تكملة باقي حلقات الجزء الرابع من أنت قلبي

الجزء الرابع /الحلقة ١٤١

#أنت_قلبي٤
__________
الحلقة ١٤١

في المستشفى بعد ما عملت فريدة الفحوصات اللازمة بيساعدها كريم إنها تقوم.
فريدة : كريم أنا دايخه.
كريم : هجبلك حاجة تشربيها بس لما ننزل تحت.
______
هشام بيساعد مراد إنه يقوم بعد ما الدكتور خلص كشف.
الدكتور : اقعد استريح يا دكتور هشام اقعد يا مراد.
هشام : طمني يا دكتور.
الدكتور : متقلقش بس مقدرش أقول حاجة دلوقت غير بعد ما يعمل الأشعة دي وتجيبهالي اشوفها.
هشام : حاضر يا دكتور يلا يا مراد.
____
علا :  عندك هنا بتعمل إيه؟
السواق : جرا إيه بس يا ست علا احنا مش متفقين إننا هنصص مع بعض ولا ايه؟
علا : أنت قولت في الأول كدا وأنا قولت التلت وأنت وافقت.
السواق : ماشي بس دا بخصوص الدهب اما الفلوس بقى هتبقى بالنص.
علا وهي مضايقه : ماشي.
السواق : فيها ايه الأوراق دي؟
علا : وأنت مالك يخصك فيه ايه هو أكل وبحلقه ولا إيه؟!
السواق : خلاص خلاص متتحمقيش قوي كدا بس اتأكدي إن فواتير الدهب دا معاكي علشان نعرف نبيعه.
علا : معايا.
السواق : لازم نتصرف فيه في أقرب وقت قبل ما يبلغوا.
علا : بس مش هنبيعه هنا.
السواق : امال فين؟
علا : هقولك.
________
مريم من فوق : مين؟
ريتاج : احنا يا طنط مامي عندك علشان بنرن الجرس محدش بيرد.
مريم تنزل تحت تخبط على الباب.. مفيش رد.
ليلى : فيه حاجة يا مريم ايه يا ريتاج واقفه كدا ليه انتي واخوكي؟
مريم : رجعوا من المدرسة بيخبطوا على مامتهم مبتفتحش.
ليلى : أنا كمان نزلت من شوية خبطت عليها متفتحش قولت يمكن نايمه.
مريم : نايمه كل دا؟
معاكي التليفون يا ليلى؟
ليلى : اه.
مريم : طب اتصلي بيها كدا لو نايمه أكيد هتقوم ترد يعني.
ليلى : ثواني هشوف كدا.
_____
في شقة إياد.
سهر : خلاص بقيتوا شايفيني مجنونه ومحتاجة اتعالج؟!
منة : يا بنتي مش عيب الواحد لما يحس إنه تعبان يروح يطمن على نفسه.
سهر : لا لا مش رايحه لدكتور أنا مش مجنونه.
مازن : انتي يعني راضيه عن حياتنا بالشكل ده؟!
سهر : مالها حياتنا؟
أنت اللي مصمم تدخل حد في حياتنا أنا مش حباه.
مازن : محدش بيتدخل في حياتنا يا سهر انتي اللي واهمه نفسك.
سهر : لأ مريم بتتدخل في حياتنا.
مازن : عمرها ما صدر منها حاجة تأذيكي بالعكس هي مقالتليش حاجة بخصوص المكالمة ايها.
سهر : مكالمة إيه؟
مازن : افتحها قدام مامتك عادي؟
سهر : اه عادي سمعني بقى يلا.
مازن : تمام بس قبل اي حاجة لازم تعرفي إن التليفون عندي بيسجل المكالمات لوحده وشكلك مكنتيش تعرفي.
ارتبكت سهر شوية لكن صممت إنه يشغل المكالمة تسمعها.
المكالمة..
سهر : وعاوزه مازن في ايه بقى يا مريم؟
مريم : عادي يا سهر عاوزه اكلمه اطمن عليه.
سهر : معلش أصلنا قاعدين مع بعض ومش هينفع يكلمك.
احرجت مريم وهتقفل.
سهر : بقولك ايه يا مريم هو مراد فين؟
مريم : نعم!
سهر : أصل يعني شايفاه مش مهتم بيكي ودا مسببلك فراغ.
قفلت مريم بسرعة..
سهر نظرت لوالدتها بارتباك.
مازن : ها.. ايه رأيك في الكلام ده؟
منة : ايه يا بنتي اللي قولتيه ده؟!
