تكملة باقي حلقات الجزء الرابع من أنت قلبي

الجزء الرابع /الحلقة ١٣٤

#أنت_قلبي٤
________
الحلقة ١٣٤

في منزل هدى..
هدى : هما لسه في الموال ده يا ابني ايه هما هيكدبوا الكدبه ويصدقوها ولا إيه؟!
حامد : الظاهر كدا يا أمه بس اني خرستهم كلهم.
هدى : خُد بالك من نفسك يا ابني أنت عايش وسط ديابه متأمنلهمش.
حامد : هيعملوا ايه يعني يا أمه بس حد يفكر بس يهوب ناحيتي ولا ناحية حد من عيالي واني كنت فصلت رقـ....* ـبته عن جسمه.
هدى : بلاش الكلام الكبير دا يا حامد أنت يا ابني متعرفهمش قدي اني عشت معاهم سنين طويلة واعرفهم أكتر منك دول ناس ظلمه ابعد عنهم أحسن حذر بس بنت عمك وهي معاها جوزها وأهله ناس واصله يعني مش هيسكتولهم.
حامد : المشكلة انهم بيقولوا كلام صعب قوي يا أمه لو حد منهم اتجنن في عقله وراح قال الكلام دا هناك هيعملوا لبنت عمي مشاكل مع جوزها وأهله.
هدى : قطع لسانهم واحد واحد هنادي اني اعرفها كويس دي كانت قطة مغمضه لما دخلت بيتهم متعرفش حاجة خالص وطفشوها من البلد ويا حبيبتي حتى ماتت كدا فجأة قلبها مستحملش من اللي شافته منهم.
حامد : متزعليش مني يا أمه لما قولتلك متجيش.
هدى : لا يا حبيبي ما إني دلوقت فهمت أهو مجيش ليه.
حامد : لو حد كان اتنفس بس معاكي اني كنت قتـ...*ـلته.
هدى : لا يا ابني وعلى ايه الطيب أحسن متضيعش نفسك عشانهم.
حامد : اني محبش اشوف الظلم قدام عينيه واسكت عليه بس ياريت بقى بعد الكلام اللي ادتهولهم في عضامهم امبارح يسكتوا أحسن المرة الجايه معرفش ممكن اعمل إيه.
هدى : وهو الراجل الكبير هو اللي قال الكلام ده ولا العيال؟
حامد : لا جوز عمتي يا أمه وبعدين مبقوش عيال دول رجاله وعندهم عيال.
هدى : صحيح الصغير هو صغير العقل والتربية.
حامد : أنا ماشي يا أمه عاوزه حاجة؟
هدى : عاوزه سلامتك يا ابني خُد بالك من نفسك وسلملي على مرتك وعيالك.
حامد : حاضر يا أمه يوصل.
ويُقبل ايدها ويمشي.
______
في شقة سيف.
سهر : وقعتي قلبي يا مليكة.
مليكة تبكي : وهي دي مش حاجة توقع القلب برضو يا مامي؟
سهر : يا حبيبتي يمكن في غلط في البتاع ده اعمليه تاني هاتي واحد جديد.
مليكة : لأ أنا خايفه اتأكد أكتر.
سهر : طب وبعدين؟
مليكة : مش عارفه.
سهر : طيب أنا هروح مع باباكي المستشفى وهرجعلك تكوني هديتي كدا شوية وجيبتي واحد غيره ولو اتأكدتي من الحمل عادي برضو.. كله خير.
مليكة : ازاي بس يا مامي.
سهر : زي الناس يا مليكة هتعملي ايه يعني هتنزليه؟!
مليكة تبكي وسهر تطبطب عليها.

آسر قاعد بره بينادي : سهر.. سهر.
سهر : حاضر جايه... همشي أنا يا حبيبتي وهبقي اعدي عليكي وأنا مروحه.
هزت مليكة رأسها.
سهر : خلاص بقى متزعليش نفسك.
_________
في فيلا كريم.
فريدة : شقة ايه اللي هتشتريها يا كريم احنا مش لازمنا شقق ابنك عاوز يسافر.
