اتصال محطم

البارت الرابع والثلاثون

نيران/
دخلت اول عمليه الي أول ولاده ألي وآني منهاره
جسديا بسبب أشهر العمل ونفسيا بسبب الاوضاع
المرينه بيها.

تاركه خلفي زوج أعرف كلش زين هو بحاجتي مو لأن محد يداري بالعكس الكل تركضله لكن نفسيا

يرتاح بوجودي وهذا الي الكل ملاحظه.

صاله العمليات لو ندخلها الف مره تبقى الها رهبه
واني كوني اول مره الدمعه واكفه بطرف عيني

رغم حالته وضعه لكن مقبل احد يفرض شي عليه
افضل وانظف مستشفى دخلني مقصر بشي ابد.

..............................

تصدكون اذا اكلكم بس فتحة بطني محاسه بيها
يعني كلولي نص بنج بس متوقعت هيجي بكلشي
أحس.

يلعبون ابطني وشي أحسه يجرون بس عيوني مسدوده مالي سيطره على جسمي وسمعت صوت طفل يبجي.

اي والله هذا ابني يصرخ يصرخ.....اسمع وحده تكول
صدقه شكد حلو هذا..

عيوني ما اكدر افتحها ......حلكي بي الصونده وريكي احسه مجرح اريد اكلهم بطني توجعني بس ماعرف ليش ما اكدر احجي.

الظاهر راسي يتحرك يروح ويجي...يروح ويجي....
وحده كالت دكتوره يمكن حاسه المريضه. !

_ طبعا تحس نص بنج....

هذا كله حاسه بي هناك وصرخت بداخلي يخيطون بطني.... ألم ألم بديت أحس كلش أكثر شي محسيت بس من فتحوا بطني لكن الباقي كله حاسه بي

بسبب صعود الضغط وعدم استقراره وضعف نبض الطفل والوقت المحرج اضطريت ادخل عمليه شبه كاعده وحاسه بكلشي.

وبعدين الدكتوره كلتلهم فرغوا الهوا.....لا بعد هنا متحملت لان وكعوا لبطني ظغط..ظغط..ظغط...

والظاهر فعليا أغمى عليه لان وين حسيت بالافاقه اني..

ورديت حسيت بالغرفه بس شنو احس راسي طبل...

هذا صوت امي واختي واخويه....اسمع والدي يمكن

يخابر يكله صحت بس بعدها مواعيه علينه.

هناك واسمع صوت (الارمله السوداء)  حماتي...

............................

اختي تحاجيني ولج كعدي نيران ولج شوفي ابنج يخبل يخبل احلى كل الجهال ..

نيران/
حاجيتها كوه.... فحصتوه شفتوه زين...

  _  اي اي ولج عجينه هذا بس نايم مدبدب نسخه منج  ممعقوله الشبه ...

دكعدي صحصحي مو رجلج خطيه افتت صار كم مره يخابر ونكله بعدها.

  _ صحيت تمام بس اون اون من الوجع شي اول مره أشوفه واحس بي أكثر من تحملي
صيحولي الدكتوره راح أموت صيحوها.......

والدتي /
خيرج بنتي.

  _ العمليه كلها توجعني آخ.....آخ  الوجع خبلني .