مازن : لعلمك أنا قابلت مريم وقعدت معاها ورجعت الاوتيل وسافرنا تاني يوم وكلمتها في التليفون وتاني يوم برضو روحت عندها وأخدتها وسافرنا البلد وطول اليوم امبارح معايا مجبتش سيرة المكالمة دي نهائي مع إن حقها تزعل من كلامك وتشتكيلي لكن معملتش كدا وسكتت وأنا بالصدفه لاقيت المكالمة دي متسجله عندي وكنت شاكك برضو إنك عكيتي في الكلام وقولتلها حاجة زعلتها لاني لما كلمتها بعدها كانت مموته نفسها من العياط ودا السبب اللي خلاني اروح لها الليله دي
هي وصلت معاكي للدرجة دي أنا تمنعي أختي إنها تكلمني ليه مفكره إني هبيع أختي عشانك؟!
منة : طب اهدا يا ابني حقك عليه.
مازن : اهدا إيه بس يا طنط دي خلت برج من عقلي خلاص هيطير أنا مش فاهم انتي عاوزه توصليني لـ إيه بالظبط ما هو لتتعدلي وتشوفي المشكلة اللي عندك دي وتحاولي تعالجيها لـ اما كل واحد يروح لحاله لإن معنديش استعداد أخسر أختي علشانك ولا علشان أي حد.
منة خرجت..
سهر : خلصت كلام؟
مازن : سهر أنا مش هقصر معاكي في أي فلوس تحتاجيها هسافر واسيبك تقعدي كدا مع نفسك وتفكري هل أنا كدا بظلمك لما بطالبك تروحي للدكتور تتعالجي علشان نقدر نعيش مع بعض ولو شايفه إنك كويسه وزي الفل والمشكلة عندي أنا بسيطة خالص اريحك مني ولا تزعلي نفسك اسيبك تشوفي حياتك يمكن تلاقي حد يفهم دماغك دي.
سهر بتبكي : افهم بقى يا أخي أنا بحبك.. بحبك ومقدرش أعيش من غيرك أنت اللي قاسي عليه قوي مش عاوز تفهمني.
مازن : انتي مفكره إن دموعك دي هتخليني شايفك مظلومه واني جاي عليكي وأنا اللي مفتري ازاي أرفض حبك وابيع الدنيا كلها علشانك لا يا حبيبتي أنا اه محتاج حبك زي ما انتي محتاجاني بالظبط بس أكيد مش كدا.
سهر تمسك ايده : متسبنيش يا مازن أنا بحبك مقدرش أستغنى عنك أنا بتعذب وأنت بعيد عني.
مازن : وانتي تعبتيني كلامك مش مأثر فيه نهائي انتي لازم تروحي للدكتور مفيش حل تاني لإننا جربنا قبل كدا ومنفعش لو بتحبيني بجد هتسمعي كلامي.
سهر : طب قولي أعمل إيه وأنا هسمع كلامك.
مازن : يعني هتيجي معايا للدكتور؟
سهر : حاضر.
مازن : بجد ولا كلام وخلاص؟
سهر : لا بجد طالما أنت عاوز كدا.
مازن : مفيش حاجة اسمها
طالما أنت عاوز كدا انتي شايفه إن عندك مشكلة ولا معندكيش؟
سهر : أنت شايف إن عندي مشكلة يبقى عندي مشكلة فعلا ولازم اتعالج بس متسبنيش.
______
في شركة مراد..
شادي : ايه رايح فين؟
هشام : ليلى متصله بيه عاوزه مفتاح شقتي.
شادي : وليلى عاوزه مفتاح شقتك ليه؟
هشام : بتقول إن ياسمين جوه مبتردش خبطت عليها كتير برضو مفتحتش.
شادي : ما يمكن مش جوه اتصل شوفها فين.
هشام : مبتردش على التليفون ومش هتروح مكان من غير ما تقولي.
شادي : طيب روح كدا وابقى طمني.
هشام : سلام عليكم.
شادي : وعليكم السلام.
________
في المطعم.
كريم : فراخ بس انتي أكلتي الرز بتاعك.
فريدة : دول معلقتين اللي اكلتهم يا كريم.
كريم : معلش كلمي بالفراخ وطبق السلطة اللي قدامك الدكتور قال ايه؟
فريدة : لازم اخس علشان دا هيساعدني إني اتحسن.
كريم : يبقى تسمعي الكلام كملي أكلك بقى.
فريدة : ياااه يا كريم فاكر المكان ده بس تغير كتير عن زمان.
كريم : طبعا فاكرة دا أول مطعم ادخله أنا وانتي بعد ما اتجوزنا.
فريدة : كانت أيام حلوة يا كريم.
