تكملة باقي حلقات الجزء الرابع من أنت قلبي

الجزء الرابع /الحلقة ١٤٣

#أنت_قلبي٤
__________
الحلقة ١٤٣

في شقة هشام.
ياسمين داخله الغرفة تصحيه : هشام.. هشام.
هشام بحده وبصوت ناعس : عاوزه إيه؟
ياسمين : مش هتقوم تاكل؟
هشام : لأ.
ياسمين : ليه دا أنا عملالك أكله بتحبها قوي.
هشام : مش عاوز اكل مليش نفس.
ياسمين : طب قوم بس اقعد معانا على السفرة وأنت هتلاقي نفسك اتفتحت.. يلا قوم.
وبتمسكه من ايده علشان تقومه.
هشام بغضب : أنا قولت لك مليش نفس هو الأكل بالعافية؟!
ياسمين : فيه ايه بس يا هشام؟
هشام : ياسمين أنا مش عاوز اتكلم معاكي في أي موضوع حتى لو كان حاجة تافهه علشان أنا على أخرى ولحد دلوقت عامل حساب للعشرة اللي بينا وبدعي إنها تعدي على خير علشان معرفش ممكن دماغي تودينا لحد فين فسيبيني أحسن.. تمام؟
قولي تمام واتفضلي اقفلي الباب وانتي خارجة.
مردتش ياسمين واخدت بعضها وخرجت وقفلت الباب زي ما قال لها.
هشام يغطي نفسه بتنهيدة.

