نسافر معاش طايق نقعد دقيقه
خالتي نوال و هي تبكي : لاش يا ولدي تقطعلي في قلبي و تحرمني منك و من اني نشوف صغارك
والله فاض بيا تبي تجي تحضر جنازتي
وائل : بعد الشر عليك
خالتي نوال: بالغالي الي عندك ما تسافر خلاص
وائل: وااااك
و ركب لداره و خلاهاا
••••••••••••••••••••••••••••••••••••••••••••••••••••••
الصبح فقت و انا مرتاحه شفت الساعه لقيتها 9
حسيت بالجوع
طلعت من الدار خديت شكلاطه و عصير
الامير قاعد راقد ارتحت
رجعت للدار و قعدت ناكل
و اتصلت جوري
انا: الو
جوري : نضتي صباح الخير
انا : صباح النور
جوري : كيف حالك
انا: الحمد لله احسن
جوري : اكيد جعانه
انا: ايه هلبا ناكل في شكلاطه
جوري : سيبي الي في يدك جايبتلك الفطور
انا : تمام
ناض محمد
و خش الحمام
فتحت الباب لجوري
حطت الفطور ع الطاوله
جوري: قعمزي
انا قعمزت
جوري : محمد محمد
انا: في الحمام
جوري : سمي لبين ما جي
محمد : صباح الخير (بدون ما يشوفلي)
جوري : صباح الورد قعمز
محمد : عندي شغل
و خش غير حوايجه و طلع
انا كملت ماكلتي و لا عبرته
جوري : معليشي حبيبتي اكيد شي ضرروي
انا: ايه مقدره ( لو تعرف جوري نتمناه ديما طالع)
جوري : هيا ننزلوا ؟!
انا: نغير بس
لبست قفطان ازرق و شاح بين الازرق و الوردي
نزلنا لقينا خالتي مقعزه الصاله
انا: صباح الخير
سعاد : صباح النور كيف صبحتي
انا: الحمد لله كويسه
سعاد : فطرت كويس ياجوري
جوري : ايه الحمد لله
سعاد : حوشكم يوتى حاجه اسبوعين يا بنيتي
انا سكتت
سعاد : نادين شن تبي انديرو الغدا
انا: ما عنديش حاجه معينه نبيها
سعاد : امالا انديرو رشده كسكاس
جوري : يا سلامم😍
شويه و خش مهاب
مهاب : عرفونا
جوري : يعني من بتكون اكيد نادين
مهاب : لا ( و اشر لجوري قوليلها انا من)
جوري : هذا مهاب خوي الصغير
مهاب : والله و عرف يختار محمد
انا اتحشمت
سعاد : مهاب تعالى نبيك الحقني للمطبخ
مهاب: معليشي اكيد تبي مساعده مني
انا و جوري :هههههه
الواضح ان مهاب نقيض محمد