كريم : بالنسبة ليه الجوازة التانية كانت أحلى هههههههه
فريدة : على فكرة بضايق لما بتقول كدا علشان مبحبش افتكر.
كريم : ولا أنا علشان كدا بعتبرها جوازتي الأولى منك لإننا عيشنا لوحدنا وفهمنا بعض أكتر رغم إن حصلت حاجات كتير كانت ممكن تهد البيت بس اتعلمنا درس من اللي حصل أول مرة صح؟
فريدة : صح.
كريم : كُلي بقى يا حبيبتي.
فريدة : بتحبني يا كريم؟
كريم : واخدك تخليص حق يعني يا فريدة؟!
ما هو أكيد يا حبيبتي علشان بحبك.
فريدة : بس أنا تعبتك كتير خصوصا الفترة الأخيرة.
كريم : انتي بتقولي ايه يا فريدة دا أنا لو مشتلتكيش الأرض اشيلك فوق دماغي تعب ايه بس ودا يجي حاجة من اللي استحملتيه معايا؟!
فريدة : بس أنت عمرك ما اهانتني يا كريم ودايمًا بتحس بيه وبتقدر تعبي حتى لما تعبت مزهقتش مني وقعدت تخدمني.
كريم : تفتكري الواحد يعمل إيه مع زوجة عاشت طول عمرها تراعي ولاده وحافظه بيته وصاينه عرضه يكون ايه جزاءها بعد كل ده  لو تعبت شوية؟
هو أنا يعني لو تعبت هتزهقي مني وتسبيني وتمشي ولا هتراعيني وتهتمي بيه؟
فريدة : بعد الشر عليك دا أنا اشيلك جوه قلبي وفي نن عيني يا ابن عمي.
كريم : هههههههههههه ما احنا كنا ماشيين كويس كنت خلاص الدمعه هتفر من عيني ختمتيها بـ ابن عمي دي ليه ايه المناسبة ولا افتكرتي دلوقت قولتي ما اقولها وخلاص؟!
كريم : لأ علشان أنا بحب افتكر انك ابن عمي علشان كنت بحب عمي قوي هو كمان كان بيحبني فلازم أحب ابنه بقى.
كريم : يلا أهو فوق البيعه تعالي على نفسك وحبيه.
فريدة : هههههههههههه
كريم : بطمن لما بشوف ضحتك.
فريدة : بس دي بتتسمع مبتتاشفش.
كريم : بالنسبة لي اشوفها أهم بكتير من إني اسمعها.
فريدة : أنا بقول نكمل أكل وكفاية رغي بقى جميلة هترجع من المدرسة متلقيش حد في البيت.
ينظر كريم في الساعة : اتنين ونص يدوب نخلص أكل وطيران على البيت.
فريدة : طب يلا بينا.
كريم : نكمل أكل الأول اقعدي مش هنتأخر متقلقيش.
_______
في فيلا هارون.
مروة : لأ محدش هناك أنا شوفت حماكي وحماتك خارجين مع بعض الصبح ولحد دلوقت مرجعوش أصل البوابة بتعمل صوت أول ما تتفتح فبعرف إن حد جاي أو خارج من عندهم.
ميرا : هيكونوا راحوا فين؟
مروة : متشغليش بالك زمانهم جايين تلاقيه خرجها تشم شوية هوا ما هو لازم يخرجها امال إيه أنا بس اللي اقعد في البيت كدا باباكي على طول مشغول عني بالشغل بتاعه.
ميرا : طنط فريدة تعبانه يا مامي عمو كريم تلاقيه اخدها للدكتور.
مروة : جرا ايه يا ميرا هو أنا هحسدها يعني ولا ايه ما أنا عارفه إنها تعبانه ولما يخرجها تشم شوية هوا يبقى راجل بيفهم مش غيرانه يعني ولا حاجة.
ميرا : أنا مقولتش كدا يا مامي بس بوضح لحضرتك إنهم مش هيخرجوا يتفسحوا يعني في الظروف دي.
مروة : بقولك ايه أنا معزتهاش في وفاة أخو حماكي ينفع اروح معاكي وانتي رايحه لها؟
ميرا : اه عادي.. ياريت يا مامي بجد طنط فريدة طيبة هو بس كان سوء تفاهم وكله بيتنسى حتى علشان التعب اللي عندها ده.
مروة : اوك بس لما يجو بقى.
_______
في شقة هشام.
ياسمين : امتى ده أنا مسمعتش حاجة؟
ليلى : بتتكلمي بجد دا أنا وريتاج ويمان ومريم قعدنا نخبط ونرن الجرس ونتصل بالتليفون كل دا ومفيش رد.
