تكملة باقي حلقات الجزء الرابع من أنت قلبي

الجزء الرابع /الحلقة ١١٧

#أنت_قلبي٤
_________
الحلقة ١١٧

في غرفة كريم وفريدة.
فريدة : بس بقى يا جميلة.
جميلة : مامي قومي بقى يلا.
فريدة : يا بنتي سيبيني نايمه مليش مزاج أقوم دلوقت.
جميلة : علشان خاطري بقى يلا قومي أنا جهزت الفطار ومش لاقيه حد يقعد معايا يفتح نفسي.
فريدة قامت بفزع : هو باباكي خرج؟
جميلة : ايوه.
فريدة : امتى؟
جميلة : معرفش.. بس أنا قومت ملقتش عربية بابي راكنه بره في الجنينة عرفت إنه مشي.
فريدة : طب عاوزه ايه مني دلوقت؟
جميلة : مامي هي عينك وارمه من ايه؟
فريدة جريت على المرايا : ايه عيني وارمه!
دا صحيح وارمه.
ودخلت جوه تغسل وشها
بعدها خرجت ملقتش جميلة.
__________
في شقة مجدي.
زينة : مجدي.. مجدي قوم بقى مش هتنزل الشغل النهاردا ولا ايه؟
مجدي بصوت ناعس : لأ.
زينة : ايه! ليه؟
مجدي : كدا يا زينة مش عاوز أنزل الشغل النهاردا هقضي اليوم معاكم ولا مش عاوزاني؟
زينة : مش حكاية مش عاوزاك بس شغلك يا حبيبي إيه مفيش حاجة هتتعطل؟
مجدي : لأ مفيش حاجة هتتعطل بقولك ايه ما تنامي طالما رهف نايمه.
زينة : رد على التليفون الأول.
مجدي نظر لشاشة الموبايل وكنسل.
زينة : ايه مردتش ليه؟
مجدي : رقم مش مهم.
زينة : امممم
مجدي : ايه يا حبيبتي مالك؟
زينة : مفيش... الظاهر في مسجات جاتلك.
مجدي : اه.. الشغل بقى وكدا بس أنا مش هرد على حد اليوم كله هيبقى ليكي.
زينة : تمام هروح أشرب حاجة سُخنه أعملك معايا؟
مجدي : لأ.
زينة : طيب نام بقى.
وخرجت زينة من الغرفة دخلت المطبخ كنوع من الهروب لإنها شكت إن اللي بيتصل ده ممكن تكون بنت من اللي يعرفهم مجدي وخرجت بسرعة علشان مش عاوزه الشك دا يزيد أكتر لحد ما تتأكد.
زينة : أنا تعبت وخايفه أفضل عايشه كدا يجرا لي حاجة عارف يا مجدي لو اللي في دماغي دا أكيد هيبقى أخر ما بينا لإن خلاص اعصابي مبقتش مستحمله.

يفتح مجدي الموبايل ويقرأ الرسائل.
غزل كاتبة : صح النوم يا دكتور إيه لسه نايم ولا إيه؟
على العموم لما تصحى ابقى افتح التليفون علشان عاوزه أكلمك في الموضوع إياه ده
وياريت تيجي علشان هنتفاهم شكلك نسيت.
بيفكر يرد عليها لكن كان متردد لحد ما حذف الرسائل وقفل التليفون وقام يشوف زينة لإنه شعر إنها اضايقت.

