تكملة باقي حلقات الجزء الرابع من أنت قلبي

الجزء الرابع /الحلقة ٩٧

#أنت_قلبي٤
_________
الحلقة ٩٧

في فيلا كريم.
فريدة : القهوة يا كريم.
يقوم كريم ياخد منها الصينيه.
كريم : تسلم ايدك يا فريدة تعالي اقعدي.
بتقعد فريدة : ازيك يا علاء اخبارك إيه والولاد عاملين إيه؟
علاء : كلنا بخير يا فريدة انتي عامله إيه؟
فريدة : الحمد لله.
كريم : روحت عن عملت التحاليل تاني ولا نسيت كالعادة؟
علاء بابتسامة : بصراحة اتلهيت شوية بس هروح.
كريم : اتلاهيت في إيه يا علاء وهو في حاجة أهم من صحتك تاخد بالك منها؟
علاء : لأ مفيش زي ما تقول كدا بتيجي حاجة تنسي الواحد.
فريدة : ألف سلامة عليك يا علاء.
علاء : متشكر يا فريدة.
فريدة : بعد اذنكم.
وقامت فريدة خرجت وتركتهم

كريم : ها كنت عاوز تقولي ايه بخصوص علي ابن عمك؟
علاء : ندى بنت عمك كانت كلمتني إن علي عاوز يرجع البيت.
كريم : طب وأنا مالي؟
علاء : أنا بس باخد رأيك هي قالت لي إنه ساكن بالإيجار وهي عاوزه توفر عليه طالما الشقة مقفوله بس خايف بقى يقعد فيها ويتبت وميرضاش يخرج منها بعدين.
كريم : ملناش فيه هي حرة مع أخوها.
علاء : بصراحة هي لما كلمتني صعبت عليه رغم كل اللي عمله بس برضو عاوزه تساعده وأنا متردد مش عارف أوافق ولا لأ خايف أوافق يرجع يقرفنا تاني ويعمل مشاكل في البيت ولو رفضت ندى هتزعل وتاخد مني موقف وأنا مش عاوز دا يحصل.
كريم : اعمل اللي تعمله يا علاء أنت اللي ساكن في البيت مش أنا.
زين : سلام عليكم.. ازيك يا عمي؟
علاء بابتسامة : وعليكم السلام.. أنا تمام يا دكتور اخبارك أنت ايه عامل ايه في المذاكرة؟
زين ونظر لوالده : أهي ماشيه.
علاء : شد حيلك هانت خلاص كلها كام شهر ونفرح بيك.
زين : ادينا بنعمل اللي علينا.. بابي كنت عاوز حضرتك علشان مبلحقكش الصبح.
نظر علاء لكريم بابتسامة.
كريم : أنا عارف أنت عاوز إيه حاضر هسيب الأمانة مع مامتك الصبح.
علاء بابتسامة : طيب تصبحو على خير.
كريم : اقعد يا علاء رايح فين؟
علاء : يدوب بقى يا كريم أروح أنام الواحد مبقاش بيقدر يسهر زي زمان.
كريم : طيب أنا جاي معاك.. اتفضل.
وخرج كريم مع علاء يوصله لغاية البوابة.

فريدة : خير يا زين عاوز ايه يا حبيبي؟
زين : فكري بابي الصبح بالفلوس اللي طلبتها منه.
فريدة : حاضر.
زين : علشان أنا شطبت وبصراحة بقى حوار إن كل شوية أطلب مصروف دا مضايقني.
فريدة : ليه... امال أنت عاوز إيه؟
زين : عاوز الفلوس تتحولي على حسابي في البنك واسحب أنا بالفيزا.
فريدة : حاضر يا حبيبي لما تشتغل وتقبض ابقى قولهم على النظام ده.
زين : مامي ما النظام دا شغال من زمان قوي.
فريدة : يا حبيبي ما أنا مكنتش في غيبوبة يعني أنت اللي مفهمتش كلامي.
زين : اااه قصدك يعني دا هيبقى تبع الشغل اللي هشتغله؟
طب وفيها إيه لما بابي يعمل معايا كدا.
فريدة : دا نظام باباك وبعدين كلها كام شهر وتتخرج وتشتغل ومتحتاجش مصروف.
زين : خايف أقولك إني حتى لو اشتغلت لازم برضو أخد مصروف لإن الملاليم اللي هاخدها متكفنيش تلات أربع تيام.
فريدة : أهو باباك جه أهو كلمه.
زين : لا اكلمه إيه تصبحو على خير..
كريم : رايح فين؟
زين : طالع أنام حضرتك محتاج مني حاجة؟
كريم : لا يا حبيبي تصبح على خير.
زين : وحضرتك من أهله.
يطلع زين فوق..
كريم : جميلة نامت يا فريدة؟
فريدة : اه نامت من شوية.
كريم : طب إيه مش هتنامي؟
فريدة : اه هقوم أنام أهو.
____________
في فيلا آسر.
آسر بيدهن لسهر مكان الوقعة اللي وقعتها على السلم..
آسر : خلاص كدا هتروح بس ابقي حطي من المرهم ده وهتخف خلال يومين.
سهر : طيب يا حبيبي متشكرة.
يقوم آسر ويقعد على الكرسي.
سهر : ايه يا آسر مالك أنت تعبان؟
آسر : شوية.
سهر : أنت ماأخدتش الدوا اليومين اللي فاتوا ولا إيه؟
آسر : لأ باخد الدوا على طول.
سهر : امال إيه بقى؟
آسر بتنهيدة : خايف البنت مترجعش يا سهر.
سهر : لأ ابوس ايدك  مش ناقصه.. أنا حاطه ايدي على قلبي وبدعي إن البنت ترجع بالسلامة دا ابنك يحصل له حاجة.
آسر : طب نامي واستريحي أنا عارف إنك منمتيش اليومين اللي فاتوا علشان مغيره مكانك.
سهر : أنا تعبانه وهموت وأنام بس مش عارفه عيني هتقدر تغمض ازاي.
آسر : مفيش حاجة في ايدنا غير إننا ندعي إن البنت ترجع بالسلامة.
__________
في شقة مجدي.
زينة قاعدة على السرير وبتبكي وأمل قاعدة جنبها.
أمل : وبعدين يا بنتي هتفضلي كدا حاولي تنامي ساعة حتى دموعك منشفتش يا زينة.
زينة : بنتي يا مامي بنتي بعيد عن حضني وياريتني عارفه هي فين أنا خايفه الست دي تعمل فيها حاجة.
أمل : اتأكدتي من الكاميرات إنها هي؟
زينة : ايوه.. هي اللي خطفت رهف شوفتها وهي بتاخد ها وأنا غبيه كنت مشغوله عنها معرفش عقلي كان فين وقتها مش عارفه.
أمل : طب اهدي هنلاقيها يا حبيبتي اطمني وريحي كدا أعصابك.
بترجع زينة دماغها على المخدة.
أمل : ايوه.. كدا غمضي عينك بقى ونامي.
زينة وهي بتغمض وبتنام : مش هعرف أنام.. مش هعرف أنام ورهف بعيد عني.