تكملة باقي حلقات الجزء الرابع من أنت قلبي

الجزء الرابع /الحلقة ١٢٧

#أنت_قلبي٤
__________
الحلقة ١٢٧

تاني يوم.. في العزاء.
واقف كريم وأولاده وحازم وابنه وأولاد علاء وعلي وأولاد رحمة.. ياخدوا العزاء.
جه هشام ومجدي وآسر وعُمر سلموا وعزوا كريم والعائلة وقعدوا.

حازم : كريم اقعد استريح..
بيقعد كريم كان تعبان..
كريم لمحمد : هاتلي حاجة اخدها للصداع ده.
محمد : حاضر..
زين : رايح فين؟
محمد : جاي يا زين خليك.

فوق..
فاتحين الشقتين..
شقة علاء وشقة حازم علشان يستقبلوا الستات اللي جايه تعزي.
بتدخل أمل ومعاها داليا وسهر ونورهان ..
وشوية جات ياسمينا ونادين.
وبعدها جات مريم ومليكة ومنة.
كان فريدة (بنت ياسمينا) وقسمت بنت داليا هنا من بدري).

ندى شاورت لتالا تعمل قهوة..
أمل : شدي حيلك يا فريدة.
فريدة بحزن : منجلكيش في حاجة وحشه يا أمل.
سهر : اجمدي كدا يا فريدة كلنا لها يا حبيبتي.
ياسمينا : تعالي يا جميلة.
جميلة بتسلم عليهم.
داليا : تعالي يا جميلة اقعدي هنا جنبي.

رنا لتالا : اتفضلي القهوة.
تالا : كنت داخله أعمل.. شكرا.
واخدت تالا القهوة وقدمتها للموجودين هي وعلياء.

تحت...
مراد : أنت لسه جاي؟
شادي : جاي من شوية كدا.
مراد : اه.
شادي : فيه ايه مالك؟
مراد : مفيش هو هشام مجاش معاك؟
شادي : هشام جه حضر الجنازة وروح.
مراد : اه أصل أنا مروحتش البيت من الصبح.
شادي : هي مريم مجاتش معاك؟
مراد : لأ جات بس فضلت واقف تحت عبال ما نزلت مدخلتش جوه.
شادي : اه ما أنا عرفت انها معاك لإن الولاد مع ليلى.
مراد : أنا قولت لها تسيبهم معاها.. ثواني اكلمها علشان اروحها وابقى ارجع تاني.

مريم : طنط أنا نازله علشان مراد تحت هروح معاه.
أمل : ماشي يا مريم مع السلامة.
مريم : شدي حيلك يا طنط.
وبتسلم على فريدة وندى وتنزل.