في المطبخ..
مجدي : بتعملي إيه؟
اتخضت زينة والتفتت ليه.
مجدي : أنا آسف معرفش إنك هتتخضي كدا.
زينة : هتشرب حاجة؟
مجدي بابتسامة : لأ هاكل.
زينة : حاضر.
بتفتح التلاجة وهو ايده على ايدها نفسها اللي بتفتح التلاجة.
زينة : في حاجة؟
مجدي : هو انتي لسه زعلانه مني؟
زينة : لأ ليه؟
مجدي : متأكدة؟
زينة : ليه بتقول كدا؟
مجدي : معرفش ليه عندي الاحساس ده أصل امبارح يعني حسيتك مش مبسوطه إننا اتصالحنا وأنا مش حابب كدا عاوزك تنسي كل حاجة.
زينة : ما أنا بنسى أهو المهم رديت على اللي كان بيتصل بيك؟
مجدي : زينة دا حد عاوزني في شغل.
زينة : طب ما أنا عارفه هو حد قال إن الحد ده واحدة مثلا؟!
مجدي : زينة بقى ابوس ايدك بلاش طريقتك دي.
زينة نظرت في عيونه وهو بيحاول يبعد نظره عنها.
زينة : ايه مالك؟
مجدي : معرفش انتي نظراتك ليه غريبه مش فاهم فيه إيه يا حبيبتي صدقيني أنا مفيش في قلبي ولا عقلي غيرك.
زينة : هو أنا قولت حاجة أنت ليه بتحاول تنكر حاجات احنا متكلمناش فيها أصلا.
مجدي يُقبل ايدها ويضمها ليه : يعني بتحبيني زي ما أنا بحبك.
بتبكي زينة..
مجدي بدأ يتعصب : فيه ايه بس يا زينة أنا عملت ايه لكل ده؟!
زينة : معملتش حاجة اعتبرني مجنونه.
مجدي : لا يا حبيبتي انتي ست العاقلين بس علشان خاطري حاولي تثقي فيه شوية.
زينة بتمسح دموعها : هتفطر؟
مجدي : وانتي زعلانه كدا؟!
زينة : لأ مش زعلانه.
مجدي : طب عيني في عينك كدا.
زينة : خلاص يا مجدي ابعد بقى علشان اعرف افتح التلاجة.
مجدي : قوليلي عاوزه تعملي ايه وأنا اساعدك.
زينة : لأ متشكرة.
مجدي : خليني بس اساعدك.. هنخرج البيض واللبن والجبنه دا أساسي صح؟
زينة بابتسامة : صح.
مجدي : نخرج بقى خضار خيار طماطم فلفل وعسل
هو مين اللي دخل العسل التلاجة؟!
زينة : معرفش.
مجدي : فيه بيتزا بايته بقالها يومين وساندوتش شاورما العيش بتاعه نشف وفي صدور فراخ.
زينة : هعمل ايه بصدور الفراخ دلوقت.
مجدي : لا دا خليه للغدا بقى في بسطرمه تاكلي بيض بالبسطرمه؟
زينة : مفيش مشكلة هات.
مجدي : اتفضلي.. عاوزه حاجة تانية؟
زينة : لأ دا كفاية.
مجدي : ماشي هقطع أنا الخضار عبال ما تعملي البيض سخني العيش بقى في الميكرويف علشان مفيش عيش فريش.
_______
في المساء.. في فيلا عُمر.
وفي جنينة الفيلا بالتحديد..
واقف عُمر ومعاه هشام وولاده بياخدوا العزاء وقاعد آسر على الكرسي جنبهم.
يجي علي ومجدي ولاد آسر يعزوا هشام.
وكريم ومجدي قاعدين في العزاء.
كان كريم وقتها دماغه مشغوله وبيفكر هيتكلم مع كريم ومعتز ولاد أخوه يقولهم إيه أكيد الموقف هيكون صعب عليهم خصوصا ووالدتهم متوفيه.
مجدي : دكتور كريم يا دكتور..
كريم كان سرحان.
كريم : ها.. فيه حاجة يا أستاذ مجدي؟
مجدي : القهوة حضرتك مش طلبت قهوة برضو؟
كريم : اه متشكر.
مجدي : العفو.
مجدي ص : انكل كنت عاوز حضرتك في كلمتين.
خرج مجدي ك يتكلم مع مجدي ص في الخارج أمام الفيلا.
مجدي ك : اسمع أنت متحاولش تتواصل معاها نهائي لإنها ممكن تدبرلك مكيده جديدة.
مجدي ص : طب والحل أنا عملت لها بلوك بس أنا حابب اواجهها ومضايق من نفسي إني واقف متكتف كدا ومش عارف أخد حقي.
مجدي ك : أنت شوفت إيصالات الأمانة اللي معاها دي؟
مجدي ص : لأ بس هما مش عندي ودا اللي أكد لي إنها مبتكدبش بس قطعتهم بقى شطبت عليهم مش فاكر وبقول يمكن وقعوا مني عندها لإني مستحيل كنت هسيب لها حاجة زي كدا.
مجدي ك : سيبني أنا هتصرف وابعد نفسك عن الحوار ده لإن اللي عرفته من علي إنها عملالك مشاكل في البيت مع مراتك.
مجدي ص : ما هو دا اللي مخليني مش عارف اتعامل معاها أنا وعدت انكل هشام إن مفيش أي تعامل بيني وبين الست دي تاني واخاف أحاول أحل المشكلة دي معاها يشم خبر بالموضوع ويفهم غلط وأنا مش ناقص.
مجدي ك : خلاص ملكش دعوة أنت وسيبني اتصرف.
مجدي ص : معلش بس ممكن اسأل حضرتك تعرفني هتتصرف ازاي؟
مجدي ك : في حوار كدا برتب ليه لو مشي والأمور بقت تمام هقولك.
مجدي ص : اوك.. وأنا آسف خرجتك من العزا واحرجت حضرتك.
مجدي ك : لا محصلش حاجة هتدخل ولا ماشي؟
مجدي ص : لأ هدخل.
مجدي ك : طب ماشي اتفضل.