اكرهك •••فماذا لو احببتك؟
الحلقه ( 8 )
••••••••••••••••••••••••••••••••••••••••••••••••••••
يوم الاحد مجهزه روحي و بنطلع للشركه
لابسه ماليا طويله حنيه و سروال بيج و وشاح بين الحني و البيج
ماما: استني حطيني في حوش خالتك
انا: يا ماما بنتأخر معاش وقت
ماما: خمس دقايق شن بيصير فيهم
انا: ماهو الخمس دقايق ممنوع التاخير فيهم مهمات
ماما: معليشي مش كل يوم بتتآخري
انا : حاضر يا ست الكل
وو صلنا حوش خالتي
ماما؛ انزلي سلمي ع خالتك
انا: متأخره سلميلي عليها
ماما: باهي ردي بالك ع روحك ووما تجريش
انا: خاضو
وفعلا صار الي تبيه ماما
و من الزحمه اتأخرت نص ساعه ع الشركه
وصلت و اخيرا
رهف : وينك وينك
انا: ماما حطيتها ف حوش خالتي و علقت ف الزحمه
رهف: جيتي ف وقتك ف اجتماع و ما حبيتش نقوللهم انك مش موجوده
هيا بسرعه
انا : تمام (طبعا رهف ما فهمتنيش طبيعه الاجتماع ولاني متأخره اصلا ما حبيتش نسألها )
و امشينا بس مش لقاعه الاجتماعات و هذا الي استغربته لمكتب فخم و كبير و بحكم اني جديده قلت اكيد نظامهم هكي
و كالعاده نستنى نستنى ف استاذ علاء و مع اني مش فاهمه سبب الاجتماع و خاشه عليه بدون مقدمات😂 فرهف ما نستش تجيبلي اوراق و ملف متع اني مجهزه مسبقا مش عارفه لولاها شن صار فيا
وبعد انتظار دام ربع ساعه خسيت بملل و قعدت نتصفح ف الملف الي قدامي
وماهي الا لحظات
ونسمع صباح الخير بس مش صوت علاء
..........: انا مجتمع بيكم اليوم وسكت ( ايه صوت المدير )
شفت لمكان الصوت و نتفجأ بــ
الشخص الي درت معاه الحادث او الي بعد شوي درت انا وياه قول
قعدت مش مستوعبه دقيقتين و انا نشوفله و معاش نسمع فيه شن يقول
رهف حست عليا نخصتني من تحت الطاوله
.........: و نظرا ل اهميه قسمكم و للتطورالرهيب لمستوى مكتبكم وللدقه العاليه و استاذ علاء كان متتبع سير عملكم بشكل ممتاز فقررنا ان مكتبكم يكون بجانب الاداره يعني مهامكم حتكون اكثر من مراجعه حسابات بل ملفات الشركه بشكل كامل و كذلك الصفقات و ما يخص اي تدقيق
و كمل استاذ علاء: صح الموضوع اصعب من قبل و هذا يتطلب مجهود اكثر بس هو ترقيه و سبب الترقيه المستوى الي يا ريت كل اقسام الشركه توصله
........: اي سؤال بخصوص الموضوع
( طبعا يتكلم بوقار و هدوء وعارف بالضبط شن يقول و كل الي نفكر فيه هل اذكرني او لا و ندعي يارب لا و ان شاء الله ما يذكرني 🤲🏻)
رهف: استاذ عندك علم ان دعاء واخده اجازه بسبب مرض امها و الحق صعب ع مكتبنا بموظفتين يدير كل الي انقال
........: بالنسبه لدعاء فهي معنفيه و حيجي حد ثاني يستلم بدلها
و انصدمت انا شكله فصل دعاء مش انساني ابدا و مع ذلك معاه حق قانون العمل و قانون النجاح قانون القسوه هكي يقول
........: لو معاش في اسئله اتفضلو ع مكاتبكم و علاء حيفهمكم كل التفاصيل
طبعا طلعت و لا قادره نشوفله ميته حشمه منه
ومن الصدمه حتى رهف ما حكيت معاها
و بعد نص ساعه جي علاء
ملخص كلامه ان مكتبنا حيتحول فوق قريب ع الاداره و اعطانا التعليمات الكامله
