اكرهك ••• فماذا لو أحببتك؟
الحلقة ( 9 )
لقيت ماما موتيه العشا
انا: ميته جووع باهي الي واتي
ماما: غيري وًتعالي كولي
انا : والله ما عاد فيها يا نبع الحنان بنغسل ايديا و نجي ناكل قبل
ماما: نادي بوك في المكتب
انا:
من زينا بابا بيتعشى معانا اليوم
ماما: مش عارفه شن عنده في هالمكتب حتى غدي ما تغدى من الضهر حابس روحه
ماما:ما تخافيش نعرف نطلعه بطريقتي😉
ماما: و من يقدر بنت عسسسل زيك
وكيف حطيت ايدي و بنطق ..:..... ونسمعع
بابا: مستحيل هكي الشركه حتخسر سمعتها
بابا: من بيرضى يشاركني
بابا: باهي ع الاقل سلفني هالمبلغ
بابا: عارف انه كبير بس نبي ندفع المرتبات
بابا: شركتي معروفه بس لولا الاختلاس الي صار كان وضعها احسن من هكي
و فتحت الباب و انا عيوني معبيات دمووووع
بابا انصدمم .... وسكر الخط
انا: ليش ما قلتليش؟
.... مش انا بنتك
ليش ما تشاركنيش في همك زي ما تشاركني ف الوقت الحلوو
بابا ساكت
انا: ليش تعاني بروحك ...... قولي شن صار فهمني
بابا: موظف عندي من خيره الموظفين و كفؤ اختلس مبلغ كبير و المبلغ هذا حطم الشركه
ادينت و ادينت لحد الكل رفضوا يدينوني و بدو يطالبو فيا بديونهم و سمعه الشركه ع المحكك
انا: بابا انبيعوا كل شي سياراتنا الشاليه الي في مصر كل شي كل شي مستعده من غدوا نبيع كل شي حتى حوشنا
بابا: مستحيل
انا: ليشسش
بابا: مهما بعت لا يخلص الديون و لا يعوض خساره الشركه
انا: بابا وريني الملفات و لازم المحامي
بابا: ما فيش حل المحامي من الناحيه القانونيه لطالما ما لقوش المختلس ما في شي يندار
انا: مستحيل
بابا: قررت نبيع الشركه
انا(و اهنا اتحطموت احلامي): بابا
بابا: و الي بيشريها مش حيعطي فيها هلبا لانها خسرانه
انا: فداك المهم نتخلصوا من الدين
بابا: يقعد القرض الي مهما نحاول مش حنجيبه
و حنحبس
انا: ما تقولش هكي خليني ندور حل و نشوف اكثر من محامي بابا اكيد في امل
و نسمع في صوت ماما تنادي
بابا: هيا يا بنتي و ما تحسسسيش امك بشي
امسحت دموعي و امشينا لماما
و خليت الوضع طبيعي قدر الامكان
ماما: مش قلتي جعانه!!!
اناسارحه
ماما بصوت عالي : ناديييين
انا: اه نعم
ماما : كولي بيبرد العشا
بابا: نادين حبيبتي( و ابتسم)
انا ( ابتسمتله)
و بعد العشا خديت الملفات لداري
و بديت نقلب و نقلب و نقلب و الي فهمته منهم ان الموضوو معقد
اتصلت بميس نبها تعطيني ايميلات محاميين
ميس: باهي شن تبيهم
انا: بعدين بعدين ابعتيهم و نقولك
و بعتتهم
و بعد ساعتين
ثالث محامي و نفس الكلام
و زادت صدمتي لما عرفت قيمه الديون و قيمه القرض
المبالغ هادي تحطم اكبر الشركات فيما بالك شركه متوسطه
ما اوعيتش ع روحي لين اذن الفجررر
استغفرت و نضت توضيت و صليت
و النوووم مباش يجيني
انا( حتى لو انبيعوا كل شي مستحيل نوفروا المبالغ المطلوبه )
شفت الساعه لقيتها 7
ولاني ما نبيش نشوف بابا ولا ماما غيرت و طلعت
و اتصلت ب استاذي ف الجامعه وقالي قابليني بعد ساعه رفعت كل الاوراق
و امشيتله
