اتصال محطم

التكمله

‏"ضغوط الحياة حوّلتنا إلى أشخاص آخرين
تغضِبنا أبسط المواقف .. وتستفزنا أتفه الكلمات .. وحين نختلف نفسد كل قضايا الود ..لقد تغيّرنا.... ما عُدنا نشبه حتى أنفسنا..فلا تسألوا أحداً عن سبب التغيير ، فكل واحد منا له واقع مؤلم يعيش فيه.

...............................
.
.
نيران/
قررت من بعد اتصال ام عبد الله ان ارجع لبيتهم مو اله اكمل اربعين يوم...خرب حظي حتى بنفاسي ما تهنيت ورتاحيت جسمي ونفسيتي كلها توجعني.

بلغت والدتي بالرجعه مانعت وبشده

الوالده/
كرايبنه يجون عيب بنتي شنو قصتج قابل جايين عليه وناطين خبر....

المهم طولت زيارة الأقارب لحد واحد وعشرين يوم من ولادتي بعد متحملت لان ممرتاحه للوضع هناكه  .

باليل خابرته.

نيران/
الو

أرقب/
هله شلونج وين ملتهيه عني.

_ لا والله خطاطير وابنك يستلمني.

  _ هف ....

  _ شبيك..

  _ ماعرف محتصر ممتعود على كعدة البيت وانتي ماكو كلها التمت عليه.

  _ يعني ضايج تريدني اجي.

  _ اي اريدج بس شيجيبج هسه بعدلج بالعشرين يوم.

  _ واليجيك من باچر
  ( اني اصلا مقرره بس افضل براسه) .

  _ تحجين صدك.

  _ يله باجر وره الغده دزلي سياره تمام.

  _ اكلج مو شقى ترى.

  _ والله شبيك أريد أرجع .

  _ ههههههه يابه نور نور البيت....باجر يمج ليش متجين الصبح تعالي تغدي ويايه .

  _ لا ماريد الصبح يثبرني الصغير واني اصلا مشبعانه نوم.

  _ تمام عيوني براحتج كملي وخابريني تلكين السايق يمچ .
.
.

والله وخلص اليوم وأجه ثاني يوم تقرببا بالدعش ونص خابرتني ام عبودي.

  _ صباح الخير.

  _ هلو شلونج...شكو ماكو.

  _ والله اني اريد اسالج.....شبي اليوم رجلج هايج من غبشت الله...يصيح حلاق جيبولي....ورجع كله لرجلي لتطلع حتى اطب ويايه للحمام.