اتصال محطم

مشاهد

_ اليوم صبحنه ساعه بالعشره الصبح.
يا شنو هاي شبساع طار الوقت .... يمعود كوم مو دتروح على الدلال.

_ اه ... دخليني نايم شبيج ... دتعاي نامي انتي هم.

_ طفرت دكوم أمشي نروح نتريك ونروح مناكه عليه قابل جايين أنام.

_ ديله كومي لعد.

_ لبسنه وطلعنه رحنه اول على الدلال وكله ب4 تعال للشقه شوفها مره ثانيه.

_ ليش كتله ب 4هو رايحين نتريك.

_ يمعوده امشي نتريك مادري حيصير غده نروح لكزلاي لو جنقايا.

_ وفعلا رحنه مبقينه مكان فر ... فر ... فر .. تاليتها يله يمعود تعبت وجعت.

_ هسه أطببج احسن مطعم يمعوده أصبري..

_ والله وطبينه مطعم بجنقايا بس هنا المطاعم تجنن .

.
.
.

ونزلنه نزلت الزينه على الاكل لحد مكلنه بس.

_ اكلج عيني كملتي هذا الدلال يكول واكف اباب العماره.

_ وركبنه تكسي راسا ذبنه يم العماره صعد الدلال وشاف وصور وطلع .

_ ها راح..

_ اي راح.

_ زين خليني انام شويه رجلي خيوط ترى.

_ اي والله تعالي تعالي أفركلج تعبتي.

_ عوفني ترى أروح أنام بغرفه الولد.

_ لاوالله واني شينيمني شو تعاي.

.
.
.
_ وهيجي مرت أحلى خمس ايام من صدك جانت راحه الي منو ميريدها بدلي ومطعم وفريره وبدون طبخ وكنس ومسح ومسؤولية البيت والجهال .

بس يمتى اني دامتلي الضحكه لو الراحه لاوالله مدوم.

_ اليوم الخامس ألنه بأنقره باليل ب11
حبي وقتي التلفون حتى باجر نكعد من وكت أريد  نروح لمدرسه حمو رابي أشوف الشهاده الدوليه بلكت بيها باب منا منا نروح ونشوف.

_ تمام ان شاء الله .... بس نام انت كلشي ينحل.

بين النايمه وبين الكاعده لاوالله نايمه أسمع بجي فتحت عيني الغرفه ضلمه هندس الجف ميبين رديت غمضت.

كلت خاف تخيلت رجعت غمظت....

هناك وعله الصوت بجي تشهنك شنو هاي خفت والله.

جريت التلفون من الكومدي علكت الايت لان من  أنام أرقب حتى ضوه البالكون يطفي يكول خاف نشرف.

انداريت  .... تفاجأت  .... نصدمت ... حلكي رجف

شنو هاي رجلي منتجي على ضهر الجربايه ويبجي.

_ يايا شكو خير عيني .... كمزت علكت ضوه الغرفه شلكيت وجه رجلي احمر على ازرق ماعرف اوصفلكم شلون بس ماكو نور محمد بوجه وجه أظلم چان مخيف ومرعب .

العيون حمر دم .... وتكت دموع مو طبيعيه شبيك يا ستار منو خابرك.

أرقب .... أرقب ...

  ماكو جواب منه ....  شال أيده يضرب على راسه شلون اليلطم .

هنا تخبلت كلت أكو شي صار بيتي بالعراق
أحجي كول أرقب أهلي أهلك  الجهال منو مات نشف دمي

أحجي القران عليك فدوه لطولك احجي ميجاوبني ومستمر بالدك على راسه .

كوم وأضرب راسك بالحايط بصف الجربايه
لك عيني كول منو راح ....

هناك ولزمته من أيده لان فلشه الراسه بالحايط   خفت عليه ليتخربط وين اودي ساعه ب4  ونص الفجر وأني وحدي ...

بس لزمته  ... عاط

_ لج  نكسه لتتتتللللزززمممييينتني انتي   نكسه لطخيني بأيدچ النكسه .