هشام : معقول يا ياسمين نومك تقيل للدرجة دي انتي اللي بتصحيني دايما
شربتي ايه عمل فيكي كدا؟
ياسمين ماسكها دماغها : آآآآه صدااااع.. شربت ايه يعني ايه؟!
وبدأت تفتكر أخر حاجة قبل ما تدخل تنام وبتكلم نفسها : ماما دخلتني جوه نمت!
بس إيه اللي حصل بعدها وماما مشيت امتى؟!
هشام : ايه يا ياسمين بتفكري في ايه؟
ياسمين : ها.. ولا حاجة يا هشام.
ليلى : طيب عاوزه حاجة يا ياسمين؟
ياسمين : لا يا ليلى سلامتك معلش تعبت معايا.
ليلى : لا يا حبيبتي ولا يهمك مفيش تعب ولا حاجة بعد اذنكم.
هشام : اتفضلي.
وخرج هشام مع ليلى فتح لها الباب وخرجت.
ياسمين قامت تطمن على ابنها الصغير وولادها وبتفكر مامتها مشيت امتى وايه اللي حصل مش فاكره.
_______
في شقة سيف.
سيف : متأكدة إنك عاوزاها؟
مليكة : اه.
سيف : مقتنعه بيها يعني؟
مليكة : هنجربها شهر كدا يا سيف هي اللي قالت لي كدا هتيجي من بكرة.
سيف : تمام... ايه رايحه فين؟
مليكة : خلي يحيى معاك لما أخلص الأكل خلاص هيستوي أهو بس هروح اتأكد.
سيف : ماشي تعال يا مغلبنا.
قامت مليكة دخلت المطبخ ويجي يوسف وحلا.
حلا : بابي عاوزه اشيل يحيى شوية.
سيف : مش هينفع يا لولي.
حلا : شوية صغنين قد كدا.
يوسف : انتي صغيرة أنا اللي هشيله.
حلا : يا سلام ايش معنى أنت بقى؟
يوسف : علشان أنا أكبر منك انتي ممكن توقعيه.
سيف : لا أنت ولا هي اتفضلوا بقى روحوا العبوا.
يخرج يوسف وتقعد حلا بجانب والدها.
حلا : بابي.
سيف : نعم.
حلا : هات يحيى اشيله شوية يوسف مشي خلاص.
سيف بابتسامة : وبتغمزي ليه بعينك كدا؟
حلا : علشان يوسف ميسمعش.
سيف : هههههههههههه وهو كدا مش هيسمع؟!
حلا : هات يحيى بقى هحافظ عليه متخافش.
يوسف : انتي مجتيش ليه علشان تلعبي لو ادتها يحيى هاخده أنا كمان.
سيف : لا وعلى ايه اتفضل أنت وهي يلا هو اصلا نايم اطلعوا بره يلا.
________
في البلد..
زايد : مالك شايل طاجن ستك ليه فوق دماغك؟
ابن عمته التاني : شكل حامد ابن خالك مزهقه في عيشته.
محمود : لأ مش حامد هو ميقدرش اصلا يعمل معايا حاجة.
زايد : امال في ايه مالك؟
محمود : عرفتوا إن ولاد خالكم طارق كانوا هنا امبارح؟
ابن عمته : ايوه.. عرفنا وده مهم في ايه يعني ما يجو ولا عنهم ما جم لا هيزودونا ولا ينقصونا يعني.
محمود : بس اني متعلم عليه جامد يا ولاد عمتي وعاوز اخد حقي واعلم عليها ما هو مش واحدة ست تعلم على محمود ابن العمدة.
زايد : متعلم عليك من واحد ست؟!
ابن عمته التاني : هههههههههههه بس شكلها كدا عامله معاك السليمه زحلقتك وشافت غيرك ولا ايه؟
محمود : لا خلصت مصلحتها وبعدها قالت ولا أعرفك.
زايد : اوعى تكون مريم بنت عمك؟
محمود : هي.. اني مش قادر انسى لما كلمتنا علشان ننجدها من أمها اللي كانت هتموتها ولما جيبناها هنا اني وخالك سعيد وقعدت رايح جاي عندهم في بيت جدها ابعت لها المدرسين واكع من جيبي والهانم بعد ما نجحت قالت لي أمك في العش ولا طارت.
زايد : هههههههههههه بت بتاعت مصلحتها بس دي أنت عاوز منها دي متجوزه ولا مفكر إنها هتسيب جوزها وتتجوزك أنت.
محمود : لا جواز ايه اني اللي مش عاوز حتى لو عملت كدا اني ناقص دي معاها عيلين هربي عيال غيري ولا إيه؟!