سهر : جايه لوحدك يا مليكة؟
مليكة : لأ جايه مع سيف.
سهر : طيب يا حبيبتي.
_____

بعد شوية في شقة إياد.
سهر : معاملته ليه جافه حتى لما كلمته وقولتله إنه وحشني وعاتبته إنه ازاي ميتصلش يسأل عليه ولا حتى على البنات رد عليه كدا وهو مش مهتم حتى مرضيش يسمعني صوته
قعد يكتب وأنا لما زهقت قفلت التليفون.
منة : مش عارفه أقولك إيه بس أكيد انتي عارفه السبب..
سهر : سبب ايه يا مامي طب هو مضايق مني زعلان كارهني البنات بقى ذنبهم ايه؟
منة : قولت بيكلم باباكي وبيسأل عنهم على طول.
سهر : اه بس ميكلمنيش أنا مشكلته معايا يعني.
منة : حاولي تغيري من طريقتك واسلوبك دا شوية يا سهر صدقيني مازن مش وحش ولا هو مرتبط بـ أخته بالصورة اللي بتتكلمي عنها دي بالعكس كتر كلامك عنها بالطريقة دي هتخليه يكرهها.
سهر : أحسن أنا عاوزه كدا.
منة : ليه بس يا بنتي يعني تقدري تستحملي إن ملك تكره اخوكي فيكي هتقبليها يا سهر؟
سهر : أنا يا مامي مبدخلش في حياتهم ومليش علاقة خالص بملك.
منة : طب ومريم بتدخل في حياتكم هي عايشه معاكم ولا حتى جوزك موجود هنا شيلي الأفكار دي من دماغك بقى.
____
في العربية..
مراد : هروحك وارجع تاني يا مريم.
مريم : ماشي.
مراد : ايه مالك؟
مريم : مفيش.
مراد : لا بجد مالك ايه اللي مزعلك؟
مريم : لما بشوف أحوال الدنيا يا مراد بخاف قوي.
مراد : بتحافي من ايه؟
مريم : نفسي اشوف مازن قوي نفسي ينزل يقعد معانا ولو يومين حتى خايفه الموت يفرق ما بينا.
مراد : بعد الشر عليكي ادعي إنه يرجع بالسلامة.
مريم : شوفت طنط فريدة النهاردا اتأثرت قوي بعياطها على ابن عمها وأهو راجل كبير مش صغير بس الفراق صعب قوي.
مراد : الحزن مبيفرقش بين صغير وكبير يا مريم الحزن بيكون على قد المحبه اللي في القلب وهما كانوا عيله واحدة خصوصا إنه أخو جوزها مش ابن عمها وبس وأكيد ليهم ذكريات كتير مع بعض.. الفراق صعب زي ما قولتي بس احنا هنعيش حياتنا نفارق ناس زي ما احنا كمان في يوم هنفارق اللي بنحبهم.
مريم : آآآآآه ماما وحشتني قوي أنا من بعدها حاسه إني وحيده.
نظر لها وهو مدمع وبعدها رجع يركز في الطريق بيفكر في كلام يقوله لها علشان يواسيها.
_________
في شقة سيف.
سيف : يعني هنفضل متخاصمين كدا يا مليكة دا أنا لما كلمتيني في الشغل علشان اوصلك تروحي تعزي افتكرت إن خلاص روقتي وصفيتي من ناحيتي.
مليكة : وأنت امتى تبطل الطبع اللي فيك ده أنا بجد تعبت وكل أما أقول خلاص اتعودت وبعرف اتعامل مع عصبيتك دي الاقي نفسي واصله لمرحلة اني خلاص مش عاوزه غير امشي واسيبلك الدنيا دي كلها.
سيف : يااااه للدرجة دي أنا وحش كدا؟!
مليكة : أنت مبتشوفش نفسك يا سيف أنا بخاف منك بجد وقتها بكون مرعوبه منك حقيقي أخر مرة اللي جمدت قلبي وقولت لو حصل ايه حتى مش رايحه أختك مبتحبنيش عكس طنط فيروز وطنط ياسمين معرفش أنا عملت لها إيه أنا مبحبش كدا ومش هقدر اقعد مع حد متأكدة إنه مبيحبنيش وياريت بس جات على كدا لأ الكلام بقى اللى من تحت لتحت دا أنا بكرهه.
سيف : خلاص يا مليكة وأنا فهمت إنك مش عاوزه تروحي هناك ولا تتقابلي بهدى وحتى لو مفيش سبب وإن دي رغبتك أنا لازم احترم ده طالما مبتسئيش لـ أختي يبقى خلاص.
مليكة : أنا عمري ما أسأت لحد وأنت عارف.
سيف : عارف يا حبيبتي وخلاص بقى صافي يا لبن.
مليكة : مش قادرة.
سيف : طب لو قولتلك علشان خاطري.
مليكة : برضو لأ.
بيقرب منها وياخدها في حضنه : خلاص بقى يا مليكة.
منهار وتبكي : برضو لأ.
سيف : حقك عليه متعيطيش أنا عارف إن هدى زودتها معاكي أخر مرة هو مش معاكي انتي بس علشان اللي يزعلك أكيد يزعلني وأنا مكانش ينفع اضغط عليكي تيجي معايا عندها أنا آسف غلطه مش هتكرر..
مليكة : ولو اتكررت؟!
سيف : ابقي اعملي اللي انتي عاوزاه.
مليكة : طب ممكن تبعد بقى.
سيف : لأ كدا حلو وبعدين الجو برد.
مليكة : بس أنا حرانه.
سيف : خلاص اشغل لك التكييف.
مليكة : بتهزر.
سيف : صدقيني بحبك ومقدرش أبدًا على زعلك.. حقك عليه متزعليش.
مليكة : خلاص ابعد بقى.
سيف : قولي بس الاول إنك سامحتيني.
مليكة : خلاص سامحتك كدا كويس؟ ابعد بقى.
سيف : ابعد ايه!
دا أنا لازم أقرب بعد الصلح ده هههههههه
_____
في شقة علاء..
داخل كريم الغرفة بعد ما خرج كل اللي كانوا موجودين سواء من العائلة أو اللي جايين يعزوا وصمم كريم إنه يبات الليله في شقة علاء.
قرب من السرير وقعد على الطرف وهو بيتلمس موضع أخيه.. بكى بشده.