اكرهك ••• فماذا لو أحببتك؟
والله مقدره تعلقكم بالروايه بس خليكم صبورين شويه ما نبيش نستعجل و تفقد جمالها هالايام هادي تعبانه شويه و باذن الله نعوضكم
الحلقة ( 14 )
طلعت من المكتب و نفكر في جنونه و غروره
شن الي يخليه هكي يتصرف شن يخليه هكي يقولي ليش متأكد و زعما قراري صح ولا غلط
رهف: نادين وين سرحانه
انا: معاك
رهف : ماهو واضح خيرهم عيونك حمرر
انا: مش راقده
و اتصلت ريم و اول ما انفتح الخط : اسمعي ما فيش اعذار بيان ميس غدوا ولازم نشرو قفاتين
انا: قصدك انتي الي تبي تشري
ميس : ايه باهي و انتي بطلعيني اقلها تراضيني و تكفري ع ذنوبك
انا: حاضر حاضر بدي فها حتى ذنوب
رهف: ما تبيش تقولي شن في
انا؛ ورانا شغل بعدين نحكو
طول الوقت و انا بالي مشغول بمحمد و رهف لاحظت اني مش معاها بس خلتني ع راحتي تم الدوام و روحت و كنت متوقعه محمد يتصل او يدير اي شي بس الحمد لله خطاني و ريحني
خشيت للحوش و لقيت ماما تلعب في صهيب و منسجمه معاه فرحت و ارتحت قداش ما كنت واكله همه
اتصلت بريم نبيها توتي روحها و نطلعوا و هذا الي صار شرينا قفاتين و غيرت جوي من النكد الي عايشاته
و انا مروحه و اول ما خشيت الحوش
لقيت صدمه تستنا فيا
محمد و وين في حوشنا
و الكلام الي سمعته منه ذبحني
محمد: انا نحب نادين و نبيها ع سنه الله و رسوله بس هي بسبب الظروف الي تمر بيها قاعده تأجل في موضوع خطوبتنا وتقولي لين تنحل مشاكلنا و انا جايك اليوم باش تحكمي بينا
ماما: ما نرضاش ان نادين توقف مستقبلها ع خاطر المشاكل الي نمروا بها بالعكس نبي نتهنى عليها
وتكون مع حد يستاهلها
انا: ماما
ماما: نادين تعالي
ليش ما حكتيلي ع محمد و ليش تأجلي في موضوعكم
انا بعصبيه : ما في شي
و قاطعني محمد: معليشي ممكن تخليني انا و نادين بروحنا اكيده زعلانه مني لاني حكيتلك بدون ما نقوللها
ماما: باهي خودوا راحتكم
انا: شن الي قاعد ادير فيه
محمد : ما شفتي شي و الي جاي اكثر و لو توا ما عطتيني الموافقه حندير الي عمرك ما توقعتيه
وسمعنا صوت ماما : نادين يا نادين
انا انخلعت : شن في
ماما: بوك يانادين في المستشفى
و نزلت ولعت السياره و قعدت نستنى في ماما
و وصلنا للمستشفى
ولقينا بابا في العنايه
وجي الدكتور المسؤول على حالته
ماما: خيره احمد يا دكتور
الدكتور : جلطه للاسف بس الحمد لله خفيفه
انا: بس بابا ما عنداش الضغط
الدكتور : ايه ما هو سببها الحاله النفسيه
انا : نبي نشوفه
الدكتور : ممنوع ل بعد 48 ساعه
نستاذن و ان شاء الله لاباس عليه
ماما: روحي و انا حنقعد اهنا
انا: بس يا ماما
ماما: صهيب بروحه ولا نسيتي
روحت وانا في صراع حل كل مشاكلنا نوافق ع محمد كلمه تخلي حياتنا افضل و بابا يتخلص من جميع ديونه و حتى لو خسر الشركه المهم انه يكون حر و لازم يتخلص من الظغط النفسي و عشان صهيب ما ينحرمش منه