ابن عمته : امال عاوز منها ايه؟
محمود : عاوز اعلم عليها زي ما اتهربت مني وخدت مصلحتها وطارت على مصر عاوز متنساش اليوم ده طول عمرها.
زايد : أنت شكلك اتجننت انت عاوز...
محمود : اديك فهمتها لوحدك.
ابن عمته التاني : ايوه.. يا محمود بس دي فيها كلبوش يا حبيبي دي توديك في داهيه ومتجوزه في عيله تقيله يعني مش هيسبوك.
محمود : لا مش هتقدر تتكلم بس الاقيها وساعتها توريني بقى هتهرب مني ازاي.
زايد : وأنت عاوز مننا ايه؟
محمود : عاوزكم تساعدوني.
ابن عمته : مش بنقول اتجننت يا محمود!
محمود : اللي تطلبوه اني هنفذه بس تساعدوني وليكم الحلاوة.
زايد : هتكتب لنا ملك ولا إيه.
محمود : ماشي اللي أنتم عاوزينه.
ابن عمته التاني بينظر لزايد.
محمود : ايه مش مصدقني؟
طب اهو مستعد اكتب لكم شيك وحطوا المبلغ اللي انتو عاوزينه ولو تم المراد ابقوا خُدوا بقيمته أرض من عندي ولا احبسوني.
زايد : الحكاية شكلها جد ولا ايه؟
ابن عمته التاني : للدرجة دي الموضوع ده مهم قوي كدا بالنسبة لك؟!
محمود : ضربتني حتة قفا لسه معلم لحد دلوقت واني مش هسكت غير لما اردهولها الطاق عشرة.
زايد : عشرة ايه بس هههههههههههه دا انت هتخليها تتمنى الموت يا جدع.
محمود : يبقى وافقت.. ها ايه رأيك أنت كمان؟
ابن عمته : معرفش أنت موافق صحيح يا زايد؟
زايد : وايه المانع يعني بس نعرف الأول ايه هي نوع المساعدة دي؟
محمود : تبقوا معايا بس علشان متقدرش تهرب مني.
زايد : هههههههههههه ماشي بس نتفق الأول.
_____
في شقة هشام.
عمار : يعني ايه يا بنتي مش فاكرة حصل ايه بعدها؟!
ياسمين : كنت عامله زي اللي متخدره يا بابا مش فاكرة أنا نمت ازاي كدا كنت شبه القتيله.
وفاء : بعد الشر عليكي يا ياسمين.
عمار : ومامتك خرجت ازاي؟
ياسمين : ما أنا مش فاكرة حاجة يا بابا.
وفاء : ما قالت لك يا عمار مش فاكرة.
عمار : مش عارف ليه مش مستريح للموضوع مامتك تيجي من هنا تدوخي وتنامي ومتحسيش بيها ولا تدري خالص عن الدنيا غريبه دي هي كانت معاها برفان ولا حاجة؟
ياسمين : لأ.. بس اه افتكرت أنا أخر حاجة كنت بشربها العصير حطيت الكوباية من هنا والدنيا لفت بيه.
وفاء : ايه يا عمار مالك بتبص كدا ليه معقول يعني هتحط لبنتها حاجة في العصير طب ليه؟
عمار : لما قومتي لاقيتني حاجة متغيره في الشقة؟
ياسمين : لأ دا حتى الكوبايات اللي شربنا فيها لاقيتها مغسوله و...
وفاء : ايه يا ياسمين مالك كملي.
ياسمين : ماما مش من عادتها اصلا تعملي حاجة.
عمار : روحي اطمني على حاجتك.
ياسمين : ايه!
عمار : قومي شوفي فلوسك دهبك أي حاجة محتفظه بيها في اوضتك متعرفيش حصل ايه وانتي متخدره كل دا ومفهمتيش يا ياسمين.
ياسمين تجري على الدولاب بسرعة..
يسمعوها وهي بتصوت يجروا يشوفوا فيه ايه.
وفاء : فيه ايه يا ياسمين حصل ايه؟
وتجري وفاء تاخد الولد الصغير علشان قام من النوم يبكي.
عمار : فيه ايه يا بنتي فهمينا حصل ايه؟
ياسمين : علبة الدهب بتاعتي يا بابا مش لاقيها.
وفاء : مش لاقياه ازاي بس دوري كويس.
ياسمين : أنا حطاها بـ ايدي هنا امبارح خلعت الخاتم علشان لاقيته ضيق على صباعي وتعبني روحت رميته هنا وقفلت العلبة دي فيها كل الدهب بتاعي لو اتسرق أنا كدا اتخرب بيتي.
