Alicia

Kabanata 32: Mungkahi

PASADO ika-pito ng umaga ay tinungo ng pinuno ng Makapili ang munting gusali ng pagamutan kung saan isinugod ang isang nakaligtas na sundalo mula sa nakalipas na pagsalakay ng mga gerilya. Kasama rin ni Erica ang dalawang tagasunod ni Kapitan Hirayama na sina Don Arnulfo at si Sarhento Heitaro na palaging sabik makatikim ng sariwang binibini.

Nakarating ang balita kay Kapitan Hirayama na nagkamalay na raw ang nakaligtas na sundalo. Kaya ipinatawag ng Kapitan si Erica upang ito ang magtungo sa pagamutan at kapanayamin ang sundalo. Higit na makatutulong kay Erica ang mga detalyeng ibabahagi ng sundalo upang gawin ang naiisip nitong balak. Hindi naman nagtagal ay narating din nina Erica ang silid sa tulong ng lalaking doktor.

"Kumusta ang kaniyang kalagayan? Nasa maayos bang huwisyo ang kaniyang isip? Maaari na ba siyang makausap?" Sunod-sunod na tanong ni Don Arnulfo sa manggagamot.

"Mabuti na ang kaniyang kalagayan ngunit malalim pa ang mga sugat na kaniyang tinamo. Kailangan pa niya nang mahabang pahinga upang humilom nang husto ang kaniyang mga sugat. Subalit malinaw pa niyang nagugunita ang mga nagdaang kaganapan sa kaniyang isip kaya maaari na po siyang makausap." Magalang na paliwanag ng manggagamot.

"Mahusay." Komento ni Don Arnulfo na sapat na ang mga detalyeng narinig tungkol sa kalagayan ng sundalo. "Maaari ka na ring umalis. Kami na ang bahalang kumausap sa iyong pasyente." Pagtataboy ng Don. Yumuko muna ang manggagamot saka tumalima sa utos.

Si Sarhento Heitaro ang kusang nagbukas ng pinto at pinangunahan ni Erica ang pagpasok sa loob. Nasilayan nila ang kahabag-habag na kalagayan ng sundalo na ngayon ay lantang gulay na nakaratay sa katre. Mayroon nang malay ang sundalo ngunit hindi nito magawang igalaw ang buong katawan sa dami ng mga bendang bumabalot sa iba't ibang bahagi ng katawan.

"Ohayou gozaimasu, Uyehara gunsou desu." (Good morning, Sgt. Uyehara.) Pagbati ni Erikca nang umupo sa silya habang nanatiling nakatayo naman sa likuran nito ang dalawang tagasunod ni Kapitan Hirayama. "Anata ga sudeni ishiki o torimodoshite iru koto o shiri, watashitachiha ōyorokobi shite imasu." (We are elated to see that you already gained back your consciousness.)

"O uketorimashita . . . Hirayama senchou no tegami. W-Watashi o tazunete kurete arigatou." (I received . . . Captain Hirayama's letter. T-Thank you for taking time to visit me.) Malugod na pasasalamat ng Sarhento na hindi inaalis ang pansin sa kawalan habang masasalat sa tinig ang kahirapan sa pagsasalita sa dami ng tinamo nitong pinsala sa katawan.

"Soshite, naze senchou ga watashitachi o anata ni au tame ni koko ni yobiyoseta no ka, anata wa mou o wakarida to omoimasu." (And I think you already have the idea why the Captain summoned us here to see you.) Komento ni Erica.

"Hai." (Yes.) Sambit nito sa pagitan ng kirot na dinaramdam ng katawan.

"Sono hi no dekigoto o kyouyuu shite itadakemasen ka? Anata ga watashi ni oshietekureru jouhou wa, watashi no tsugi no ugoki o keikaku suru no ni yori yakudatsu deshou." (Would you mind sharing what happened that day? The information you will impart to me will be more helpful to plan my next move.)

"Berudugo wa betsujin desu." (Verdugo is a different person.)

Kahit nakasuot ng salakot ay kitang-kita ang pagsasalubong ng kilay ni Erica ganoon din ang dalawang tagasunod ni Kapitan Hirayama.

"Dou iu imi desu ka?" (What do you mean?) Nalilitong tanong ni Erica.

"Berudugo wa onna desu." (Verdugo is a woman.)

"Omoshiroi . . ." (Interesting . . . ) Hindi makapaniwala na may kalakip na pagkamanghang sambit ni Erica. Sumilay rin ang kislap sa mata nito na tila ba naiibigan pa ang itinatakbo ng usapan lalo na sa natuklasang katotohanang isa palang babae ang kalaban ng mga Hapon. Natitiyak niyang higit na mag-iinit ang bumbunan ng kanilang Kapitan.