ريتاج ويمان قاعدين على السفرة..
ريتاج : مامي مش هتيجي تاكلي بقى احنا جعانين قوي.
ياسمين وهي حابسه دموعها : كُلوا يا حبايبي قرب الطبق منك يا يمان وكُل وانتي يا ياسمين مدي ايدك وكُلي.
ريتاج : مش هتيجي تاكلي؟
ياسمين : لأ مليش نفس.
يمان : وبابي كمان ملوش نفس؟
مردتش ياسمين.
ريتاج : كُل يا يمان.
_________
في التليفون..📞
ياسمينا : معرفش أنا مكلمتهاش لسه دي فريدة بنتي كانت عندي من شوية وبتقول جوزها راح لخالته علشان تعبانه أنا خدت الموضوع عادي وعديته بس معرفش إن فريدة تعبانه قوي كدا.
داليا : قسمت قالت لي امبارح برضو جوزها كان هناك وبيقول إن فريدة تعبانه أنا قولت اشوفك كدا علشان نروح مع بعض نشوفها.
ياسمينا : أنا قبل ما تتصلي كنت بفكر اكلم فريدة اطمن عليها بس شكلها كدا تعبانه حقيقي والكلام في التليفون مش كفايه هنروح فاضيه بكرة؟
داليا : ولو مش فاضيه يا ياسمين هنروح برضو انتي ناويه تروحي امتى؟
ياسمينا : الساعة حداشر كدا هقوم اخلص اللي ورايا وهلبس وانزل.
داليا : طيب خلاص هعدي عليكي الصبح.
ياسمينا : بس ابقي رني قبل ما تيجي علشان أكون جاهزة.
داليا : ماشي.
________
في منزل والد حمزة.
والدة حمزة : يعني لما قولت لك على الحلم مقولتيش إنك حامل!
نادين : كنت عارفه إنك هتقولي كدا أنا قولت لماما مش هتصدق إني كنت لسه معرفتش بموضوع الحمل ده.
والدة حمزة : ومالك كدا زعلانه ليه؟
نادين : مكنتش عامله حسابي.
والدة حمزة : هههههههههههه عليه الكلام دا برضو؟!
نادين : ما أنا عارفه إنك مش هتصدقي.
والدة حمزة : قومي غيري هدومك كدا وألبسي حاجة من بتاعة الستات كدا علشان لما جوزك يرجع تفرحيه بالخبر الحلو ده.
نادين : حاجة ايه بقى بتاعة الستات دي يا طنط انتي تتفرجي على ايه من ورانا؟!
والدة حمزة : مبتفرجش على حاجة يا بنتي.
نادين : لأ اعترفي بالحقيقة أحسن.
والدة حمزة : مبتفرجش على حاجة قولتلك انتي عاوزه تلبسيني مصيبة وخلاص.
نادين : هههههههههههه
والدة حمزة : طب طالما فرحانه كدا بتضحكي ما تقوليلي هتسمى ايه؟
نادين : يا طنط انتي ليه مش عاوزه تصدقي إني لسه عارفه امبارح بس اني حامل هسمي ايه بقى وأنا مش عارفه إن كان اللي في بطني دا ولد ولا بنت؟!
والدة حمزة : يعني حامل كام كدا؟
نادين : لسه شهر يا طنط.
والدة حمزة : على خير يا بنتي بيفوتوا هوا كلها تمن شهور يعني مش كدا؟
نادين : دا اللي اعرفه إن الحمل تسع شهور.
والدة حمزة : هههههههههههه بتتريقي عليه يا نادين؟!
نادين : مبتريقش أنا أصلا بطني بتوجعني من ساعة ما عرفت اني حامل.
والدة حمزة : وتوجعك ليه بقى دا خير ورزق جيلك قومي كدا غيري هدومك وفرفشي.
نادين : طيب.. كوكي خليكي هنا مع تيته.
كنده : حاضر.
________
في فيلا آسر.
ملك : طب ما هي عندها حق.
مليكة نظرت لملك بدهشه.
ملك : انتي اللي وصلتي لها الاحساس ده.
مليكة : انتي بتقولي ايه؟
ملك : بُصي يا مليكة هو احسن حاجة طبعا ان البنت دي مشيت لإن كانت هتحصل مشاكل كتير بسببها وكانت هتقلب جوزك عليكي رغم إن مش من حقها تكلمك بالطريقة دي لكن في كلام قالته لازم تفكري فيه إن ثقتك في نفسك بقت مهزوزه شوية.
نظرت لها مليكة مرة تانية بدهشه.
ملك : بصراحة يا مليكة انتي وزنك زاد بعد ما خلفتي يحيى ولبسك مبقاش زي الأول ومبقتيش مهتمه بنفسك وأكيد طالما مبتهتميش بنفسك وانتي خارجة من البيت هيبقى ايه الوضع بقى جوه البيت فجوزك مع مرور الوقت هيزهق يمكن مش ملاحظ دلوقت علشان مسحول معاكي ومع الولاد لكن لما تجيله حالة فوقان كدا ويبص عليكي ويبدأ يسأل نفسه هي دي مليكة البنت الرقيقة اللي اتجوزتها اللي كانت كل حاجة فيها حلوة دلوقت شكلها ولبسها بقوا حاجة بشعه.
مليكة : أنا شكلي بشع يا ملك؟
ملك : مقصدش بس دا تفكير معظم الرجاله يا حبيبتي اه بيبقوا هيموتوا كدا على العيال وعاوزين يفرحوا ويهيصوا ويتقاله بابي بس بعد فترة بيزهق وعاوز بقى يرجع عريس من تاني انتي شايفه نفسك كدا تنفعي تبقي عروسة؟!
مليكة : ايه اللي بتقوليه دا يا ملك وهو الجسم والشكل دا ايه اللي غيرهم مش الحمل والولادة والعيال اللي بتيجي دي ولاد مين مش ولادهم برضو وكل حاجة لها ضريبة ازاي تقارني بين بنت لسه متجوزه وواحدة حملت وخلفت مرة واتنين وتلاته وطبيعي شكلها وجسمها يتغير وبعدين هو بـ ايدنا يعني مش في فترة رضاعة وأكل بقى علشان البيبي يتغذا احنا مش نجمات سينما يا حبيبتي احنا ناس طبيعية زي كل البشر.
ملك : خلاص انتي حره أنا لفت نظرك بس لوزنك علشان تهتمي بنفسك في دايت مناسب ليكي على فكرة يخليكي تحافظي على وزنك برضو مع الرضاعة.
مليكة : اوك هشوف.. أنا ماشيه يا مامي.. عاوزه حاجة؟
_________
في النيابة..
خارجة مريم ومعاها مراد ومازن ومجدي(المحامي)
يقابلهم حامد ووالد الشاب اللي توفى وناس من أهلهم متعرفهمش.
يسلم حامد على مراد ومازن..
فرج : أنت جاي هنا تعمل ايه يا دكتور أنت وأختك؟
مازن : شد حيلك يا عمي.
فرج : تقتلوا القتيل وتمشوا في جنازته!
مراد : نقتل مين يا راجل أنت؟
فرج : وده يطلع مين يا دكتور؟
مراد : لا كلامك يبقى معايا أنا مراتي مقتلتش حد ولولا الظروف اللي أنتم فيها كان هيبقى لينا كلام تاني خالص لكن علشان احنا بنفهم في الأصول فهنحترم فترة الحداد اللي عندكم وكلامنا هيبقى بعدين.
حامد : معلش يا أستاذ عمي فرج بس ميعرفكش دا الأستاذ مراد يا عمي جوز مريم بنت عمي.
زوج صباح : ولادنا كانوا بيجروا وراكي بالعربية يا مريم بقى ده كلام تقوليه يا بنت الغالي؟
مازن : امال هتتبلى عليكم يعني ثم ولاد الغالي مسلموش منكم ولا أمهم سلمت من لسانك بس معلش احنا هنعمل بالاصول ونحترم الظروف اللي أنتم فيها.
فرج : اللي مات ده يبقى ابن عمتك يا دكتور أصول ايه اللي بتتكلم عنها هي الأصول دي برضو تخليك تقول ماسخ زي ده.
مازن : يلا يا مريم يلا يا مراد.
فرج : وجايبين محامي معاكم كمان ليه ناوين على ايه عاوزين تحبوا اللي تبقى من عيالنا ولا ايه؟
مازن : المحكمه هي اللي هتقول كلمتها ووقتها هنتحاسب يا عمي.. يلا يا مريم.
حد من اللي معاهم شد مريم كان هيوقعها يلحقها مراد ويمسكه يضربه.
حامد يحجز ما بينهم ويبعد مراد عن الولد
حامد : معلش حقك عليه اني امسحها فيه يا أستاذ يا مراد.
مراد : عاجبك اللي حصل ده.
حامد : خلاص يا دكتور سيبه علشان خاطري معلش حقكم كلكم عليه.
مازن : حق ايه يا حامد دا عيل عاوز يتربى.
حامد : معلش اني هربيه لما نرجع البلد روحوا أنتم دلوقت.