وفاء : ومين بس يا بنتي اللي هيسرقه افتكري تكوني غيرتي مكانه وناسيه.
ياسمين بتبكي : أنا متأكده إني سايبه العلبة هنا أنا أصلا مبشلهاش من مكانها ومحدش من الولاد بيدخل الاوضة حتى منعاهم يدخلوا يشيلوا اخوهم علشان ميوقعش منهم والصبح كانوا في المدرسة وأنا حاطه الخاتم بـ ايدي دي بالليل قبل ما أنام.
أقول ايه لهشام دلوقت اقوله إيه؟
عمار : في كاميرات هنا مش كدا؟
ياسمين : في واحدة عند باب الشقة من بره وواحدة عنده البوابة.
وفاء : هتعمل ايه بالكاميرات يعني يا عمار ما هي كانت قاعدة في البيت الحرامي هيدخل من غير ما تحس بيه؟!
عمار : ايوه علشان كانت متخدره.
ياسمين : فعلا يا بابا أنا شربت العصير من هنا ومدرتش بالدنيا مقومتش غير لما هشام جه من بره ولاقيت كلهم واقفين حواليه مش فاهمه فيه ايه ولا فاكرة حاجة.
عمار : عملتها وخلعت.
ياسمين : أنا هيتخرب بيتي كدا لو هشام عرف اعمل إيه؟
وفاء : اهدي يا ياسمين كلمي مامتك كدا واسأليها وافهمي منها ايه اللي حصل.
عمار : انتي طيبه قوي يا وفاء وهي يعني هتقولها الحقيقة وحتى لو قالت هترجع الحاجات دي ازاي بس متعرفش اصلا إنك عرفتي.
ياسمين : لا أكيد عارفه دلوقت اني فتحت الدولاب واطمنت على حاجتي وإن مكانش النهاردا هيبقى بكرة بعده يعني مسيري هعرف.
وفاء : ياسمين معاها حق.
ياسمين : اعمل ايه في مصيبتي دي حد يقولي اعمل إيه؟
________
في فيلا مراد.
أمل : عملت ايه يا هشام؟
هشام : روحنا للدكتور ومراد عمل الأشعة لسه هنشوفها بكرة الوقت اتأخر قولتله ابقى هاتها وبكرة نروح للدكتور يشوفها ويطمنا.
أمل : قلبي مقبوض معرفش ليه؟
هشام : اتفاءلي خير يا أمل.
أمل : كلمت هشام؟
هشام : ليه ماله هشام هو كمان؟
أمل : معرفش لاقيت ليلى بتكلمني إن كان في نسخة من مفتاح شقة هشام معايا بسألها ليه قالت ياسمين جوه مبتردش.
هشام : ازاي يعني؟
أمل : المهم هشام راحلها لاقاها نايمه وأنا مش داخل دماغي الموضوع ده.
هشام : هيكون ايه اللي حصل يعني يا أمل بلاش الوسواس بتاعك دي.
أمل : البيت كله كان بيخبط على الباب ليلى بتقول لي دخلوا قعدوا يصحوا في ياسمين فين وفين لما قامت وكان شكلها متغير كدا مش فاهمه فيه ايه بكرة هروح اشوفها.
هشام : طيب اغير هدومي بقى ولا لسه في حاجة تانية؟
أمل : لأ مفيش.
_______
في شقة مراد.
مريم : طيب يا حبيبي خير.
مراد : مازن اخوكي جه؟
مريم : لأ.
مراد : كان مكلمني بيقولي إنه جاي عليكي.
مريم : يبقى تلاقي في حاجة عطلته شكله زعلان هو ومراته.
مراد : ملناش دعوة.
مريم : أنت ليه يا مراد كل أما اتكلم تقولي كدا مع إني مببقاش قصدي أتدخل بينه وبين مراته بس بدأت احس إنها عاوزاه يبعد عني.
مراد : شوفي يا مريم حتى لو كلامك دا حقيقي اخوكي مش لازم يعرف منك الكلام ده علشان متحصلش مشكلة بينكم.
مريم : لأ طبعا مستحيل اقوله حاجة زي دي أنا بفضفض معاك بس.
مراد : خلاص يبقى خليها في سرك ولو دا حقيقي هو هيعرف من نفسه مش لازم حد يقوله.
مريم : عندك حق أنا فهمت وجهة نظرك أنت مش عاوزها تيجي مني أنا.
مراد : بالظبط كدا.
مريم : حبيبي يا ميرو شوف أنا فهماك ازاي.
مراد : ميرو تعبان ومش مستحمل دلع علشان مش قادر يدوس على رجله.