كريم : متقلقيش يا فريدة هتتدبر.
فريدة : يا حبيبي احنا هنعمل ايه بالشقة أنت هتسكن هناك ولا حد من ولادك ناوي يقعد هناك؟
ما تقولي ايه اللي في دماغك.
كريم : أنا بحل مشكلة يا فريدة.
فريدة : مشكلة ايه اللي بتحلها ما كل واحد ياخد حاجة وخلاص ولا يشتركوا في الاتنين مش يمكن حد فيهم يحتاج الشقة بعدين.
كريم : لما حد يحتاجها يبقى ياخدها.
فريدة : أنت عاوز تجنني.. صح؟
كريم : عاوزه ايه يا فريدة؟!
فريدة : براحتك فلوسك وأنت حر فيها.
كريم : رايحه فين؟
فريدة : هعملك القهوة.
كريم : لأ أنا همشي هبقى اشربها هناك بقى.. سلام عليكم.
فريدة : وعليكم السلام...
كريم.
كريم : نعم يا فريدة.
فريدة : متزعلش مني.
كريم : وهزعل منك ليه بس يا حبيبتي أنا عارف قصدك بس مقدميش حل تاني... أنا ماشي.
فريدة : مع السلامة.
_________
في شقة سيف.
سيف : معرفش بقى يا مليكة.
مليكة تبكي..
سيف : طب قومي يلا البسي.
مليكة : هنروح فين؟
سيف : اخدك نزوح تعملي تحليل هتروحي فين يعني؟!
مليكة : طب لو طلعت حامل هنعمل ايه؟
سيف : هنعمل ايه يعني؟!
مليكة تبكي : مش عارفه.
سيف : طب قومي البسي يلا متضيعيش وقت.
مليكة : حاضر.
____
في المستشفى.
آسر وسهر قاعدين منتظرين نتيجة الأشعة..
آسر : مليكة مالها يا سهر؟
سهر : بتقول انها حامل.
آسر : حامل!
سهر : لسه هتتأكد عملت تيست الحمل ده وقولت لها اعملي غيره أو تروح بقى للدكتورة تشوف تقولها تعمل ايه.. مالك؟
آسر : عندي شغل مش فاضي أنا للقعدة دي.
سهر : الشغل مش هيطير يا آسر المهم تطمن على صحتك.
آسر : مجدي كلمك؟
سهر : أخر مرة كان امبارح ليه فيه حاجة؟
آسر : كنت بس عاوز أطمن هو ومراته كويسين مع بعض ولا لأ.
سهر : هي مش راحت الست دي واعتذرت وخلصنا من الموضوع ده ايه اللي حصل بقى تاني؟
آسر : معرفش زينة بقى سامحته ولا ايه اللي حصل بينهم.
سهر : تسامحه على ايه مش طلع كل الكلام دا كذب؟!
آسر : اه بس معرفته بالست دي هي اللي جابت له المشاكل وأكيد يعني زينة واخده على خاطرها من الموضوع ده.
سهر : مش عارفه بقى كلمه واطمن عاملين ايه مع بعض.
آسر : هو يعني كان كلمني خلاص بقى حل مشاكله ومبقاش ليه لازمه.
سهر : هههههههههههه
آسر : بتضحكي على ايه؟
سهر : على كلامك يا آسر.. شوف كدا الدكتور جاي أهو.
يقوم آسر يطمن من الدكتور على نتائج الأشعة.
________
في التليفون.. 📞
إياد : لأ سيبتها نايمه.
مازن : جيت اكلمها لاقيتها عامل لي بلوك.
إياد : يعني مش أنت اللي عملته الأول يا مازن دي برضو تصرفات واحد مسؤول؟!
مازن : لما اتصل بيها وكل مرة تكلمني عن أختي وتحاول تقول كلام محصلش وشايفه إن حبي ليها مش طبيعي فكان من الطبيعي يا عمي ابعد عن كل دا واعمل بلوك علشان المشاكل متزدش أكتر أصل أنا مكنتش هسكت لو اتمادت أكتر من كدا لكن الظروف دلوقت مختلفه وهي زي ما حضرتك قولت وزي ما اختي راحت شفتها وقالت لي انها تعبانه فكان واجب عليه اتصل اطمن عليها لحد ما اظبط أموري وأنزل اشوفها.
