تكملة باقي حلقات الجزء الرابع من أنت قلبي

الجزء الرابع /الحلقة ١٠٠

#أنت_قلبي٤
_________
الحلقة ١٠٠

في شقة مجدي.
مجدي : زينة.. زينة.
زينة بصوت ناعس : ايوه.. يا مجدي عاوز حاجة؟
مجدي : انتي رجعتي نمتي تاني؟
زينة : تعبانه منمتش امبارح كويس.
مجدي : طيب يا حبيبتي أنا بس كنت عاوز أقولك إني نازل محتاجة حاجة؟
زينة : لأ مع السلامة.
قعد جنبها..
زينة : فيه ايه أنت مش نازل؟
مجدي : زينة انتي أسلوبك ليه جاف معايا كدا احنا مش كنا كويسين بالليل؟
زينة : لأ مكناش كويسين وأنت عارف.
مجدي : عارف إيه؟
زينة : خلاص ملوش لازمه الكلام.
مجدي : انتي تقولي حاجة وتقطعي فيها ليه.. بتعمليلي تشويق مثلًا.. ما تتكلمي يا زينة.
زينة : اتكلم أقول لك إيه أنت لوحدك لما ترجع مجدي بتاع زمان وقتها هتلاقي معاملتي معاك تغيرت.
مجدي : أرجع بتاع زمان ازاي يعني.. امال أنا مين دلوقت؟
زينة : معرفش بس أكيد واحد غير اللي حبيته واتجوزته.
مجدي : كدا! طيب لما تشوفيني حبيبك اللي اتجوزتيه ابقي قوليلي.. سلام.
غطت نفسها بتنهيدة..وهو فتح باب الشقة وخرج.
_____
في قسم الشرطة.
هشام : أنا عملت كل ده؟!
إذا كنت أنا مشوفتكيش بقالي فترة طويلة ازاي يعني هعمل اللي بتقولي عليه ده؟!
علا : طبعا منفذتش ده بنفسك بس أجرت ناس عملوا كدا وهما موجودين معايا بره..
هشام : وحضرتك بقى جيبتيهم منين؟
علا : من المكان اللي أنت روحت جبتهم منه.
هشام : أنا معرفش الأشكال دي.
الضابط : ممكن تتفضل تقعد يا أستاذ هشام علشان نستكمل المحضر.
هشام : حضرتك أنا معرفش حاجة عن الكلام اللي بتقوله ده ومعرفش منين الناس دي أصلا ثم حضرتها والدة المدام معقول أنا هعمل كدا؟
الضابط : بس الأوراق اللي عندي بتقول إن في محاضر ما بينكم أنت اتهمتها بالاعتداء على زوجتك وكانت سبب في فقد الجنين لإن المدام وقتها كانت حامل وبناءً عليه اتسجنت فترة وخرجت.
هشام : واتنازلت حضرتك ولو كنت لسه عاوز انتقم كنت سيبتها تكمل المدة بتاعتها لكن اتنازلت علشان خاطر زوجتي فعتدي عليها ليه دلوقت ومفيش حاجة حصلت تاني بيني وبينها.
علا : علشان تقطع رجلي من عندك ومروحش أزور بنتي.
هشام : محصلش انتي بتكدبي.
علا : امال دا ايه.. عورت نفسي مثلا؟!
هشام : معرفش بقى انتي ادرى بنفسك.
علا : أنا عاوزه حقي يا حضرة الظابط هاتولي حقي منه.
الضابط : حاضر يا مدام اتفضلي بس اقعدي دلوقت.

أمام المكتب..
أمل : حصل إيه يا هشام؟
هشام (الأب) : اقعدي بس استريحي يا أمل.. انتي مين قالك؟
مراد : أنا اللي كلمت مامي قولتلها.
أمل : أنت مكنتش عاوزني أعرف! فين أخوك يا مراد؟
مراد : هشام جوه يا مامي اقعدي استريحي.
بيخرج هشام من جوه.
تجري عليه أمل.
هشام(الابن) : مامي!
أمل : حصل ايه يا هشام أنت بتعمل إيه هنا يا ابني؟
هشام (الأب) : طمنا يا هشام أنت هنا ليه؟
هشام(الابن) : طنط علا بتتهمني إني بعت بلطجية ضربوها وهددوها إنها لو مبعدتش عن البيت عندي هقتلها.
أمل : إيه!
مراد : إيه الجنان ده.. ومين هيصدق الكلام ه؟
هشام (الابن) : ما هي جايه فعلا متخرشمه.
هشام (الأب) : ازاي مش فاهم.
هشام(الابن) : ولا أنا فاهم حاجة يا بابي.
مجدي(المحامي) جاي عليهم : سلام عليكم.
يرددوا : وعليكم السلام.
مجدي : خير يا هشام أنت جاي هنا ليه؟
هشام(الأب) : بيقول إن حماته بتتهمه إنه بعت بلطجيه ضربوها وهددوها بالقتل.
مجدي : ودا حصل؟
أمل : لأ طبعا محصلش ابني مستحيل يعمل كدا.
هشام (الابن) : لا محصلش يا عمي أنا أصلا مشوفتهاش ومعرفش ليه قالت الكلام ده؟!
مجدي : طيب سيبني ادخل جوه اطلع على المحضر واشوف إيه اللي ممكن نعمله.
هشام(الأب) : مجدي هشام مش هيقعد هنا ومتقوليش يتحجز لحد ما يتأكدوا من الحقيقة.
مجدي : طب اصبر الأول يا هشام أنا لسه معرفش إيه الموضوع بالظبط.
مراد : ما هشام قال لحضرتك يا عمي.
مجدي : هدخل بس اشوف إيه الحكاية.. أطمن يا هشام لو أنت فعلا معملتش كدا هتخرج معانا.
هشام(الابن) : ما أنا معملتش كل الكلام اللي قالت عليه ده.
مجدي : خلاص هدخل اشوف..
هشام(الأب) : خليهم يدخلوني معاك.
مجدي : ماشي هدخل استأذن الظابط يدخلك.
_________
في التليفون.... 📞
ياسمين منهاره وبتبكي : معرفش يا بابا هو جه أمين الشرطة اخده ومشي معاه أنا متكلمتش خالص معاه ومعرفش إيه الموضوع بالظبط.
عمار : طيب يا بنتي اهدي أنا هعرف إيه الحكاية واطمنك مين اللي راح معاه؟
ياسمين : مفيش غير مراد بس اللي راح معاه وأكيد كلموا باباهم بس أنا محدش كلمني ومعرفش حاجة.
عمار : طيب أنا رايح على هناك.
ياسمين : طب ما تعدي عليه اجي معاك.
عمار : لأ خليكي أنا هوصل هناك وهبقى اطمنك خلي بالك من نفسك.