مريم : ألف سلامة عليك يا حبيبي.
مراد : اطفي النور دا بقى خلينا ننام.
_______
في الصباح..
زين خارج من البيت بيتمشى.
مرام : أنا بقالي كتير  ماشيه وأنت مش شايفني.
التفت لها زين بدهشه.
مرام بابتسامة : صباح الخير.
زين : صباح النور.
مرام بابتسامة : صباح ورد فل وحاجات كتير من دي.
زين : عرفتي كل دا فين؟
مرام : سارة عرفتي حاجات كتير.
زين : سارة!
مرام : لازم أنا كمان اعرفك حاجات كتير بتاعتنا أنا بقول سارة مش حاجة تانية هي قالت كدا.
زين : اه تمام... خير بقى؟
مرام : خير يعني ايه؟
زين : يعني بسألك جايه عاوزه حاجة؟
مرام : لأ جايه اشوفك بس.
زين : كريم يعرف إنك جايه؟
مرام : وكريم يعرف ليه؟
زين : يعني عادي بما إنه خطيبك ابن عمك فرد من العيله بتشوفيه كل يوم فطبيعي تقوليله إنك خارجة.
مرام : اه هو يعرف إني خارجة فين بقى مش يعرف.
زين : اه.
مرام : المشي دا الرياضة بتاعتك؟
زين : يعني حاجة زي كدا؟
مرام : زين أنا مش بفهم كل الكلام.
زين : بكرة تفهمي وبعدين مش لازم يعني تفهمي كريم مش هيتكلم معاكي عربي.
مرام : بس أنا عاوزه أفهم كل كلامك.
زين : ليه؟
مرام : علشان الواحد لما يحب حد لازم يفهمه.
زين : مرام أنا...
تقاطعه مرام : زين أنا معجبه بيك قوي لازم اقول لك الحقيقة من غير كذب.
زين : ايه!
مرام : بقول إن أنا معجبه بيك يعني بحبك.
نظر لها زين بدهشه وهو مش عارف يرد يقولها ايه.
_______
في محلات إياد.
إياد : طب وأنت متعرفش عنوان البيت اللي ساكنه فيه؟
عمار : روحت هناك ملقتش حد.
إياد : سرقت الدهب وهربت يعني؟!
عمار : هو دهب وبس دا فلوس وأوراق مهمه أنا مش قادر استوعب إن الست دي تعمل كدا في بنتها.
إياد : مش عارف اقولك ايه يا عمار بس ياسمين في موقف صعب قوي.
عمار : أنا خايف يجرا لها حاجة احنا فضلنا معاها طول الليل مسبنهاش غير لما جوزها جه ووصيناها متقولش حاجة دلوقت لحد اما اتصرف لو معرفتش تقوله بقى وهو يروح يبلغ عنها براحته يعمل اللي هو عاوزه.
إياد بتنهيدة قوية يقعد.
عمار : مالك يا إياد أنت كمان؟
إياد : مش عارف اعمل ايه مع سهر بنتي؟
عمار : لسه برضو؟
إياد : روحت مع جوزها امبارح بس أنا عارف اللي هيحصل طول ما هي رافضه تروح للدكتور.
عمار : حكاية بنتك دي غريبة قوي الواحد بقى حاسس إن كل الناس مبقوش طبيعيين.
إياد : اهو الست علا قال تروح تعمل نفسها بتزور بنتها وتطمن عليها تدخل تخدرها وتسرقها وتهرب.
عمار : متغاظ قوي يا إياد منها.
إياد : مفيش حد من الجيران خرج قال لك حاجة؟
عمار : ميعرفوش عنها حاجة...
__________
في فيلا كريم.
مروة : أنا كنت عاوزه اجيلك من زمان بس الظروف بقى كنت مسافرة ولما رجعت قولت اجي ولا اعمل ايه بصراحة كنت محتاره.
ندى : اتفضلي.
مروة : شكرا يا اا
ندى : ندى اسمي ندى وممكن تقولي أم أنس.
مروة : تسلم ايدك يا أم أنس عامله ايه دلوقت يا فريدة؟
فريدة : الحمد لله.
ندى : اشربي يا ميرا كوبايتك.
ميرا : متشكره يا طنط.
مروة : ميرا لسه بتقولي امبارح إن زين سافر.
فريدة : اه من كام يوم كدا.
ندى : سافر يشوف مستقبله دي فريدة مكانتش عاوزاه يسافر باباه هو اللي وافقه على القرار ده
دي قاعدة يا حبيبتي قلبها واكلها عليه ووحشها الغربة صعبه ميحسش بيها إلا اللي مجربها.