إياد : سهر تعبانه نفسياً ومش من دلوقت بس الكلام دا من فترة وأنت كان من واجبك برضو تحاول من البداية إنك تحتاويها لكن دا محصلش.
مازن : يا عمي كلكم بتلوموني طيب هو في حد كان عايش معايا وشافني بعاملها ازاي أنا عمري ما اهانتها ولا عاملتها بقسوة بالعكس أسبوع قعدته معاها لما كانت تعبانه بعد الولادة أنا مبقولش إن دا فضل مني لأ دا واجبي لكن أنا مش فاهم ايه اللي حصل بالظبط حياتنا هي هي من يوم ما اتجوزنا ولما قعدنا فترة في مصر كنت برضو مشغول في دراستي وشغلي يعني ظروفي هي هي ايه اللي جد بقى علشان تحس إني بحب أختي حب مش طبيعي علشان قولتلها حبيبتي خلاص مش هقولها تاني عاوزاني معرفهاش حاضر هقول لمريم انسيني خالص اعتبري ملكيش أخ علشان مراتي زعلانه.
إياد : اهدي يا ابني أنا مقولتش كدا.
مازن : امال اعمل ايه يا عمي أنا مبعملش حاجة في حياتي غير شغلي ودراستي وبرجع بيتي استريح شوية وان كنت بقعد معاهم ساعة ولا حاجة وادخل أنام اعمل ايه اقطع نفسي اراعي مشاعرها ازاي مش فاهم هل قالت لحضرتك اني مقصر في واجباتي ناحيتها أنا عاوز أفهم عملت ايه علشان استاهل كل ده؟!
إياد : مش عارف اقولك إيه بس هي مشتكتش خالص لا من انشغالك بـ دراستك ولا شغلك ولا حتى غيابك عن البيت اتكلمت فيه ..
مازن : اه هي كل اللي مضايقها مريم.. حاضر يا عمي مش هعرفها تاني علشان حضرتها تستريح أنا أصلا مبقتش اكلمها كتير سدت نفسي أو بمعنى أصح خلتني حاسس كإني بكلم ست عليها.
إياد : يا ابني مين قال كدا بس حد يقاطع أخته وأنت لو عملت كدا مفكر إني هأمن على بنتي معاك أصلا اهدا كدا وبكرة تتعدل.
مازن : شوف ايه طلباتها وأنا هنفذها.
إياد : طلباتها مينفعش تتنفذ لإنها مش واعيه لنفسها اصلا.
مازن : قولها اني سألت عنها علشان كلمت طنط وقالت نايمه برضو وشوية كدا هكلمهم تاني يمكن تكون صحيت ولو مردتش حضرتك كلمها بقى وأنا هحاول اظبط أموري وانزل احل المشكلة دي واشوفها عاوزه إيه.
إياد : ماشي يا ابني هتكلم معاها حاضر وأنت برضو من ناحيتك شوية.
مازن : حاضر يا عمي أنا مش متأخر بس هي ترد عليه وتكلمني.
_______
في منزل عُمر..
نادين : ماما اقور كل الكوسه دي؟
ياسمينا : اه هي مش كتير مالك مستغربه ليه؟
نادين : لا كتير يا ماما متكتريش في الأكل علشان مفيش حاجة تبوظ.
ياسمينا : كله هيتاكل يا بنتي متخافيش.
فريدة : ماما أنا سلقت الكرنب اجيب الحاجة واحشي هنا علشان اتخنقت من المطبخ.
ياسمينا : ماشي هاتي الحاجة واعملي هنا علشان اعمل معاكي.
نادين : كوكي تليفوني بيرن شوفي مين ايدي مش فاضية.
كنده : دا بابا يا ماما.
نادين : قوليله مشغول هكلمه بعدين.
ياسمينا : روحي كلمي جوزك وهاتي ده.
وقعدت ياسمينا تقور الكوسه.