مروة : مجربنها يا حبيبتي وعارفين.
ندى : اه ما أنا بقول برضو أصل يقولك فلان دا سافر ميعرفوش أهله قلبهم واكلهم عليه ازاي خصوصا الأم يعني.
نظرت مروة لميرا.
ندى : دي مبتلحقش تفوق ودايمًا تعبانه.
مروة : اه العين حق برضو.
ندى : اه يا حبيبتي.
مروة : مش يلا بينا يا ميرا؟
ميرا : هقعد شوية وهحصلك يا مامي.
مروة : كدا طيب.. عاوزه حاجة يا فريدة؟
فريدة : لا متشكره.
ندى : مع ألف سلامة يا أم ميرا.
وتوصلها ندى وترجع تاني.
ندى : اعملك حاجة تشربيها يا فريدة؟
فريدة : لا يا ندى اقعدي استريحي.
ندى : وانتي يا ميرا؟
ميرا : لا يا طنط متشكره العصير لسه قدامي.
ندى : طب اشربيه يا حبيبتي.
ميرا : حاضر.. بس هشوف يزن.
ندى : خليه اهو بيلعب مع عمته فوق.
________
خارجه مريم بالعربية تشتري طلبات البيت تلاحظ إن في عربية ماشيه وراها منين ما تروح..

في العربية..
زايد : امسك خُد لك نفس.
محمود : لا يا عم علشان اعرف اسوق وبعدين اطفي البتاعه دي لنتمسك.
ابن عمته : لسه موقفتش هي ناويه تلف بينا مصر كلها ولا ايه اكسر عليها العربية يا عم محمود.
زايد : شكلك اتسطلت ولا ايه؟
محمود : يا له أنت وهو ارموا اللي معاكو هنتمسك يا غبي منك ليه.
زايد : بس البت بت خالي دي حلوة قوي يا ياد يا محمود اني مشوفتهاش من زمان.
محمود : حلوة اه بيقولوا واخده من أمها ومن عمي طارق أصل كان حلو قوي برضو وهو شباب.
ابن عمته : حلو وهو شباب ازاي يا عم هههههههه ما هو مات وهو شباب برضو هو أنت كنت شوفته وهو كبير؟!
زايد : هي عماله تمشينا وسط الزحمة ليه؟
ابن عمته : يمكن حست بحاجة.
زايد : حست بحاجة!
محمود : اهو مسطول وبيقول كلام زي الفل اهو بس على مين هتروحي مني فين يا مريم دا انتي لو روحتي بوركينا فاسو اللي بيقولوا عليها دي هروح وراكي برضو.
زايد : هتفضل كدا لحد ما تمشي في طريق مقطوع ودي فرصتنا بقى.
ابن عمته : ياريت علشان اني...
يقاطعه محمود : أنت ايه يا حبيبي احنا متفقناش على كدا انتو بس هيوصلكو الفلوس اللي اتفقنا عليها غير كدا انتو بره الحوار دا خالص.
زايد : سيبه ما هو اللي ياكل لوحده يزور برضو.
محمود : ما انتو هتلهفوا مبلغ قد كدا يبقى تسمعوا اللي هقولكو عليه.

في التليفون.. 📞
مريم :معرفش أنا ماشيه في طريق أول مرة في حياتي اشوفه.
مراد وهو منفعل : وانتي ليه بتمشي في الطريق ده مركنتيش ليه ولميتي عليهم الناس يروقوهم؟!
مريم : طب أركن وانزل يعني؟
مراد : تركني وتنزلي فين بس يا مريم؟!
حاولي تلفي وترجعي تاني.
مريم : مش عارفه.
مراد : أنا قولت متنزليش لكن انتي اللي صممتي أقرب بنزينه اقفي عندها وانزلي اسألي انتي فين وخليكي واقفه عندك.
مريم : حاضر.
مراد : مترجعيش العربية خلي حد من اللي حواليكي يروحو يروقوهم.
مريم : حاضر.
مراد : كلميني وعرفيني انتي فين على طول علشان اجيلك.
مريم : حاضر.
مراد : مش شايفه حاجة مميزة في الطريق؟
مريم : لأ.
مراد : طب قسم شرطة أي حاجة؟
مريم : لأ.
مراد : شغلي الجي بي إس يا مريم توهتيني ازاي راح عن بالي؟!
مريم : حاضر ثواني... آآآآه
مراد : في ايه؟
مريم : بيكسروا عليه العربية.
الخط يقطع..
مراد : ألو.. ألو مريم انتي معايا.. ألو مريم ردي.
________
نكمل الحلقة الجايه...